ۇلىستىڭ ۇلى كۇنىندە استانادا كۇي اناسى – دينا نۇرپەيىسوۆا ەسكەرتكىشىنىڭ جانىنداعى كۇيشى-كومپوزيتورلار اللەياسىندا «دومبىرا» ءمۇسىنى ورناتىلدى. ۇلتتىق مەرەكەگە وراي وتكەن مۇنداعى ناۋرىز مەيرامىن الماتى اۋدانى اكىمدىگى, «ۇلتتىق مۇددە كەڭەسى» قب جانە «كۇي اناسى» رەسپۋبليكالىق قورى ۇيىمداستىردى.
ناۋرىز تويى باتامەن باستالىپ, جينالعان ەلگە قالا تۇرعىنى, ەڭبەك ارداگەرى وتەگەن ءناسىپۇلى باتاسىن بەردى. سونداي-اق حالىق قاھارمانى, عارىشكەر توقتار اۋباكىروۆ مەرەكەلىك جيىننىڭ قادىرمەندى قوناعى بولدى.
– ۇلتتىق قۇندىلىعىمىزدى جانە قازاقتىڭ كيەلى دومبىراسىن قادىرلەۋ مەن ناسيحاتتاۋ باعىتىنداعى جۇمىسقا ءبارىمىز دە اتسالىسۋىمىز قاجەت. وسكەلەڭ ۇرپاق حالقىمىزدىڭ تاريحى مەن رۋحاني-مادەني بايلىعىن ساناسىنا سىڭىرە ءبىلۋى ءۇشىن وسىنداي باستامالار جالعاسىن تابا بەرەدى. بارشاڭىزعا ناۋرىز مەيرامى قۇتتى بولسىن! – دەدى حالىق قاھارمانى.
جينالعان قاۋىم اتىنان باتىردىڭ يىعىنا وقالى شاپان جابىلدى. كورسەتىلگەن قۇرمەتكە ريزاشىلىعىن بىلدىرگەن ول «ەلىمىزدى كوركەيتۋ جولىندا قىزمەت ەتىپ جۇرگەن جاستار حالىقتىڭ العىسىنا بولەنەتىن بولسىن» دەگەن نيەتپەن وزىنە بەرىلگەن شاپاندى الماتى اۋدانىنىڭ اكىمى ماقسات ساماتۇلىنا تارتۋ ەتتى.
ءىس-شارانى ۇيىمداستىرۋشىلاردىڭ ءبىرى, «كۇي اناسى» رەسپۋبليكالىق قورىنىڭ جەتەكشىسى تولەگەن قۋانىشەۆ استانا قالاسى اكىمدىگىنىڭ قولداۋىمەن دينا ەسكەرتكىشى ماڭىندا مۋزىكالىق سۋبۇرقاق ورناتۋ جوسپاردا بار ەكەنىن ايتتى.
– بۇل جەر دەمالىس ايماعىنا اينالماق. 24 ساعات بويى قازاق كومپوزيتورلارىنىڭ كۇيلەرى مەن اندەرى ورىندالاتىن بولادى. ءار ازامات ءوزىن قازاق ەلىنىڭ ازاماتى ەكەنىن سەزىنۋى ءۇشىن وسىنداي ىستەر قولعا الىنىپ جاتىر. ونەر ۇجىمدارىنىڭ كۇي تارتۋىنا ارنالعان اشىق ساحنا الاڭىن سالۋ كوزدەلىپ وتىر. يگى باستامانى قولداعان سىزدەرگە كوپ راقمەت! – دەدى ول.
ناۋرىز مەيرامىنىڭ ماڭىزىنا توقتالعان قوعام قايراتكەرى, جۋرناليست سەرىك ەرعالي ءتول ونەرىمىز بەن ۇلتتىق اسپاپتارىمىزدى دارىپتەپ, جاس ۇرپاققا جەتكىزۋگە ءبارىمىز دە ۇلەس قوسۋىمىز قاجەتتىگىن اتاپ ءوتتى. جينالعاندار قازاقتىڭ ۇلتتىق اسپابى – «دومبىرا» مونۋمەنتىن سالتاناتتى تۇردە اشتى. اللەيا جانىنداعى ناۋرىز مەيرامىندا كەلۋشىلەرگە ارناپ كيىز ءۇي تىگىلىپ, كونتسەرت باعدارلاماسى ۇيىمداستىرىلدى. قازاقستاننىڭ ەڭبەك سىڭىرگەن قايراتكەرى, پروفەسسور, كۇيشى-ۇستاز ورىنباي دۇيسەن دينانىڭ «تويباستار» كۇيىن تارتىپ, كورەرمەننىڭ ىستىق ىقىلاسىنا بولەندى. مەرەكە بارىسىندا بارلىعى د.نۇرپەيىسوۆا ەسكەرتكىشىنە گۇل شوعىن قويىپ, رۋحىنا تاعزىم ەتتى.
