Covid-19 ىندەتىنەن قۇتىلىپ, ەندى قوڭىر كۇزدەگى ەكىنشىسىن قارسى الۋعا دايىندالۋدامىز. الدا تاعى نە بولىپ كەتەر دەگەن ۇرەي دە, ءبىرىنشىسىن جەڭسەك, كەلەسىسىن دە وتكەرەرمىز دەگەن ءۇمىت تە جوق ەمەس. جانعا باتاتىنى, جاڭا تولقىننىڭ بالالارعا تيەتىنى دەگەن سىبىستىڭ كوبەيە تۇسكەنى. حالىقتىڭ دايىندىعى ىشتەي مورالدىق جانە ۇل مەن قىزدىڭ يممۋندىق جۇيەسىن جاقسارتۋمەن بايلانىستى بولىپ تۇر. بۇل رەتتە بۇرىنعىدان ساباق العان دەنساۋلىق ساقتاۋ مينيسترلىگىنىڭ ازىرلىگى قالاي؟ 
سونىمەن مينيسترلىك تاراپىنان قازان ايىنا تامان 13 مودۋلدىق ينفەكتسيالىق ستاتسيونار سالۋ جوسپارلانۋدا دەگەن اقپارات ايتىلدى. ءدارى جەتىسپەۋشىلىگىنە قاتىستى داۋ تۋماۋىنا ەلدەگى دارىحانالارعا 10 ميليوننان اسا پرەپاراتتار جيىنتىعىنىڭ قويىلۋى سەپتىك ەتەدى دەلىنۋدە. بىرىڭعاي ديستريبيۋتور ەلىمىزدىڭ مەديتسينالىق ۇيىمدارىن ايلىق ءدارى قورىمەن قامتاماسىز ەتىپتى. سك-فارماتسيا قورى بازاسىندا جانە وڭىرلەردە 11 تۇراقتاندىرۋ قورى قۇرىلعان. اۋرۋحانالاردى تولىق جاراقتاندىرىپ بولۋ ءۇشىن 2578 جاساندى وكپەمەن دەمالۋ اپپاراتتارى ساتىپ الىنباق. سوعان قوسا 23890 كەرەۋەت وتتەگىمەن قامتاماسىز ەتىلمەك. قازان ايىنا دەيىن ەلدەگى بارلىق اۋداندىق اۋرۋحانالاردى 100 پايىز تسيفرلى رەنتگەن اپپاراتتارىمەن قامتۋ كوزدەلىپ وتىر. ۆەدومستۆوارالىق كوميسسيا شەشىمىمەن ەلوردادا, الماتى مەن شىمكەنت قالالارىندا 2,7 مىڭ ورىندىق 13 ينفەكتسيالىق اۋرۋحانا سالىنباق.
ماسكا تاعۋ – پايدالى داعدى ما؟
بۇگىندە مىندەتتى ماسكا رەجيمىن ساقتاۋ – جاڭا دەرتتىڭ تارالۋ قارقىنىن تومەندەتۋدەگى قوسىمشا فاكتورعا اينالدى. ونى تاققان كەزدە حالىق اراسىندا ينفەكتسيانىڭ تارالۋى ازايادى. سانيتارلىق تالاپتاردى كۇشەيتۋدىڭ ارقاسىندا سوڭعى 4 اپتادا بارلىق وڭىردە حالىقتىڭ اۋرۋعا شالدىعۋ دەڭگەيى ايتارلىقتاي تومەندەگەنى راس. سوندىقتان قر دسم ءمينيسترى الەكسەي تسوي «ماسكا تاعۋ قوعامدا پايدالى داعدىعا اينالۋى ءتيىس» دەدى وتكەن بريفينگتە. ال ونى كىمدەردىڭ تاقپاۋىنا بولادى؟
– 5 جاسقا دەيىنگى بالالارعا, الەۋمەتتىك اراقاشىقتىق ساقتالعان جاعدايدا 5 ادامعا دەيىن سپورتپەن توپتىق جانە جەكە اينالىسقان ادامدارعا, دەنساۋلىعىنا بايلانىستى تاعا المايتىن تۇلعالارعا, سونىمەن قاتار دالاداعى قوعامدىق تاماقتانۋ ورىندارىندا الەۋمەتتىك قاشىقتىق ساقتالعان جاعدايدا ماسكا تاقپاۋعا بولادى, – دەدى مينيستر.
فرانتسيا 1 قىركۇيەكتەن باستاپ جابىق مەكەمەدەگى جۇمىس ورىندارىندا 1 ادامنان ارتىق ادام وتىرسا قىزمەتكەرلەردى ماسكا تاعۋعا مىندەتتەۋدە. ازىرگە بىزدەگى تالاپ – تەك قوعامدىق ورىندارداعى شەكتەۋ عانا بولىپ تۇر. سوندىقتان مۇنىڭ ءوزى ەلدەگى ەپيدەميولوگيالىق احۋالدىڭ جاقسارعانىن كورسەتەدى. باستاپقىدا تۋىنداعان ماسكا تاپشىلىعى ەندى بولماۋعا ءتيىس. سەبەبى قازىر قازاقستاننىڭ ىشكى نارىعى وتاندىق ماسكامەن 100 پايىز قامتاماسىز ەتكەنىن قر يندۋستريا جانە ينفراقۇرىلىمدىق دامۋ مينيسترلىگى مالىمدەدى.
اقۋىزى كوپ تاعامدارعا ءمان بەرىڭىز
ماماندار كوروناۆيرۋس تاقىرىبى وزەكتى بولىپ تۇرعان قازىرگى كەزەڭدە يممۋنيتەتتى كوتەرۋ ماسەلەسىنە ەرەكشە ءمان بەرۋ كەرەكتىگىن ايتادى. اسىرەسە, اقۋىزى كوپ تاعامدارعا ءمان بەرگەن ءجون.
ولارعا تاۋىق, بالىق, ءىرى قارا, سونىڭ ىشىندە جىلقى ەتى جاتادى. سولاردىڭ سورپاسىنىڭ قۇرامىندا اقۋىز كوپ. سونىمەن قاتار ءتۇرلى جاڭعاقتاردى دا جەگەن پايدالى. يممۋنيتەتتى كوتەرۋ ءۇشىن 30-40 پايىزىن اقۋىزدان, قالعان 50-60 پايىزىن كوكونىستەر مەن جەمىس-جيدەكتەر ارقىلى قامتىعان دۇرىس بولادى. كۇزدە الما, المۇرت, بانان, قۇلپىناي, قاراقات, تاڭقۋراي, يتمۇرىندى كوبىرەك العان ابزال. بۇلار تابيعي ءونىم بولعاندىقتان س ۆيتامينىنە باي. سوعان قوسا سۇيىقتىقتى كوپ ىشەمىز. كۇنىنە 3-5 ليترگە دەيىن سۋ, كومپوت, مورس ىشۋگە بولادى. بۇعان قوسا كوتەرىڭكى كوڭىل-كۇي دە اۋىرىپ قالماۋعا كوپ سەپتىگىن تيگىزەدى. كۇيزەلىسكە تۇسپەگەن ءجون. كوڭىل-كۇي جاقسى بولىپ, جىگەرلەنىپ جۇرسەك, يممۋنيتەت جاقسى كوتەرىلەدى, – دەيدى استانا مەديتسينا ۋنيۆەرسيتەتى پروفيلاكتيكالىق مەديتسينا جانە نۋتريتسيولوگيا كافەدراسىنىڭ دوتسەنتى روزا سۇلەيمەنوۆا.
