كىتاپ – ادام اقىل-ويىنان تۋىنداعان رۋحاني بايلىقتى ۇرپاقتان-ۇرپاققا جەتكىزىپ وتىراتىن ءبىلىم مەن تاربيە بەرۋ قۇرالى. بۇگىندە ول ءوزىنىڭ تاربيەلىك, ءبىلىم بەرۋ قىزمەتىن اتقارىپ وتىر ما؟ اقپارات اعىمىنىڭ الۋان تۇرلىلىگى, الەۋمەتتىك جەلىلەردەگى قىزىقتى كونتەنت وقۋشىلاردىڭ كىتاپ وقۋعا دەگەن قىزىعۋشىلىعىن تومەندەتىپ وتىر.
بالالار اقپاراتتى كىتاپتان ەمەس, YouTube, Google, Instagram, TikTok-تان العىسى كەلەدى. 15-20 سەكۋندتىق ۆيدەو ارقىلى اقپاراتتى قابىلداۋعا بەيىمدەلىپ بارا جاتقان وقۋشىعا زەيىنىن تۇراقتاپ, كىتاپ وقۋ قيىن. فريدريح ەبەرت قورىنىڭ 2018 جىلى جۇرگىزگەن الەۋمەتتىك زەرتتەۋىنىڭ ناتيجەسىنە سايكەس, قازاقستاندىق جاستاردىڭ 78,6 پايىزى مۇلدەم كىتاپ وقىمايدى. جاستاردىڭ كىتاپ وقىماۋى تەك ءبىزدىڭ عانا ەمەس, الىس-جاقىن شەتەل مەملەكەتتەرىنىڭ دە ۇلكەن ماسەلەسىنە اينالعان. ءار مەملەكەت بۇل ماسەلەنى ءارتۇرلى شەشۋدە. مەملەكەت باسشىسى قاسىم-جومارت توقاەۆتىڭ ۇلتتىق قوعامدىق سەنىم كەڭەسىندە بەرگەن تاپسىرماسىنا سايكەس بارلىق مەكتەپتە «وقۋعا قۇشتار مەكتەپ» جوباسى ەنگىزىلدى.
«وقۋعا قۇشتار مەكتەپ» جوباسىنىڭ ماقساتى – بالالاردى كوركەم ادەبيەت وقۋعا باۋلۋ. جوبا اياسىندا مەكتەپىشىلىك «قىزىقتى وقىلىم» جوباسى ەنگىزىلدى. بۇل جوبانىڭ ماقساتى – وقۋشىلاردىڭ كىتاپ وقۋعا دەگەن قىزىعۋشىلىعىن ارتتىرا وتىرىپ, شىعارمالاردىڭ مازمۇنى نەگىزىندە ولاردىڭ بويىنا جالپىادامزاتتىق قۇندىلىقتاردى سىڭىرە وتىرىپ, ادامگەرشىلىك تاربيە بەرۋ. مەكتەپىشىلىك جوبانى جۇزەگە اسىرۋ بارىسىندا وقۋشىلار ەرتەگى, اڭىز, جىرلار, ىبىراي التىنسارين, اباي قۇنانبايۇلى, ت. ب. قازاق اقىن-جازۋشىلارىنىڭ شىعارمالارىمەن قاتار شەتەل ادەبيەتىن دە وقيدى. بۇل جوبا ناقتى شىعارمالاردى وقۋعا باعىتتالعان. وعان قاتىسۋشى سىنىپتار اي سايىن ورتاق ءبىر شىعارما وقىپ, وقىعان شىعارمالارى جەلىسى بويىنشا ەسسە, سۋرەت سايىسى, ۆيكتورينا, دوڭگەلەك ۇستەل, وقىرماندار كونفەرەنتسياسىنا قاتىسادى. جىل سايىن كىتاپتى بەلسەندى تۇردە وقىپ, بارلىق ءىس-شاراعا قاتىساتىن ۇزدىك سىنىپتار انىقتالادى. ءار سىنىپتىڭ جوبا اياسىندا وتكىزىلگەن ءىس-شارالارعا قاتىسۋ بەلسەندىلىگى قورىتىندىلانىپ, ناتيجەسىندە «وقۋعا قۇشتار سىنىپ-2022» مۇسىنشەسىمەن 4 «ب», 6 «ل», 6 «ب», 6 «ۆ» سىنىپ وقۋشىلارى مەن جەتەكشىلەرى گ.مۋراسۋلوۆا, ا.ەگىمباەۆا, م.وسپانوۆا, ب.مۇرتازينا ماراپاتتالدى.
بالالار كىتاپ وقۋ بويىنشا, مەكتەپىشىلىك ءىس-شارالارمەن قاتار, قالالىق, اۋداندىق جارىستارعا دا بەلسەنە قاتىسادى. «قىزىقتى وقىلىم» جوباسىنىڭ بەلسەندى قاتىسۋشىسى, 6 «ل» سىنىپ وقۋشىسى يسكاندەر يحسانوۆ بايقوڭىر اۋدانى بويىنشا وتكەن «كەل, بالالار, وقىلىق!» وقۋلار سايىسىندا ءىى ورىن الدى. مەكتەبىمىزدە «قوڭىراۋدا كىتاپ وقى!» كىتاپ وقۋ مينۋتى ەنگىزىلىپ, وقۋشىلار ءار اپتانىڭ سەيسەنبى كۇنى قوڭىراۋدا كىتاپ وقيدى. دەمالىسقا شىققاندا اتا-انامەن كىتاپ وقۋ چەللەندجى, اقىن-جازۋشىلارمەن كەزدەسۋ, قالاداعى كىتاپحانالارعا ەكسكۋرسياعا بارۋ, ادەبي كەشتەرگە قاتىسۋ سىندى ءتۇرلى ىس-شارا «وقۋعا قۇشتار مەكتەپ» جوباسى اياسىندا جۇزەگە اسىرىلىپ كەلەدى. 3 «ءا», 4 «ب», 3 «ي» سىنىپتارىندا BookCrossing كىتاپ الماسۋ بۇرىشى اشىلىپ, وقۋشىلار وزدەرى وقىعان كىتاپتارىن سىنىپتاستارىمەن ءبولىسىپ, اۋىستىرىپ وقۋدا. بولاشاقتا بارلىق سىنىپتا كىتاپ الماسۋ بۇرىشىن ۇيىمداستىرۋ جوسپارلانۋدا. مەكتەپ ديرەكتورى ك.بايسالباەۆ «وقۋعا قۇشتار مەكتەپ» جوباسى اياسىنداعى باستامالاردى قولداپ, بالالاردىڭ كىتاپ وقىپ, ساپالى ءبىلىم مەن سانالى تاربيە الۋىنا ەرەكشە كوڭىل ءبولىپ كەلەدى.
«وقۋعا قۇشتار مەكتەپ» جوباسىن جۇزەگە اسىرۋ بارىسىندا تەك شاكىرتتەر عانا ەمەس, پەداگوگيكالىق ۇجىم دا كىتاپ وقىپ, دەمالىس كەزىندە وقىعان شىعارمالارىن ۇجىممەن تالقىلايدى. سونىمەن قاتار مۇعالىمدەر «وقۋعا قۇشتار مەكتەپ» جوباسى اياسىندا قالالىق سايىستارعا قاتىسىپ, ءوز تاجىريبەلەرىمەن ءبولىسىپ ءجۇر. اتاپ ايتساق, «قىزىقتى وقىلىم» جوباسىنىڭ ۇيلەستىرۋشىسى, ورىس ءتىلى مەن ادەبيەتى مۇعالىمى م.بەگەجانوۆا قالالىق «ۇزدىك ءپان مۇعالىمى-2022» سايىسىندا «وقىرماندار كونفەرەنتسياسى – وقىرمان ساۋاتتىلىعىن ارتتىرۋ قۇرالى» تاقىرىبىندا شەبەر-سىنىپ وتكىزسە, باستاۋىش سىنىپ مۇعالىمى ك.كاجگاليەۆا «ۇزدىك اۆتورلىق باعدارلاما» بايقاۋىندا «سكازكوتەراپيا» ۇيىرمە باعدارلاماسىن ۇسىنىپ, ءىىى ورىن الدى. مۇنداي يگى ىستەردەن ءوزىم دە شەت قالماي, «پەداگوگيكالىق يدەيالار» فەستيۆالىندە «وقىرمان كۇندەلىگى» اۆتورلىق جۇمىسىن ۇسىنىپ, ءىىى ورىنعا يە بولدىم.
چەح پەداگوگى يان اموس كومەنسكي وقىرمان كۇندەلىگى وقىلعان كىتاپتارداعى ءبىلىمدى جيناقتاۋشى ءارى ساقتاۋشى ەكەندىگى جونىندە XVII عاسىردا ايتىپ كەتكەن. وقىرمان كۇندەلىگى ارقىلى وقۋشىلار قارىم-قاتىناس داعدىلارى مەن ادامگەرشىلىك قاسيەتتەرىن جەتىلدىرەدى, ەستە ساقتاۋ قابىلەتىن جاتتىقتىرادى, وقۋ مادەنيەتىن قالىپتاستىرادى, ءوزىن-ءوزى باقىلاۋىن كۇشەيتەدى. 3 «ءا» سىنىپ وقۋشىلارى سىنىپ جەتەكشىسى ن.بۋلاشەۆانىڭ باستاماسىمەن سىنىپتان تىس ۋاقىتتا كوركەم شىعارمالار وقىپ, وقىرمان كۇندەلىگىن جۇرگىزۋدە. بالانىڭ ساباقتاعى جالپى ۇلگەرىمىن جاقسارتۋ ءۇشىن كىتاپ وقۋدىڭ, وقىعانىن تالداپ, وقىرمان كۇندەلىگىنە جازۋدىڭ پايداسى كوپ.
مەكتەپتىڭ ماقساتى باسەكەگە قابىلەتتى جان-جاقتى تۇلعا تاربيەلەۋ بولسا, باسەكەگە قابىلەتتى تۇلعا – سىني ويلاي بىلەتىن, وقۋ, جازۋ, تالداۋ, سارالاۋ داعدىلارى قالىپتاسقان جان-جاقتى وقۋشى. وقۋشىلارعا قازىرگى زامان تالابىنا ساي ءبىلىم, تاربيە بەرۋدە «وقۋعا قۇشتار مەكتەپ» جوباسىنىڭ ماڭىزى زور.
ايگەرىم حاميتوۆا,
№27 مەكتەپ-ليتسەيى
ديرەكتورىنىڭ
تاربيە ءىسى جونىندەگى
ورىنباسارى
