ەرجان ءان سالعاندا, ەسىمە ۇستازىم جۇسىپبەك ەلەبەكوۆ تۇسەدى. ويتكەنى جۇسەكەڭ دارحان دالانىڭ توسىنەن شىققان تۋما تالانتتاردى, ەل ىشىندە ءداستۇرلى ءاندى كاسىبيلىكپەن شىرقاعان دارىندارعا تامساناتىن-دى.
جۇسەكەڭ بىزگە ءدارىس كەزىندە سونداي دارىنداردى ءجيى تىلگە تيەك ەتەتىن. سوندا باباقوۆتار اۋلەتىن ايتۋشى ەدى. «قاسىمجان, دوسىمجان, قوسىمجان, سەيىتجان, ەسىمجان, رابيعا – اعايىندىلار شەتىنەن ءانشى-ءتىن. بىرىنەن-ءبىرى اسادى. سەيىتجان 7-8 شاقىرىم جەردەن اۋەلەتكەندە, تۋرا قۇلاعىمىزدىڭ تۇبىنەن ءان شىرقاعانداي ەستىلەتىن. ءبىر ءانىن تىڭداپ بارىپ, ۇيقىعا كەتەتىنبىز» دەۋشى ەدى.
جۇسەكەڭ ايتقان ءدال سونداي دالا ساحناسىندا جاسىنداي جارقىراپ جۇرگەن, دالالىق ونەر ءداستۇرىنىڭ نازىك قىلىن ۇزبەي جالعاپ كەلە جاتقاننىڭ ءبىرى ءھام بىرەگەيى وسى بازاربەكوۆتەر اۋلەتى دەپ نىق ايتا الامىن. بۇل اۋلەتتىڭ بالالارىنىڭ ءبارى دەرلىك مەنەن ءتالىم-تاربيە, ءدارىس الدى. اقىلىمدى ايتىپ, جول سىلتەي بىلدىك. جالپى, ونەر دەگەن ورەنگە قۇشاعىمىز قاشان دا اشىق. ونەردە جالعىز, ساياق كەتپەي, سوڭىمىزدان وسى ەرجان سەكىلدى ونەرپازدىڭ قاۋلاپ وسكەنىنە بەك قۋانامىز.
ارقا ءوڭىرى – انشىلىكپەن امبەگە ايگىلى. كاكىمبەك سالىقوۆتىڭ دۇنيەدەن وتەرىندە ايتقان مىنا ءبىر ءسوزىن وسى ارادا ايتا كەتسەك, ەش ەرسىلىگى ءارى سوكەتتىگى جوق بولار. «ءبىر كەزەڭدە ءاندى تۋ قىلعان كوكشەتاۋدا ءان قالعان جوق, ءان ارقاعا, جاڭاارقاعا اۋعان ەكەن. قازىر ونەردىڭ كىندىگى ارقادا جاتىر» دەگەنىندە زور ءمان-ماڭىز بار. بۇل ارادا تەك قانا جاڭاارقا ەمەس, قاراعاندى وبلىسىنىڭ بارلىق ءوڭىرى انگە, كۇيگە ەرەكشە دەن قويعانىن ايتادى اقىن. قازىنالى قاراعاندى – ءداستۇردى ۇزبەي, بۇگىنگە جالعاپ كەلە جاتقان بىردەن-ءبىر ايماق.
وسىنداي ونەرگە ىنتىق ولكەدە ەرجاننىڭ كاسىبي تۇرعىدا شىڭدالىپ, كەمەلىنە كەلۋى زاڭدىلىق ەندەشە. ارينە, ۇستازسىز شاكىرت جوق. شاكىرت ۇستازدان ءبىلىم العان سوڭ ونەرىن ورىستەتۋگە ءتيىس. مىنە, سول ونەرىن ورىستەتكەن ءبىرتۋار ءانشى – ەرجان. بۇگىندە جاسى دا, جيعان تاجىريبەسى دە, كاسىبيلىگى دە ونىڭ ءان قورىنىڭ بايىپ, تولىسقانىن كورسەتەدى. بۇگىنگى ءانشى ەرجان – كەمەلىنە كەلگەن, كاسىبيلىكتىڭ بيىك شىڭىنا شىققان ەرجان!
ءبارىمىز ۇستازعا ەلىكتەدىك. ءبارى ەلىكتەۋدەن باستالادى. مەن كەزىندە يگىلىككە, جۇسەكەڭە ەلىكتەدىم. ودان ءارى جالعاپ, ونى دامىتۋ اركىمنىڭ ەڭبەگىنە بايلانىستى. ول ەڭبەك – رەپەرتۋار, ءان بايلىعى. ءاندى تولىق مەڭگەرگەن سايىن شەبەرلىك ارتا تۇسەدى. ەرجاننىڭ بۇل ورايدا ۇزدىكسىز ىزدەنەتىن ەڭبەكقورلىعىنا ريزا بولامىن. سوندىقتان دا ەرجاننىڭ ورىنداۋىندا تىڭدارمانىنىڭ جانىن جۇباتىپ, كوڭىل قۇسىن كوككە ۇشىراتىنداي ءبىر قايتالانباس عاجاپتىق بار. بۇل – قۇدايدىڭ ءوزى بەرگەن دارىنى. ءبىز ءاندى XXI عاسىرعا جەتكىزدىك. ەرجانداردىڭ مىندەتى – XXII عاسىرعا جەتكىزۋ. بۇلاردىڭ جۇگى, قازىرگى كومپيۋتەر مەڭدەگەن كەزەڭدە, بىزدەن اۋىرلاۋ.
قايرات بايبوسىنوۆ,
قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى
