استانا قالاسى ءماسليحاتىنىڭ حاتشىسى ەرلان كاناليموۆ باستاعان ءماسليحات دەپۋتاتتارى ەلوردادا كۇردەلى جوندەۋ جۇمىستارى ءجۇرىپ جاتقان بىرقاتار ەمحانالاردى ارالادى.
دەپۋتاتتار, ەڭ الدىمەن, دەنساۋلىق ساقتاۋ قىزمەتكەرلەرىنە ارناپ ا 103 كوشەسىندە سالىنىپ جاتقان جاتاقحانا قۇرىلىسىمەن تانىستى. 9 قاباتتى جاتاقحانادان دارىگەرلەرگە 303 پاتەر بەرىلمەك. ولاردىڭ 158-ءى – ءبىر بولمەلى, 145-ءى – 2 بولمەلى پاتەر. بۇدان سوڭ ولار №8 قالالىق ەمحاناعا بارىپ, عيماراتتى كۇردەلى جوندەۋ جۇمىستارى قالاي ءجۇرىپ جاتقانىن كوردى. جوسپار بويىنشا مۇنداعى جوندەۋ جۇمىستارى جەلتوقسان ايىندا اياقتالۋى ءتيىس. ەمحانانىڭ ەرەسەكتەر كورپۋسىنىڭ عيماراتى 2007 جىلى سالىنىپ, پايدالانۋعا بەرىلگەن بولاتىن. عيمارات – ءتورت قاباتتى, پ ءپىشىنى تارىزدەس. ونىڭ جالپى اۋدانى – 3995,9 شارشى مەتر, ال عيمارات ۋچاسكەسىنىڭ اۋدانى 1,023 گا-نى قۇرايدى. ساراپتاما قورىتىندىسى كورسەتكەندەي, 2021 جىلى عيماراتتىڭ توزۋ كوەففيتسيەنتى 1%-دى قۇراعان. ەمحانادا جەلدەتۋ, اۋانى باپتاۋ, ەلەكتر جارىعى, بەينەباقىلاۋ جانە اۆتوماتتى ءورت دابىلى جۇيەلەرىن اۋىستىرۋ ۇسىنىلدى. قازىرگى ۋاقىتتا عيماراتتىڭ شاتىرى مەن كىرەبەرىستەرىندەگى جۇمىستار تولىعىمەن اياقتالدى. قاسبەتى, تەرەزەلەرى, ۆيتراجدارى, كارىزدەرى, ستياجكالارى بويىنشا جانە اباتتاندىرۋ جۇمىستارى اياقتالدى. جەلدەتۋ جانە اۋانى باپتاۋ, ىشكى ارلەۋ, ەلەكتر مونتاجداۋ جۇمىستارى جۇرگىزىلۋدە.
سودان كەيىن دەپۋتاتتار مەن ءماسليحات حاتشىسى №1 قالالىق ەمحاناعا بارىپ, عيماراتتى رەكونسترۋكتسيالاۋ جۇمىستارىنىڭ ورىندالۋ بارىسىمەن تانىستى. «ەلوردانىڭ دەنساۋلىق ساقتاۋ جۇيەسىن دامىتۋدىڭ 2021-2025 جىلدارعا ارنالعان كەشەندى جوسپارى» اياسىندا جوندەۋ جۇمىستارى مەن قاجەتتى زاماناۋي قۇرال-جابدىقتاردى ساتىپ الۋعا ءماسليحات قاراجات ءبولۋدى قولداعان ەدى. بۇل حالىققا كورسەتىلەتىن مەديتسينالىق قىزمەتتەردىڭ كولەمى مەن ساپاسىنا تىكەلەي اسەر ەتەتىنى ءسوزسىز. كەلەر جىلدىڭ سوڭىنا دەيىن ەلورداداعى 10 مەديتسينالىق مەكەمەدە كۇردەلى جوندەۋ جۇمىستارى اياقتالادى.
