پرەزيدەنتتىككە ۇمىتكەر قاراقات ابدەن ەسىك قالاسىنىڭ سايلاۋشىلارمەن كەزدەسۋ وتكىزدى. سايلاۋالدى جيىنعا جەرگىلىكتى تۇرعىندار, مەكتەپكە دەيىنگى ءبىلىم بەرۋ مەكەمەلەرىنىڭ ماماندارى قاتىستى. جيىن بارىسىندا ۇمىتكەردىڭ سايلاۋالدى باعدارلاماسى تانىستىرىلىپ, الەۋمەتتىك سالا, ءبىلىم بەرۋ مەن بالا تاربيەسى جايلى وزەكتى ماسەلەلەر كوتەرىلدى.
«بالالار قاۋىپسىزدىگى باستى نازاردا بولۋى كەرەك. بالالاردىڭ جاعدايىن جاساۋ ءۇشىن كۇندىز-ءتۇنى جۇمىس ىستەيتىن اتا-انالار بار. بىراق ولار كوپ جاعدايدا بالالارىن قالدىرىپ كەتەتىن جەر تابا الماي قينالادى. سوندىقتان تاۋلىك بويى جۇمىس ىستەيتىن بالاباقشالار اشۋ كەرەك دەپ ويلايمىن. سايلاۋشىلار تاراپىنان بۇل ماسەلە قولداۋ تاپتى. تاۋلىك بويى جۇمىس ىستەيتىن بالاباقشالاردى مەملەكەتتىك بالاباقشالاردىڭ نەگىزىندە اشىپ, جۇمىس ۋاقىتىن ۇزارتۋ ارقىلى ىسكە قوسۋعا بولادى. بۇل شەشىمنىڭ بىردەن-ءبىر ارتىقشىلىعى – ماسەلە شەشىمى ۇلكەن قاراجات جۇمساۋدى قاجەت ەتپەيدى» دەپ ءتۇسىندىردى ماسەلەنىڭ ءمانىسىن ق.ابدەن. ۇمىتكەردىڭ ايتۋىنشا, بۇل ماسەلە ونىڭ سايلاۋالدى باعدارلاماسىندا دا كورىنىس تاپقان.
قاراقات ابدەن بۇعان دەيىن اقمولا وبلىسى, قاراعاندى, استانا, ەكىباستۇز, سەمەي, پاۆلودار, تالعار قالالارىنىڭ تۇرعىندارىمەن جۇزدەستى. الداعى ۋاقىتتا اقتوبە, باتىس قازاقستان جانە قىزىلوردا وبلىسىنىڭ سايلاۋشىلارىمەن كەزدەسۋى جوسپارلانعان.
