توكيودا ءوتىپ جاتقان پاراليمپيادا ويىندارىندا قازاقستان كومانداسى العاشقى جۇلدەلەرىن يەلەندى.
پاۋەرليفتينگتەن ەرلەر اراسىندا 54 كەلىگە دەيىنگى سالماقتا سىنعا تۇسكەن داۆيد دەگتيارەۆ 174 كەلىنى كوتەرىپ, پاراليمپيادا چەمپيونى اتاندى. كۇمىستى فرانتسيالىق ا.بورلوۋن (165 كگ), قولانى گرەكيالىق د.باكورحريستوس (165 كگ) يەلەندى.
سونىمەن قاتار اتىراۋلىق دزيۋدوشى ءانۋار ساريەۆ 60 كەلىگە دەيىنگى سالماق دارەجەسى بويىنشا كۇمىس مەدال يگەرى اتاندى. وتانداسىمىزدىڭ فينالداعى قارسىلاسى ازەربايجاندىق ۆۋگار شيرينلي بولدى. ال جارىستىڭ جارتىلاي فينالىندا ۆەنەسۋەلالىق سپورتشى ماركوس بلانكونى جەڭدى.
ايتا كەتسەك, قازاقستان تاراپىنان 26 پاراسپورتشى 7 سپورت ءتۇرى بويىنشا قاتىسىپ, ەل نامىسىن قورعايدى. پاراليمپيادا ويىندارى 2021 جىلدىڭ 24 تامىزىنان 5 قىركۇيەككە دەيىن توكيودا وتەدى.
