ەلوردا تۇرعىندارى ءۇشىن بۇگىنگى تاڭدا ۆاكتسينانىڭ ءۇش ءتۇرى قولجەتىمدى بولىپ وتىر. اتاپ ايتقاندا, قازاقستاندىق QazVac, قىتايلىق Vero Cell جانە رەسەيلىك «سپۋتنيك V» ۆاكتسينالارى.
نۇر-سۇلتان قالاسىندا تاڭعى 8-دەن كەشكى 10-عا دەيىن جۇمىس ىستەيتىن 100-گە جۋىق ەگۋ پۋنكتى بار. حالىقتى كوروناۆيرۋسقا قارسى ەگۋ قالانىڭ العاشقى مەديتسينالىق-سانيتارلىق كومەك كورسەتۋ مەكەمەلەرىندە, سونداي-اق «Mega Silk Way», «Keruen», «حان شاتىر», «ابۋ دابي پلازا», «ازيا پارك», «سارىارقا», «ەۋرازيا» ساۋدا, ويىن-ساۋىق ورتالىقتارى مەن «مەچتا» ساۋدا ۇيىندە جۇرگىزىلەدى.
قالا تۇرعىندارى قولدا بار ءۇش ۆاكتسينانىڭ ءبىرىن تاڭداي الادى. ەگۋ پۋنكتتەرىندەگى بارلىق ۆاكتسينالار جەتكىلىكتى مولشەردە بار.
دەنساۋلىق ساقتاۋ باسقارماسى ازاماتتارعا ەكىنشى كومپونەنتتى الۋدا پروبلەمالىق جاعدايلاردى بولدىرماس ءۇشىن ەكپەنىڭ ەكى كەزەڭىن دە ءبىر پۋنكتتە وتۋگە كەڭەس بەردى. «ءبىز ازاماتتاردان ۆاكتسينانىڭ ءبىرىنشى جانە ەكىنشى كومپونەنتىن ءبىر پۋنكتتە الۋدى سۇرايمىز. مىسالى, ءبىرىنشى دوزانى الۋ ءۇشىن ءسىز بەلگىلى ءبىر ەمحاناعا نەمەسە ساۋدا ورتالىعىنا بارساڭىز, ەكىنشى دوزانى دا ۆاكتسيناتسيا اراسىنداعى ارالىقتى ساقتاي وتىرىپ, سول جەردەن الۋدى ۇسىنامىز» دەلىنگەن قالالىق دەنساۋلىق ساقتاۋ باسقارماسىنىڭ حابارلاماسىندا.
بۇگىندە نۇر-سۇلتان قالاسىندا كوروناۆيرۋسقا قارسى ۆاكتسينانىڭ ءبىرىنشى كومپونەنتىن 381 مىڭنان استام ادام الدى, ال 300 مىڭنان استام ازامات تولىق يممۋنداۋدان ءوتتى.
