مەملەكەت باسشىسى نۇرسۇلتان نازارباەۆتىڭ قاتىسۋىمەن بۋرابايدا ەلىمىزدەگى دامۋ باعدارلامالارىنىڭ ىسكە اسىرىلۋى جانە وڭىرلەردىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكەنى بەلگىلى. كەلەلى كەڭەستە ەلباسى ەلورداداعى كولىك جۇكتەمەسىنىڭ ماسەلەلەرىنە, بالاباقشا مەن مەكتەپتەردە ورىنداردىڭ جەتىسپەۋشىلىگىنە نازار اۋدارعان بولاتىن.
وسى ماسەلەلەردى شەشۋ ماقساتىندا ەلوردادا استانا قالاسىنىڭ 2017 جىلعا ارنالعان بيۋدجەتىن ناقتىلاۋ ماسەلەسى بويىنشا كەزەكتەن تىس ءماسليحات سەسسياسى ءوتتى. سەسسيادان كەيىن ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ەرعالي ەگەمبەردىمەن از-كەم اڭگىمەلەسىپ, سالادا اتقارىلاتىن جۇمىستاردىڭ جاي-جاپسارىن بىلگەن ەدىك.
باسقارما باسشىسىنىڭ ايتۋىنشا, جىل باسىنان بيۋدجەتكە تۇسكەن ءتۇسىم وتكەن جىلمەن سالىستىرعاندا 10,7 پايىزعا ۇلعايىپ 158,1 ملرد. تەڭگەنى قۇردى. كىرىستەردىڭ ءوسۋىنىڭ ەسەبىمەن, جەرگىلىكتى بيۋدجەتتىڭ جالپى بولجامدى كولەمى 2017 جىلعا 25,3 ملرد.تەڭگەگە وسۋىمەن 237,9 ملرد.تەڭگە سوماسىندا بەكىتىلدى, وسى قاراجاتتىڭ ەسەبىمەن شىعىستاردىڭ بارلىق باپتارى بويىنشا قارجىلاندىرۋ قامتاماسىز ەتىلىپ, بىرقاتار باسىمدى باستامالار ىسكە اسىرىلادى.
– بۋرابايدا وتكەن جيىندا ەلباسى استانا قالاسىنداعى ەكى بىردەي كۇردەلى ماسەلەنى كوتەرگەن بولاتىن. ول, وزدەرىڭىزگە بەلگىلى, بالاباقشا مەن مەكتەپ ماسەلەسى. وسىعان وراي, قالا اكىمى اسەت ورەنتايۇلى باسقارما باسشىلارىنىڭ باسىن قوسىپ, بىرىگىپ جۇمىس جاسادى.
سونىڭ ناتيجەسىندە كىرىسىمىز ۇلعايتىلىپ, اتالعان قارجى قازىرگى تاڭدا قالامىزعا كەرەكتى دەگەن شىعىستارعا جۇمسالىپ وتىر. سەبەبى بولاشاعىمىزدىڭ جارقىن بولماعى جاستاردىڭ ءبىلىمدى ءارى تاربيەلى بولىپ وسۋىنە بايلانىستى. سوندىقتان دا اكىمدىك ءبىلىم باسقارماسىنا قوسىمشا 68 ملن تەڭگە قاراستىرىپ وتىر. ماسەلەن, اكىمدىك 12 مەكتەپتى جوبالاپ, 5 مەكتەپتىڭ جانىنان قوسىمشا نىسان سالۋدى جوبالاۋ ءۇشىن 42 ملن تەڭگە قاراستىردى. بۇدان بولەك, مۇعالىمدەرگە جالاقى رەتىندە 400 ملن تەڭگە جانە جاڭا ارنايى تۇزەتۋ مەكتەپ-ينتەرناتىن اشۋ ءۇشىن 49 ملن جۇمسالادى, – دەدى ول.
باسقارما باسشىسى ءبىلىم سالاسىنا عانا ەمەس, سونىمەن قاتار, دەنساۋلىق پەن مادەنيەت سالاسىنا دا ەرەكشە نازار اۋدارىلىپ وتىرعانىن ايتتى. مىسالى, دەنساۋلىق ساقتاۋ باسقارماسىنا قوسىمشا 293 ملن تەڭگە ءبولىنىپ وتىر.
– اتالعان قارجىنىڭ 275 ملن تەڭگەسى «جاڭادان iسكە قوسىلاتىن دەنساۋلىق ساقتاۋ وبەكتiلەرiن كۇتىپ ۇستاۋ» باعدارلاماسى بويىنشا جۇمسالادى. بۇدان بولەك, «انا مەن بالانى قورعاۋ بويىنشا قىزمەت كورسەتۋ» باعدارلاماسى بويىنشا 18 ملن تەڭگە قاراستىرىلدى. سونداي-اق, ءۇش اۋداننىڭ تازالىعىن قامتاماسىز ەتۋ ماقساتىندا – 600 ملن تەڭگە, ال مادەنيەت, مۇراعاتتار جانە قۇجاتتامالار باسقارماسىنا قوسىمشا 300 ملن تەڭگە ءبولىندى. بۇل باس قالامىزدىڭ ساياسي عانا ەمەس, سونىمەن قاتار, رۋحاني ورتالىق بولۋىنا ىقپال ەتەدى دەپ ەسەپتەيمىز, – دەدى ەرعالي ەگەمبەردى.
ءيا, «ەكسپو-2017» حالىقارالىق كورمەسى ەلوردانىڭ ەكونوميكالىق-الەۋمەتتىك دامۋىنا ايرىقشا ىقپال ەتىپ وتىر. ماسەلەن, ونەركاسىپ كاسىپورىندارى 4,2 پايىزعا ءوسىپ, 290 ملرد تەڭگەنىڭ ءونىمىن وندىرگەن. سونداي-اق, قالا ەكونوميكاسى وتكەن جىلدىڭ وسى كەزەڭىمەن سالىستىرعاندا 7,3 پايىزعا ۇلعايعان. ناقتىراق ايتساق, 442 ملرد تەڭگە مولشەرىندە ينۆەستيتسيا تارتىلدى. بۇدان بولەك, باسقارما باسشىسى شاعىن جانە ورتا بيزنەس سالاسىندا قارقىندى ءوسىم بايقالعانىن تىلگە تيەك ەتتى. مىسالى, اتالعان سالادا ارەكەت ەتۋشى سۋبەكتىلەردىڭ سانى 7 پايىزعا ۇلعايىپ, وسىنىڭ ارقاسىندا شامامەن 300 مىڭ ادام جۇمىسپەن قامتىلعان.
سەرىك جولداسباي
