قالا اكىمى التاي كولگىنوۆ قالالىق ءماسليحاتتىڭ كەزەكتەن تىس XIII سەسسياسىنا قاتىسىپ, دەپۋتاتتارعا ەلوردانىڭ الەۋمەتتىك-ەكونوميكالىق دامۋ بارىسى جونىندە ەسەپ بەردى. ءوز ەسەبىندە شاھار باسشىسى اتقارىلعان جۇمىستار, الداعى جوسپار, وزەكتى ماسەلەلەردى شەشۋدىڭ جاي-جاپسارىنا توقتالدى.
– ەلوردا الماتىدان اقمولاعا كوشىرىلگەن العاشقى جىلداردان بەرى اكىمشىلىك-ىسكەرلىكتىڭ ورداسى بولۋىمەن بىرگە كاسىپكەرلىكتىڭ دە قالاسى رەتىندە قالىپتاسىپ كەلەدى. ماسەلەن, قالانىڭ بيىلعى رەسپۋبليكالىق بيۋدجەتكە جاسايتىن ءتۇسىمى 1 تريلليون 211 ميلليارد تەڭگە كولەمىندە بولادى دەپ بولجانىپ وتىر. 2007 جىلى بۇل كورسەتكىشتىڭ 134,7 ميلليارد تەڭگە بولعانىن ەسەپكە الساق, قالانىڭ ەكونوميكالىق كورسەتكىشتەرىنىڭ دامۋ قارقىنىن اڭعارۋ قيىن ەمەس.
ەكونوميكالىق كورسەتكىشتەردىڭ ارتۋى قالاداعى بىرقاتار وزەكتى الەۋمەتتىك ماسەلەلەردى شەشۋگە دە نەگىز بولدى. ماسەلەن, وتكەن جىلى قالادا 8 ءۇش اۋىسىمدى مەكتەپ بولسا, بيىل ولاردىڭ سانى ەكى ەسە تومەندەدى. ال وقۋشىلاردىڭ سانى مەكتەپتىڭ سىيىمدىلىعىنان ەداۋىر ارتقان مەكتەپتەردىڭ سانى 22-دەن 14-كە دەيىن ازايدى.
كوروناۆيرۋستىق ينفەكتسيانىڭ تارالۋى بىزگە ۇلكەن ساباق بولدى. سوندىقتان قالاعا تاعى ينفەكتسيالىق ستاتسيونار سالۋ قاجەتتىلىگى تۋىنداپ وتىر.
قالا تۇرعىندارىنا ءومىر سۇرۋگە قولايلى ورتا جاساۋدىڭ بارلىق تەتىكتەرى قاراستىرىلعان «نۇر-سۇلتان – جايلى قالا» شەبەر جوسپارى بەكىتىلدى. جوسپار قالا تۇرعىندارىنىڭ نەگىزگى قاجەتتىلىكتەرىمەن بىرگە شاھاردىڭ شىرايىن كەلتىرەتىن جوبالاردى دا قامتيدى, – دەدى التاي سەيدىرۇلى.
شاھار باسشىسى قالامەن بىرگە قالا ماڭىنداعى تۇرعىن الاپتاردىڭ نازاردان تىس قالمايتىنىن جەتكىزدى. جىل باسىنان قالاداعى تۇرعىن الاپتاردا جالپى ۇزىندىعى 40 شاقىرىم بولاتىن 78 كوشەگە اسفالت توسەلدى. 6 قوعامدىق كەڭىستىك سالىنىپ, 9 اۋلاعا تۇرعىنداردىڭ بوس ۋاقىتىن ءتيىمدى وتكىزۋىنە ارنالعان ينفراقۇرىلىممەن جابدىقتالعان.
باس قالادا جىل ساناپ قارقىن العان قۇرىلىس كوممۋنالدىق شارۋاشىلىق سالاسىندا دا اۋقىمدى قاجەتتىلىكتەردى قاجەت ەتەدى. ماسەلەن, قازىرگى تاڭدا ەلوردالىقتار تاۋلىگىنە جالپى كولەمى 290 مىڭ تەكشە مەتر بولاتىن اۋىزسۋ تۇتىنسا, قالانىڭ وسۋىمەن تۇتىنۋ كولەمى دە ارتۋى مۇمكىن. بۇل ماسەلە جاڭا سورعى-سۇزگى ستانساسىن پايدالانۋعا بەرۋمەن شەشىلەدى. قازىر قۇرىلىسى ءجۇرىپ جاتقان نىسان ىسكە قوسىلعان سوڭ قالاعا تاۋلىگىنە 105 مىڭ تەكشە مەتر كولەمىندە تىرشىلىك ءنارى بەرىلەدى. سول سەكىلدى جىلۋمەن قامتۋدىڭ تاۋلىكتىك كورسەتكىشى دە جاڭا جىلۋ ەلەكتر ورتالىعىنىڭ ىسكە قوسىلۋىمەن ۇلعايماق.
ەلوردانى گازداندىرۋ جوباسى اياسىندا جەكە تۇرعىن ۇيلەرمەن بىرگە 19 الەۋمەتتىك نىسان مەن 1,2 جىلۋ ەلەكتر ورتالىعى دا كەزەڭ-كەزەڭىمەن كوگىلدىر وتىنعا قوسىلادى. ال جىلىتۋ ماۋسىمىندا كومىر تاپشىلىعىن تۋىنداتپاۋ ءۇشىن قالا اكىمدىگى «قازاقستان تەمىرجولى» اكتسيونەرلىك قوعامىمەن كومىر ساتاتىن ورىندارعا كۇنىنە 45 ۆاگون قاتتى وتىن جەتكىزۋ بويىنشا كەلىسىمگە كەلدى. كومىر وندىرەتىن كاسىپورىندارمەن تۇرعىندار تاراپىنان سۇرانىسقا يە «قاراجىرا», «شۇباركول» سۇرىپتى كومىردىڭ تاپشىلىعىن تۋىنداتپاۋ تۋرالى دا كەلىسسوز جۇرگىزىلگەن.
حالىق قالاۋلىلارىنا ەسەپ بەرگەن قالا اكىمى شاھارداعى الەۋمەتتىك قورعاۋ, بيزنەستى دامىتۋ, تسيفرلاندىرۋ جوبالارى مەن نۇر-سۇلتان قالاسى بويىنشا Nur Otan پارتياسىنىڭ 2025 جىلعا دەيىنگى سايلاۋالدى باعدارلاماسىن ىسكە اسىرۋدىڭ بارىسىنا دا توقتالىپ ءوتتى.
قالا اكىمىنىڭ بايانداماسىنان سوڭ قالالىق ءماسليحات دەپۋتاتتارى مەكتەپ وقۋشىلارىن تاماقتاندىرۋ ساپاسى, تالدىكول توڭىرەگىندەگى قالىپتاسقان تۇيتكىلدەر تۋراسىندا سۇراق قويدى.
سەسسيا وتىرىسىندا بۇدان بولەك, قالا تۇرعىندارىن كومىرمەن قامتۋ, بيۋدجەتتى ءتيىمدى جوسپارلاۋ, LRT قۇرىلىسى, اۋەجاي ماڭىنداعى جەر تەلىمدەرىندە تۇرعىن ءۇي قۇرىلىسىن جۇرگىزۋگە تىيىم سالۋ ماسەلەلەسى دە كوتەرىلدى. شاھار باسشىسى دەپۋتاتتار تاراپىنان قويىلعان بارلىق سۇراقتارعا جاۋاپ بەرىپ, قالا اكىمدىگىنىڭ ەلوردالىقتاردىڭ ءومىر ءسۇرۋ ساپاسىن ارتتىرۋ باعىتىندا ماسليحاتپەن تىعىز بايلانىستا جۇمىستى جالعاستىرا بەرەتىنىن جەتكىزدى.
