تاۋەلسىزدىك كۇنى مەرەكەسى اياسىندا م.وتەمىسۇلى اتىنداعى وقۋشىلار سارايىندا ەلوردا مەكتەپتەرىنىڭ اراسىنداعى اكەلەر مەن جاسوسپىرىمدەر بويىنشا «راقمەت ساعان, تۋعان ەل» اتتى پاتريوتتىق اندەردىڭ قالالىق ۆوكالدىق بايقاۋىنىڭ سالتاناتتى ماراپاتتاۋ ءراسىمى ءوتتى.
مەرەكەلىك باعدارلامانىڭ ءبىرىنشى بولىمىندە قالا اكىمىنىڭ ورىنباسارى باقتيار ماكەن ءبىلىم مەكەمەلەرىن ءارى الەۋمەتتىك بەلسەندىلىگىمەن ەرەكشەلەنگەن پەداگوگتاردى ماراپاتتادى. «ەلىمىز تاۋەلسىزدىككە قول جەتكىزگەن ەلەڭ-الاڭ كەزەڭنەن باستاپ ەلباسىمىز حالقىنىڭ داۋلەتىن اسىردى, ساۋلەتىن تاسىتتى. ەلىمىزدىڭ پرەزيدەنتى قاسىم-جومارت توقاەۆ ءبىلىم بەرۋ جۇيەسىن دامىتۋدىڭ ۇلكەن مىندەتىن قويىپ وتىر. جاقىندا سەناتقا «پەداگوگ مارتەبەسى تۋرالى» زاڭ كەلىپ ءتۇستى. ول ءبىزدىڭ پەداگوگتارىمىزدىڭ رەيتينگى مەن مارتەبەسىن كوتەرۋگە مۇمكىندىك بەرەدى. ويتكەنى مۇعالىمنىڭ قۇرمەتى – بۇل ۇلكەن قۇرمەت. بۇل ماراپاتتار – مەملەكەتىمىزدەن بەرىلىپ جاتقان باعالاۋ. بارشاڭىزدىڭ ەڭبەكتەرىڭىزگە جەمىس تىلەيمىن» دەدى ب.ماكەن. سونىمەن قاتار, «ەكو چەللەندج» رەسپۋبليكالىق جوباسىنىڭ قورىتىندىسى بويىنشا ەلوردالىق ءبىلىم بەرۋ ۇيىمدارىنىڭ 14 باسشىسىن الەۋمەتتىك ماڭىزى بار باستامالاردى دامىتۋ قورىنىڭ توراعاسى ەرمەك ماجيتوۆتىڭ قولىنان ماراپاتتالدى. بۇل جوبا ەلوردانىڭ بارلىق مەكتەپتەرىندە جۇزەگە اسىرىلدى.
ەكىنشى بولىمدە ەلوردانىڭ 87 ءبىلىم بەرۋ ۇيىمدارىنىڭ ىشىنەن فينالعا اكەلەر مەن جاسوسپىرىمدەردەن 26 ۇجىمى شىقتى. سالتاناتتى ماراپاتتاۋ راسىمىندە ەلوردا اكەلەرى مەن جاسوسپىرىمدەردىڭ ۇزدىك انسامبلدەرى ونەر كورسەتتى. «راقمەت ساعان, تۋعان ەل» اتتى ءى قالالىق ۆوكالدىق پاتريوتتىق بايقاۋىنىڭ ناتيجەسى بويىنشا باس جۇلدەنى №81 «Astana English School» گيمنازياسى ۆوكالدىق ۇجىمى, 1-ورىندى №72 مەكتەپ-ليتسەيى جانە №80 مەكتەپ-گيمنازياسى, 2-ورىندى №43 ورتا مەكتەپ جانە №54 مەكتەپ-ليتسەيى ۆوكالدىق ۇجىمى, №3 ورىندى №22, №86, №77, №66 مەكتەپ-ليتسەيى ۆوكالدىق ۇجىمدارى يەلەندى.
