– قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى وتكەنگە دەيىن ۇگىت-ناسيحات جۇمىستارى جۇرگىزىلگەندە, ەڭ اۋەلى حالقىمىز بەن ەلىمىزدىڭ اۋىزبىرشىلىگى بايقالدى. ارينە, بۇل قۋانتارلىق جايت. حالىق قاسىم-جومارت توقاەۆتى جانە ونىڭ باستامالارىن, رەفورمالارىن, ويلارىن قولدايتىندىقتان, ءارى وعان سەنگەندىكتەن ەلىمىزدىڭ ءار وڭىرىندە اۋىزبىرشىلىگىمەن ەرەكشەلەنىپ تۇردى. قوعامنىڭ تۇتاستىعى بولماسا, جاساندى تۇردە جاسالعان جۇمىستىڭ قۇنى جوق. بىرلىك بولماعان جەردە ەشقانداي ساياسات جۇرمەيدى. حالقىمىز پرەزيدەنتكە تاڭداۋ جاساعاندا, جاي عانا جەكە تۇلعاعا داۋىس بەرگەن جوق. مەملەكەت باسشىسىنىڭ اتقارعان جۇمىسى ءبىرىنشى كەزەكتە تۇردى. كوپشىلىك ادىلەتتى قازاقستاندى, وزگەرىستەردى تاڭدادى دەپ ويلايمىن. اسىرەسە جاستاردىڭ ساياسي ساناسى وسكەن, بەلسەندىلىگى دە جوعارى. جاس ادامنىڭ ساعىن سىندىراتىن – ادىلەتسىزدىك بولعان جەردە كەيىنگى ۇرپاق ەش باعدارلاماعا, ەش رەفورماعا سەنبەيدى. سول سەبەپتەن دە ولار ادىلەتتىلىككە داۋىس بەردى. قازىرگى كۇردەلى گەوساياسي جاعدايدا حالىقارالىق كەزدەسۋلەر وتكىزىپ, ديپلوماتيالىق كورەگەندىگىن كورسەتىپ جۇرگەن پرەزيدەنتتىڭ سارابدال ساياساتكەر ەكەنى ءسوزسىز. حالىق تا تاجىريبەسى بار باسشىنىڭ قاجەتتىلىگىن مويىندادى. سوڭعى 3 جىلدا قازاقستاننىڭ ساياسي قۇرىلىمىن جان-جاقتى رەفورمالاۋدىڭ باستاماسى بولعان نەگىزگى شەشىمدەر تەز ارادا قابىلداندى. وبلىستاردىڭ شەكاراسى ايقىندالىپ, ينفراقۇرىلىمى دامىدى. بۇگىنگى تاڭدا ق.توقاەۆتىڭ ديپلوماتياسى مەن ينتەللەكتۋالدىلىعى بىزگە قيىن كەزەڭدە كەلىسسوزدەر جۇرگىزۋگە جانە ءتيىمدى جۇمىس ىستەۋگە مۇمكىندىك بەرەدى. العاشقى جىلدارى جۇرگىزىلگەن جۇمىستار كەلەر جىلدارى دا ناتيجەسىن كورسەتەدى.
جاس ازامات رەتىندە ءوز باسىم ۇسىنىلىپ وتىرعان رەفورمالاردىڭ قاي-قايسىسى دا جاستارعا دا اسەر ەتەدى دەپ بىلەمىن. جاستار ءۇشىن ساياسي تۇراقتىلىق, ءبىلىم الۋعا, جۇمىس ىستەۋگە تەڭ مۇمكىنشىلىك قاجەت. بۇل جولدا جاستاردىڭ دا ۇلەسى بولۋى ماڭىزدى. ادىلدىكتى ۇيىسقان قوعام عانا ورناتادى.
ولجاس سۇلەيمەنوۆ, «Qazaqstan Team» رەسپۋبليكالىق جاستار
قوعامدىق بىرلەستىگىنىڭ جەتەكشىسى
