ەل استاناسىندا جامبىل جاباەۆتىڭ 175 جىلدىق مەرەيتويى اياسىندا جارىق كورگەن 10 تومدىق جيناقتىڭ تۇساۋكەسەر ءراسىمى ءوتتى. ءىس-شاراعا مەملەكەتتىك حاتشى قىرىمبەك كوشەرباەۆ, مادەنيەت جانە سپورت مينيسترى اقتوتى رايىمقۇلوۆا, دەپۋتاتتار مەن قوعام قايراتكەرلەرى, زيالى قاۋىم وكىلدەرى قاتىستى.
جيىن باسىندا جاڭا جيناقتىڭ ادەبي-رۋحاني ماڭىزىنا توقتالعان مەملەكەتتىك حاتشى: «ۇلى جىراۋدىڭ سوڭىندا قالعان سوقتالى شىعارمالارىن ۇلتتىڭ يگىلىگىنە جاراتىپ, كەلەر ۇرپاققا جەتكىزۋ – ءبىز ءۇشىن ۇلاعاتتى پارىز, اسىل امانات. مەرەيتوي جىلى اقىن شىعارمالارىن ناسيحاتتاپ, حالىققا جەتكىزۋدە رەسپۋبليكا كولەمىندە كوپتەگەن مادەني ءىس-شارالار جۇزەگە اسىرىلۋدا. سولاردىڭ ءبىرى مەملەكەتتىك كوميسسيا قابىلداعان شەشىمنىڭ اياسىندا جارىق كورگەن وسى كوپتومدىقتار دەر ەدىم» دەدى.
10 تومدىققا جامبىل جاباەۆتىڭ وتكەن عاسىردىڭ باسىنان باستاپ دۇنيە سالعانعا دەيىنگى ولەڭدەرى مەن ايتىستارى, جىرلارى توپتاستىرىلدى. سونداي-اق اقىن شىعارماشىلىعىنا قاتىستى عالىمداردىڭ عىلىمي زەرتتەۋلەرى, كورنەكتى اقىن-جازۋشىلاردىڭ ەستەلىكتەرى ەنگەن. ايتا كەتەيىك, ون تومدىقتى قۇراستىرعان – جامبىلتانۋشى ناعاشىبەك قاپالبەكۇلى.
مەملەكەتتىك تاپسىرىسپەن 30 مىڭ دانامەن شىققان بۇل جيناق رەسپۋبليكانىڭ كىتاپحانالارىنا تاراتىلادى. بۇل تۋرالى ايتقان مادەنيەت جانە سپورت ءمينيسترى اقتوتى رايىمقۇلوۆا اقىن مەرەيتويى قارساڭىنداعى جوبالاردى اتاپ ءوتتى.
«بيىل مامىر ايىندا بەلارۋس, ازەربايجان ەلدەرىندە «جامبىل» كوركەم ءفيلمىنىڭ كورسەتىلىمى ءوتتى. ماۋسىم ايىندا كانادادا «جامبىل تويى – جىر تويى» اتتى دەرەكتى فيلم كورسەتىلدى. سونداي-اق ەلىمىزدە جامبىل جىلى جاريالانۋىنا بايلانىستى حالىقارالىق قازاق-قىرعىز ايتىسى ءوتىپ, ەل اتىنان قاتىسقان 8 اقىننىڭ ىشىندە ايبەك قاليەۆ باس جۇلدەگە يە بولدى» دەگەن مينيستر اقىننىڭ تاڭدامالى شىعارمالارى قىرعىز تىلىنە اۋدارىلعانىن, اقىن شىعارماشىلىعىن عىلىمي زەرتتەۋ باعىتىندا «جىر الىبى» جانە «اقىن جامبىل جاباەۆتىڭ شىعارماشىلىعى تاريح ايناسىندا» اتتى عىلىمي-پراكتيكالىق دوڭگەلەك ۇستەل ۇيىمداستىرىلىپ, «جامبىلعا جاڭاشا كوزقاراس» اتتى ماقالالار جيناعى شىعارىلعانىن ايتتى.
