پرەمەر-ءمينيستردىڭ ورىنباسارى ەرالى توعجانوۆتىڭ توراعالىعىمەن ەل اۋماعىندا COVID-19 ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ (ۆاك) وتىرىسى ءوتتى. دەنساۋلىق ساقتاۋ ءمينيسترى الەكسەي تسوي ەلدەگى سانيتاريالىق-ەپيدەميولوگيالىق جاعداي تۋرالى بايانداما جاسادى. سوڭعى ەكى اپتادا كوروناۆيرۋسقا شالدىعۋ دەڭگەيى 30%-عا, ءولىم-ءجىتىم 40%-عا تومەندەدى.
ۆاك وتىرىسىندا مىناداي بىرقاتار ماڭىزدى شەشىم قابىلداندى: COVID-19-عا قارسى ۇجىمدىق يممۋنيتەتتى قالىپتاستىرۋ ماقساتىندا ەكپە سالۋعا جاتاتىن كونتينگەنت 9,9 ملن-نان 11,4 ملن ادامعا دەيىن ۇلعايتىلدى, بۇل ددسۇ ۇسىنىمدارىنا سايكەس ۇجىمدىق يممۋنيتەتكە 60% دەڭگەيىندە قول جەتكىزۋگە مۇمكىندىك بەرەدى; حالىقتى قايتا ۆاكتسيناتسيالاۋدى بيىل قاراشانىڭ ءۇشىنشى ونكۇندىگىنەن مىناداي ساناتتاعى ادامدار ءۇشىن باستاۋ جوسپارلانىپ وتىر: تاۋەكەل توپتارى (مەديتسينا قىزمەتكەرلەرى, پەداگوگتەر, مەديتسينالىق-الەۋمەتتىك مەكەمەلەر مەن جابىق مەكەمەلەردىڭ پەرسونالى مەن كونتينگەنتى, كۇش قۇرىلىمدارىنىڭ قىزمەتكەرلەرى); 60 جاستان اسقان ادامدار; وزدىگىنەن زەرتتەۋلەردەن وتكەن جانە ىندەتكە قارسى انتيدەنەلەرگە تەرىس تەست ناتيجەسى بار ادامدار.
سونداي-اق «Ashyq» جوباسىنا قاتىساتىن كاسىپكەرلىك نىساندارىنىڭ جۇمىس ۋاقىتى: «جاسىل» ايماقتا – ساعات 03:00-گە دەيىن, «Ashyq» جوباسىنىڭ كوشباسشىلارى ءۇشىن – ساعات 05:00-گە دەيىن; «سارى» ايماقتا – ساعات 01:00-گە دەيىن, «Ashyq» جوباسىنىڭ كوشباسشىلارى ءۇشىن – ساعات 03:00-گە دەيىن ۇزارتىلدى. ءۇندىستان جانە فيليپپينمەن ءوزارا ۆاكتسينالاۋ تولقۇجاتىن تانۋ ىسكە اسىرىلدى, ناتيجەسىندە قازاقستان رەسپۋبليكاسى 15 ەلمەن ۆاكتسينالاۋ پاسپورتىن تانۋ تۋرالى كەلىسىمگە قول جەتكىزدى (تۇركيا, ۆەنگريا, گرۋزيا, قىرعىزستان, مولدوۆا رەسپۋبليكاسى, موڭعوليا, تايلاند, بەلارۋس رەسپۋبليكاسى, ارمەنيا, يران, سان-مارينو, ارگەنتينا, ەستونيا, ءۇندىستان مەن فيليپپين). كارانتيندىك شەكتەۋلەر كەزەڭىندە قازاقستان رەسپۋبليكاسىنىڭ مەملەكەتتىك شەكاراسىن كەسىپ ءوتۋ تارتىبىنە ەل اۋماعىنا ەركىن كىرۋ (ۆاك شەشىمىنسىز) بولىگىندە وزگەرىستەر ەنگىزىلدى: تۋىستىق فاكتىسىن راستاي وتىرىپ, قر ازاماتتارىنىڭ تۋىستارى بولىپ تابىلاتىن شەتەلدىكتەرگە; قر ازاماتتارىنىڭ وتباسى مۇشەلەرى بولىپ تابىلاتىن شەتەلدىكتەرگە اۋىر ناۋقاستانعاندارعا كۇتىم جاساۋ ءۇشىن, ولاردىڭ ىلەسىپ جۇرەتىن جۇبايلارى مەن كامەلەتكە تولماعان بالالارىنا, سونداي-اق جەرلەۋ راسىمىنە كەلگەندەرگە رۇقسات ەتىلەدى. ۆەدومستۆوارالىق كوميسسيانىڭ وتىرىسىن قورىتىندىلاي كەلە, ەرالى توعجانوۆ بىرقاتار ناقتى تاپسىرما بەرىپ, ۆاك قاتىسۋشىلارىنىڭ الدىندا تاياۋ ۋاقىتتاعى باسىم مىندەتتەردى بەلگىلەدى.
