استانا قالاسىنداعى اقسەلەۋ سەيدىمبەك اتىنداعى №54 مەكتەپ-ليتسەيدە «قاراشاڭىراق» ۇلتتىق تاربيە بەرۋ مەكتەبىنىڭ مۇرىندىق بولۋىمەن, سونداي-اق استانا قالاسىنىڭ تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن ۇلت ۇستازى احمەت بايتۇرسىنۇلىنىڭ 150-جىلدىعىنا وراي ەلوردا مەكتەپ وقۋشىلارى اراسىندا «ەل – بۇگىنشىل, مەنىكى ەرتەڭ ءۇشىن» اتتى شىعارماشىلىق سايىسى وتكىزىلدى.
سايىس قازاق ءتىل ءبىلىمىنىڭ ىرگەتاسىن قالاۋشى عالىم, ۇلى ۇستاز, ءسوز قۇدىرەتىن تانىتقان ايتۋلى اقىن, قازاق ءباسپاسوز ءتىلىنىڭ ۇلتتىق ۇلگىسىن كورسەتكەن تالانتتى پۋبليتسيست, شەبەر اۋدارماشى, تۋعان حالقىنىڭ رۋحانياتىنا كوپ ەڭبەگى سىڭگەن الاش ارداقتىسى احمەت بايتۇرسىنۇلىنىڭ اعارتۋشىلىق باعىتتاعى مۇرالارىن ناسيحاتتاۋ, جاستاردى وتانسۇيگىشتىككە, انا ءتىلىن, ۇلتتىق قۇندىلىعىن قۇرمەتتەۋگە تاربيەلەۋدى ماقسات ەتتى.
ايتا كەتەيىك, اتالمىش شىعارماشىلىق سايىستىڭ باستى ەرەكشەلىگى – ەلوردانىڭ اكتەرلىك شەبەرلىگى بار دارىندى مەكتەپ وقۋشىلارى ۇلت ۇستازىنىڭ ءومىرى مەن شىعارماشىلىعىنان تەاترلاندىرىلعان قويىلىم كورسەتىپ, باق سىنادى. سايىسقا استانا قالاسىنىڭ جالپى ءبىلىم بەرەتىن ورتا جانە زياتكەرلىك مەكتەپتەردىڭ, ليتسەيلەردىڭ, گيمنازيالاردىڭ 6-10 سىنىپ وقۋشىلارى قاتىستى.
«ۇلتقا قىزمەت – ءار قازاق بالاسىنا مىندەت» اتتى ساحنالىق قويىلىمىنا 100-گە جۋىق تالانتتار جينالىپ, ا.بايتۇرسىنۇلىنىڭ شىعارمالارىنان (مىسال (اۋدارما), ماقالا, پۋبليتسيستىك تۋىندى, ولەڭ) ءبىر تۋىندىنى تاڭداپ, قويىلىم قويدى. قويىلىمدار ا.بايتۇرسىنۇلىنىڭ ومىرلىك ماقساتىن, ۇستانىمىن, كوزقاراسىن, سىڭىرگەن ەڭبەگىن اشىپ كورسەتۋگە باعىتتالدى. قازىلار القاسى تاقىرىپتىڭ وزەكتىلىگى, اكتەرلىك شەبەرلىك, ساحنالىق وبراز, ديكتسيا, ت.س.س. كريتەريلەر بويىنشا جاس تالانتتاردى باعالادى.
«ۇلت ۇستازىنا حات» دەپ اتالاتىن سايىسقا قاتىسۋشى وقۋشىلار 1-بولىمدەگى كوتەرىلگەن جايتتىڭ ماڭىزى مەن بۇگىنگى زامانداعى كورىنىسى تۋرالى مونولوگ تولعانىس حاتىن وقىدى. ۇلت ۇستازىنا ارنالعان حاتتا وقۋشىلار پروبلەمانىڭ ءتۇيىنىن, وزەكتىلىگىن ايتا وتىرىپ, تاۋەلسىز ەلدە تۇرىپ جاتقان بۇگىنگى ۇرپاعى رەتىندە بولاشاققا قاتىستى ءوز ۇستانىمىن, ۇسىنىسىن, جوسپارىن جەتكىزدى. قازىلار القاسى مونولوگتى كرەاتيۆ, الدىڭعى قويىلىممەن بايلانىستىلىعى, ۇسىنىستىڭ وزەكتىلىگى بويىنشا ءوز باعاسىن بەردى.
شىعارماشىلىق سايىس سوڭىندا قازىلار القاسى جەڭىمپازداردى انىقتاپ, جۇلدەگەرلەر باعالى سىيلىقپەن, ديپلومدارمەن جانە العىسحاتتارمەن ماراپاتتادى.
