استانا قالاسىنىڭ باسشىلىعى ەلىمىزدەگى بىرىككەن اراب امىرلىكتەرىنىڭ توتەنشە جانە وكىلەتتى ەلشىسى جانە «Arabtec Holding PJSC» كومپانياسىنىڭ باسشىلىعىمەن كەزدەستى. بۇل وتىرىس جاقىندا عانا «ابۋ-دابي پلازا» قۇرىلىس الاڭىنداعى باقىلاۋ-وتكىزۋ پۋنكتىندە ورىن العان جاعدايعا قاتىستى بولدى.
«Arabtec Holding PJSC» كومپانياسىنىڭ باسشىلىعى الداعى كۇندەرى 61 شەتەلدىك جۇمىسشىنىڭ, دالىرەك ايتقاندا, ءۇندىستان ازاماتتارىنىڭ «ابۋ-دابي پلازا» قۇرىلىس الاڭىندا ءتارتىپ پەن قوعامدىق جاعدايدى بۇزعانى ءۇشىن ەلدەن كەتەتىنىن مالىمدەدى.
كەزدەسۋ بارىسىندا مۇنداي جاعدايدىڭ قايتالانباۋى ەسكەرتىلىپ, شەتەلدىكتەردەن قازاقستان رەسپۋبليكاسىنىڭ زاڭىنا باعىنىپ, مورالدىق-ادەپ ءتارتىبى نورمالارىن ساقتاۋدى, سونداي-اق, قازاقستان حالقىنىڭ سالتىنا سىيلاستىقپەن قاراۋ تالاپ ەتىلدى.
«Arabtec Holding PJSC» كومپانياسىنىڭ باسشىلىعى «ابۋ-دابي پلازا» كەشەنىنىڭ قۇرىلىسى اياقتالعان سوڭ, قازاقستان ازاماتتارى ءۇشىن 2 مىڭ جاڭا تۇراقتى جۇمىس ورنى قۇرىلاتىنىن حابارلادى. تاراپتار «ابۋ-دابي پلازا» نىسانىندا جۇمىسقا يە بولا الاتىن جەرگىلىكتى كادردى دايارلاۋ بويىنشا ارنايى باعدارلاما ازىرلەۋ جونىندە كەلىسىمگە كەلدى. «ابۋ-دابي پلازا» كەشەنىنىڭ جوباسىن ىسكە اسىرۋعا 17 مىڭنان استام قازاقستاندىق قاتىستى, ولاردىڭ 9,5 مىڭى بىلىكتىلىگى جوعارى قىزمەتكەرلەر – ينجەنەرلەر, مۇنارالى كران وپەراتورلارى, قاۋىپسىزدىك تەحنيكاسى بويىنشا ماماندار. قازىرگى ۋاقىتتا قۇرىلىسقا 3,5 مىڭ قازاقستاندىق ازامات تارتىلعان. جوبانىڭ ىسكە اسۋىنا 267 كومپانيا مەن اقش, كانادا, ۇلىبريتانيا, فرانتسيا, يسپانيا, يرلانديا, رەسەي, ۋكراينا سىندى 43 ەلدىڭ ازاماتتارى قاتىسۋدا.
