ءۇي جانۋارلارىن ۇستاۋ جانە سەرۋەندەتۋدىڭ جاڭا ەرەجەسىن بەكىتۋ ۇسىنىلدى. بۇل تۋرالى «اشىق» نقا پورتالىندا جاريالانعان ەكولوگيا جانە تابيعي رەسۋرستار ءمينيسترىنىڭ بۇيرىعىندا جازىلعان.
جاڭا رەداكتسياعا سايكەس, بۇرىن بولماعان مىنا ەرەجەلەر ەنگىزىلەدى:
ۆاكتسيناتسيالانباعان جانە زارارسىزداندىرىلماعان مالدى ۇستاۋعا جول بەرىلمەيدى; كىرەبەرىستەردى, باسپالداق تورلارىن, ليفتىلەردى, سونداي-اق ويىن الاڭدارىن, جولداردى, تروتۋارلاردى ءۇي جانۋارلارىنىڭ ناجىسىمەن لاستاۋعا تىيىم سالىنادى. ءۇي جانۋارلارىنىڭ يەسى ءناجىستى دەرەۋ تازالاۋعا مىندەتتى.
اكىمشىلىكتىڭ كەلىسىمى بويىنشا قوناق ۇيگە يتپەن نەمەسە مىسىقپەن قونىستانۋعا رۇقسات ەتىلەدى. ءۇي جانۋارلارىن ۇزاق ۋاقىت قاراۋسىز قالدىرۋعا جول بەرىلمەيدى. ول جانۋاردىڭ ءتۇرى مەن تاماقتانۋ, سەرۋەندەۋ جانە قارىم-قاتىناس قاجەتتىلىكتەرىنە بايلانىستى انىقتالادى.
باقىلاۋسىز قالعان ەرەسەك يتتەر ءۇشىن شەكتى مەرزىم 12 ساعاتتان, مىسىقتار ءۇشىن 48 ساعاتتان اسپاۋى ءتيىس. باقىلاۋسىز قالعان مارعاۋلار مەن كۇشىكتەر ءۇشىن ۋاقىت ولاردىڭ جاسىنا جانە تاماقتاندىرۋ مەن كۇتىمنىڭ فيزيولوگيالىق قاجەتتىلىكتەرىنە, سونداي-اق ەمىزەتىن مىسىقتار مەن يتتەردىڭ بولۋىنا بايلانىستى انىقتالادى. قاراۋ مۇمكىن بولماعان جاعدايدا, جانۋاردىڭ يەسى نەمەسە جاۋاپتى تۇلعا ونى ۋاقىتشا ۇستاۋعا ءۇشىنشى تۇلعالارعا بەرەدى, زوولوگيالىق قوناق ۇيگە ورنالاستىرادى. يت يەسى ءۇي جانۋارلارىنا بوس ءجۇرۋ داعدىلارىن ۇيرەتەدى, اگرەسسيانىڭ كورىنىسىن باقىلايدى, ءيتتى نەگىزگى كوماندالارعا ۇيرەتەدى.
ادامداردى نەمەسە جانۋارلاردى تىستەسە جانە اگرەسسيا ادامنىڭ نەمەسە جانۋاردىڭ ءىس-ارەكەتىنەن تۋىنداعان بولسا, ۆەتەريناريالىق ەمدەۋ ۇيىمىنىڭ نەمەسە وسى اۋماققا قىزمەت كورسەتەتىن ۆەتەريناريالىق دارىگەردىڭ رۇقساتى بويىنشا يەسى جانۋاردى كۇنتىزبەلىك 10 كۇن ىشىندە وقشاۋلانعان ءۇي-جايدا ۇستاۋ تۋرالى جازباشا نۇقاۋلىق بەرەدى. ازاماتتارعا, كاسىپورىندارعا, مەكەمەلەرگە جانە ۇيىمدارعا تيەسىلى يتتەر ۆەتەرينارلىق كلينيكالاردا نەمەسە ۆەتەرينارلىق مەكەمەلەردە تۇقىمىنا قاراماستان 3 ايدان باستاپ قۇتىرۋ مەن باسقا اۋرۋلارعا قارسى مىندەتتى تىركەۋگە, وڭدەۋگە جانە ۆاكتسيناتسيالاۋعا جاتادى. جاڭادان ساتىپ الىنعان جانۋارلار جانۋاردىڭ جەكە تىركەۋ ءنومىرىن الا وتىرىپ, 2 اپتا مەرزىمدە تىركەلۋگە ءتيىس.
تاسىمالداۋ ەرەجەلەرىن ساقتاي وتىرىپ, جانۋارلاردى جەر ءۇستى كولىگىنىڭ بارلىق تۇرىمەن تاسىمالداۋعا رۇقسات ەتىلەدى. يتتەر مەن مىسىقتاردى ازىق-تۇلىككە تۇتىنۋ, وسى جانۋارلاردان سويۋ نەمەسە مەرتىگۋ, دەنساۋلىققا وزگە دە زيان كەلتىرۋ جولىمەن ونىمدەر مەن شيكىزات الۋ ءۇشىن وسىرۋگە, كۇتىپ-باعۋعا, پايدالانۋعا, سونداي-اق وسىنداي ءونىمدى وتكىزۋگە تىيىم سالىنادى. جانۋاردىڭ يەسى ونى بيولوگيالىق ەرەكشەلىكتەرىنە سايكەس ۇستاۋعا, جانۋارعا قامقورلىقپەن قاراۋعا, ونى تاماقسىز جانە سۋسىز قالدىرماۋعا, جانۋارعا قاتىگەزدىككە جول بەرمەۋگە جانە اۋىرعان جاعدايدا ۋاقىتىندا ۆەتەريناريالىق كومەككە جۇگىنۋگە مىندەتتى.
يتتەر مەن مىسىقتاردى باقىلاۋسىز اسىراۋعا جول بەرىلمەيدى. ءيتتىڭ, مىسىقتىڭ يەسى كينولوگيالىق جانە فەلينولوگيالىق ۇيىمداردا ءتيىستى تىركەۋى بار نەمەسە جانۋاردىڭ دەنساۋلىعىنا قارسى كورسەتىلىمى بار ادامداردان باسقا, ولاردى كاستراتسيالاۋ/زارارسىزداندىرۋ ارقىلى ءۇي يتتەرى مەن مىسىقتارىندا قاجەتسىز ۇرپاقتاردىڭ پايدا بولۋىن بولدىرماۋ ءۇشىن شارالار قابىلداۋعا مىندەتتى. ءيتتىڭ ساتىپ الىنعانى, جوعالعانى نەمەسە ولگەنى تۋرالى يەسى تۇرعىلىقتى جەرى بويىنشا مامانداندىرىلعان ۇيىمدارعا, ۆەتەريناريالىق مەكەمەلەرگە ءۇش تاۋلىك ىشىندە حابارلايدى.
جانۋاردىڭ ولەكسەسى قر ۆەتەريناريالىق نورمالارىنا سايكەس كرەماتسيالاۋ, كادەگە جاراتۋ نەمەسە كومۋ ءۇشىن 1 تاۋلىك ىشىندە ۆەتەريناريالىق مەكەمەگە تاپسىرىلادى. جانۋاردىڭ ولەكسەسىن لاقتىرۋعا تىيىم سالىنادى.
اتالعان ەرەجەلەر قامتىلعان بۇيرىق 6 ساۋىرگە دەيىن كوپشىلىك تالقىلاۋدا بولادى.
