تاۋەلسىز قازاقستاننىڭ تاريحىندا 2022 جىلدىڭ 20 قاراشاسى التىن ارىپپەن جازىلادى دەسەم, ارتىق كەتپەسپىن. ەكى ساياسي جۇيەنى كورگەن ارداگەر ۇستاز رەتىندە, ومىرىمدە بىرنەشە رەت ءوزىمنىڭ كونستيتۋتسيالىق جانە ادامگەرشىلىك بورىشىم رەتىندە بىرنەشە سايلاۋعا قاتىسقان ەدىم. سونىمەن قاتار, كەڭەس وكىمەتى كەزىندە تالاي رەت سايلاۋ ۋچاسكەلەرىندە توراعا بولدىم. وتكەن جىلى رەفەرەندۋمدا باقىلاۋشى بولىپ, بيىلعى كەزەكتەن تىس پرەزيدەنتتىك سايلاۋدا كانديداتتىڭ سەنىمدى وكىلى بولىپ سايلاۋالدى ۇگىت-ناسيحات جۇمىسىنا ارالاستىم, سوندىقتان دا 20 قاراشادا وتكەن سايلاۋدىڭ ەرەكشە بولعانىن ايتقىم كەلەدى.
ءبىرىنشى ەرەكشەلىكتى ايتار بولسام, وتكەن وتىزجىلدىق كەزەڭدەگى پرەزيدەنتتىك سايلاۋعا قاراعاندا, وسى جولى رەسپۋبليكا بويىنشا زاڭدى تۇردە تىركەلگەن بارلىق پارتيالاردان جانە جەكە تۇلعالار ءوزىن-ءوزى ۇسىنۋ بويىنشا رەكوردتىق كورسەتكىشپەن بىرنەشە كانديدات ۇمىتكەر رەتىندە وتىنىشتەرىن بەردى. وپپوزيتسيالىق جسدپ پارتياسىنىڭ وكىلىنىڭ سايلاۋعا قاتىسۋى, ءبىزدىڭ ەلىمىزدىڭ سايلاۋ تاريحىنداعى ادىلدىكتىڭ, دەموكراتيانىڭ شىنايى كورىنىسىنىڭ جانە زاڭدىلىقتىڭ ناقتى ىسكە اسا باستاعانىن كورىپ وتىرمىز. بىراق, كەيبىر ۇمىتكەرلەردىڭ سايلاۋ زاڭدارىنا قۇجاتتارى سايكەس بولماعاندىقتان, التى كانديدات تىركەلدى. التى ۇمىتكەردىڭ تىركەلۋىنىڭ ءوزى – ءبىزدىڭ سايلاۋ تاريحىندا بولماعان وقيعا.
ەكىنشىدەن, ءوزىمنىڭ كانديداتتىڭ سەنىمدى وكىلى رەتىندە بايقاعانىم, سايلاۋالدى ۇگىت-ناسيحاتتىڭ استانا قالاسى بويىنشا زاڭ تالاپتارىنا ساي جۇرگىزىلدى دەپ ەسەپتەيمىن. بارلىق كوشە بۇرىشتارىنا كانديداتتارعا ارنالعان ءبىر ۇلگىدەگى ءتورتبۇرىشتى ۇگىت ستەندتەرى قويىلدى. ءباسپاسوز جانە تەلەحابارلاردان كانديداتتار تانىستىرىلدى. ءبىر سوزبەن ايتساق, بارلىق كانديداتتارعا بىردەي دارەجەدە ۇگىت-ناسيحات جۇرگىزۋىنە ەركىندىك, ولاردىڭ سەنىم بىلدىرگەن ادامدارىنىڭ جۇمىس ىستەۋىنە تولىق مۇمكىندىك بولدى.
ۇشىنشىدەن, مەن ەشبىر پارتيانىڭ مۇشەسى ەمەس, قاراپايىم ارداگەر رەتىندە پرەزيدەنتتىككە ۇمىتكەر قاسىم-جومارت كەمەلۇلى توقاەۆتىڭ سەنىمدى ادامى بولۋعا نيەت ءبىلدىرىپ, سايلاۋالدى ۇگىتتى جۇرگىزۋىم. بۇل ارەكەتىم ءوزىم سياقتى قوعامنىڭ تۇراقتىلىعى مەن جارقىن بولاشاعىن ويلايتىن 2,5 ميلليونداي زەينەتكەرلەردىڭ تىلەگىن بىلدىرۋدەن تۋعان ەدى. جەكە-دارا ءجۇرىپ, ساۋدا ورىندارىندا, شاعىن كاسىپكەرلەرمەن جانە ۇستازدار ۇجىمىمەن 30 شاقتى كەزدەسۋدى ۇيىمداستىردىم. ارينە, كەيبىر قالا تۇرعىندارى قاريا ادامنىڭ سايلاۋالدى ۇگىت جۇرگىزگەنىنە تاڭدانىس تا, كۇلە قاراعان جاعدايىن دا بايقادىم. بىراق وسى سايلاۋدىڭ اسا ماڭىزدى تاريحي ورنىن ەسكەرىپ, كەيبىر كەرىتارتپا پىكىرلەرگە قاراماي, وتان الدىنداعى بورىشتى وتەۋگە نيەت ءبىلدىردىم. ءاربىر كەزدەسۋدىڭ ناتيجەسىن, سايلاۋشىلاردىڭ كوكەيكەستى سۇراقتارىن, مۇڭ-مۇقتاجدارىن استانا قالاسىنىڭ قوعامدىق شتابىنىڭ اقپاراتتىق بولىمىنە جەتكىزىپ وتىردىم. ونداعى ماقساتىم – حالىقتىڭ اسا ماڭىزدى دەگەن ۇسىنىستارى بولاشاق پرەزيدەنتىمىزدىڭ نازارىنا جەتكىزۋ بولدى. سايلاۋشىلارمەن كەزدەسۋ بارىسىندا, ولاردىڭ باسىم كوپشىلىگى «ادىلەتتى قازاقستان», «ادىلەتتى مەملەكەت», «ادىلەتتى ەكونوميكا» جانە «ادىلەتتى قوعام» باعدارلامالارىن تولىعىمەن قولدايتىندارىن ايتتى.
ارينە, قوعامدىق سانا بىركەلكى ەمەس, بىرەن-ساران سايلاۋشىلار ەلدەگى جۇرگىزىلىپ جاتقان ساياسي-ەكونوميكالىق جانە الەۋمەتتىك رەفورمالاردىڭ باياۋ جۇرگىزىلىپ جاتقانىن ايتىپ, اسىرەسە بازارلار مەن دۇكەندەردەگى باعانىڭ وسۋىنە, ەڭبەكاقىنىڭ ءوسىرۋ, ينفلياتسياعا ساي ەمەستىگىنە رەنىش ءبىلدىردى.
سايلاۋالدى ۇگىت بارىسىندا سايلاۋشىلاردىڭ ساياسي بەلسەندىلىگىنىڭ ارتقانىن, ءوز ويلارىن اشىق ايتۋعا, ەلدە جۇرگىزىلىپ جاتقان «جاڭا قازاقستان» باعدارلاماسىمەن تانىس ەكەندىگىن, پرەزيدەنتتىككە ۇمىتكەر ق.ج.توقاەۆتى «ەلدىڭ بولاشاعىن سەنىپ تاپسىرۋعا بولاتىن تۇلعا» رەتىندە سەنەتىندىكتەرىن جانە تولىق قولدايتىنىن بايقادىم.
ينتەرنەت جۇيەسىن دە پايدالانىپ, فەيسبۋك پاراقشاسىندا جانە جەكە يۋتۋب ۆيدەوپاراقشالارىن پايدالانىپ, 50-دەن استام ۇگىت ماتەريالىن سالدىم.
تورتىنشىدەن, ءوزىمنىڭ سەنىم بىلدىرگەن ادام رەتىندە عانا ەمەس, سايلاۋشى رەتىندە داۋىس بەرۋگە بارعان جاۋتىكوۆ اتىنداعى فيزيكا-ماتەماتيكا اتىنداعى مەكتەپتە ورنالاسقان №368 سايلاۋ ۋچاسكەسىندە 20 قاراشا كۇنى تاڭعى ساعات 6.00 دەن تۇنگى ساعات 22.00-گە دەيىن باقىلاۋشى رەتىندە وتىردىم. جاس سايلاۋشىلارمەن بىرگە ەڭ العاشقىلاردىڭ قاتارىندا داۋسىمدى بەردىم, سايلاۋشىلاردىڭ بەلسەندىلىگىن بايقادىم. بىرنەشە «جاستار ءۇنى», «ستۋدەنتتەر اليانسى» تاعى باسقا دا ۇيىمدار مەن «Amanat» پارتياسىنىڭ اتىنان جانە تمد ەلدەرىنە باقىلاۋشىلار كەلىپ, سايلاۋدىڭ بەلسەندى ءوتىپ جاتقانىن ءوز كوزدەرىمەن كوردى. «ستۋدەنتتەر اليانسى», «ءادىل اتلاس» قوعامدىق ۇيىمىنىڭ باقىلاۋشىلارى, مەنىمەن بىرگە سايلاۋ قورىتىندىسى تولىق بەلگىلى بولعانشا, ساعات 22.00-گە دەيىن باقىلادىق, ونداعى ماقساتىمىز سايلاۋدىڭ تولىق ءادىل ءوتۋىن باقىلاۋ ەدى. شىن مانىندە سايلاۋ كوميسسياسى وڭكەي جاستاردان قۇرالسا دا, سايلاۋ زاڭدارىن تولىق ساقتاعاندارىنا ريزا بولدىق.
368-ءشى سايلاۋ ۋچاسكەسىندە كانديدات قاسىم-جومارت كەمەلۇلى توقاەۆقا سايلاۋشىلاردىڭ 85,3 پايىزدان استامى قولداپ داۋىس بەردى. باسقا كانديداتتارعا داۋىس بەرۋ 0,3 پايىزدان 1,8 پايىزعا دەيىن عانا بولدى. وپپوزيتسيالىق جسدپ پارتياسىنىڭ كانديداتى نۇرلان اۋەسباەۆقا 0,3 پايىز عانا جيناپ, قاراپايىم حالىق ولارعا سەنبەيتىندىكتەرىن كورسەتتى. حالىق بۇقاراسى ەلدەن تىسقارى جۇرگەن وپپوزيتسيا وكىلدەرى جانە ءوز ەلىمىزدەگى وپپوزيتسيا سەركەلەرىنىڭ ەلدەگى دەموكراتيالىق وزگەرىستەردىڭ باستاماسىن, ساياسي رەفورمالاردىڭ العاشقى جەمىسىن كورسە دە, كورمەيتىنىن تۇسىنە باستادى. مىناۋ الاساپىران جاھاندىق تۇراقسىزدىق جاعدايدا, بەيبىت ومىرىمىزگە زيان تيگىزەتىن ميتينگ نەمەسە بايكوت جاساۋعا قارسى ۇگىتىنەن شارشادى. سوندىقتان وپپوزيتسيادان ۇسىنىلعان ۇمىتكەر وتە تومەن داۋىس جينادى. بيىلعى جىلدىڭ سايلاۋ بيۋللەتەنىندەگى ءبىر ەرەكشەلىك «بارىنە قارسىمىن» دەگەن بەلگى ەنگىزىلگەن بولاتىن. بۇل بەلگىنىڭ بولۋى دەموكراتيانىڭ تاعى ءبىر كورىنىسى ەدى. ءبىزدىڭ سايلاۋ ۋچاسكەمىزدە «بارىنە قارسىمىن» دەپ سايلاۋشىلاردىڭ 6 پايىزى عانا بولدى.
بارشا قازاقستاندىقتاردىڭ 69,4 پايىزدان استامى سايلاۋعا قاتىسىپ, قاسىم-جومارت كەمەلۇلى توقاەۆقا 81,3 پايىز قۇرايتىن سايلاۋشىلار قولداپ, داۋىسىن بەردى. بۇل – ءبىزدىڭ قازاقستاندىقتاردىڭ «ادىلەتتى قازاقستان», «جاڭا قازاقستان» باعدارلاماسىن قولداپ, ەلىمىزدىڭ جارقىن بولاشاعى بولاتىنىنا سەنىم بىلدىرگەنى. دەموكراتيانى جەلەۋ ەتكەن, ءبىزدىڭ تاۋەلسىز ەلىمىزدىڭ ەركىن دامۋىنا كەدەرگى كەلتىرۋگە تىرىساتىن, كەيبىر سىرتقى قارسىلاستارىمىز ورتالىق سايلاۋ كوميسسياسىنىڭ بەرگەن مالىمەتتەرىنە كۇمان تۋدىرعىسى كەلەدى, بىراق تا شەتەلدەن كەلگەن, ءوز كوزىمەن سايلاۋدى باقىلاۋشىلار, كەزەكتەن تىس وتكەن پرەزيدەنتتىك سايلاۋدا سايلاۋشىلاردىڭ جوعارعى دەڭگەيدە بەلسەندىلىك تانىتقانىن, سايلاۋدىڭ زاڭ اياسىندا, حالىقارالىق ستاندارتقا ساي وتكەنىن باعالادى. بۇرىنعىداي سايلاۋشىلاردىڭ بەلسەندىلىگى 90 پايىزدان اسىپ, ۇمىتكەر 95-98 پايىز داۋىس جينايتىنداي سايلاۋدىڭ كەلمەسكە كەتكەنىن, شىنايى دەموكراتيانىڭ ادىلەتتى قازاقستاندا بولاتىنى دۇنيە جۇزىنە پاش ەتىلدى.
حالقىمىزدىڭ بىرلىگىن نىعايتىپ, پرەزيدەنتىمىز قاسىم-جومارت كەمەلۇلى توقاەۆتىڭ ماڭىنا بەرىك توپتاسا وتىرىپ, ءاربىر قازاقستاندىق كارى-جاسى بار ءوزىنىڭ جەكە باس ادال ەڭبەگىمەن, بىلىمىمەن «جاڭا قازاقستان» قۇرۋ جولىندا ۇلەسىن قوسۋ مىندەتى تۇر.
قاجىمۇرات ناسيۇلى, ارداگەر ۇستاز
