– 20-21 مامىردا قىتايدىڭ شانحاي قالاسىندا وتكەن ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ ءتورتىنشى ءسامميتىنىڭ وزىندىك ەرەكشەلىكتەرى بار, – دەدى قر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە قر سىرتقى ىستەر ءمينيسترىنىڭ ورىنباسارى ەرجان اشىقباەۆ.
اتاپ ايتقاندا, ەڭ الدىمەن سامميتكە 47 مەملەكەت پەن حالىقارالىق ۇيىمنىڭ وكىلدەرى, سونىڭ ىشىندە العاش رەت ازيا كەڭەسىنىڭ جۇمىسىنا بۇۇ-نىڭ باس حاتشىسى پان گي مۋن قاتىستى. جاڭا ەكى مەملەكەت – قاتار مەن بانگلادەش تولىققاندى مۇشە رەتىندە قوسىلىپ, فورۋمنىڭ قاتىسۋشى مەملەكەتتەرىنىڭ سانىن 26 مەملەكەتكە دەيىن جەتكىزدى. 6 مەملەكەت پەن 4 حالىقارالىق ۇيىم بايقاۋشى رەتىندە جۇمىس ىستەپ وتىر.
ونىڭ ايتۋىنشا, توراعالىقتىڭ ازيانىڭ باتىسىنداعى مەملەكەتتەن شىعىسىنداعى الپاۋىت ەلگە ءوتۋى بۇل فورۋمنىڭ پانازيالىق سيپاتقا يە بولعانىنىڭ دالەلى بولىپ وتىر.
تاعى ءبىر ماڭىزدىلىعى – ەلباسى نۇرسۇلتان نازارباەۆتىڭ فورۋمدى ازياداعى قاۋىپسىزدىك پەن دامۋ ۇيىمى رەتىندە قايتا قۇرۋ نەمەسە وركەندەتۋ ۇسىنىسى بولىپ وتىر. بۇل, ارينە, ازيا كەڭەسىنىڭ دامۋىنداعى ەرەكشە كەزەڭ بولماق. وسى كەزەڭدە قىتاي حالىق رەسپۋبليكاسىنىڭ توراعالىعىنا ۇلكەن ءۇمىت جۇكتەلەتىن بولادى.
«ۇيىمنىڭ ازياداعى ۇلەسىنە كەلەتىن بولساق, اۋماق جاعىنان قۇرىلىقتىڭ 90 پايىزعا جۋىعى حالىق جاعىنان دۇنيەجۇزىنىڭ جارتىسى بولاتىن مەملەكەتتەردى بىرىكتىرىپ وتىر. ايتا كەتەرلىك جايت, فورۋمنىڭ توراعالىعى تۇركيادان قىتايعا ءوتتى. بۇل دا ماڭىزدى ءۇردىس», – دەپ ءتۇيدى ءسوزىن سىرتقى ىستەر ءمينيسترىنىڭ ورىنباسارى.
