ۇلىستىڭ ۇلى كۇنى – ناۋرىز مەيرامىن ەلوردالىقتار ەرەكشە اتاپ ءوتتى. استانا ءۇش كۇن بويى مەرەكەلىك ءىس-شارالاردىڭ الاڭىنا اينالدى.
مەملەكەت باسشىسى قاسىم-جومارت توقاەۆ ناۋرىز مەيرامىنا ارنالعان ءىس-شارالارعا قاتىسىپ, بارشا قازاقستاندىقتاردى ۇلىستىڭ ۇلى كۇنىمەن قۇتتىقتادى
«ناۋرىز – جىل باسى, حالقىمىز ەجەلدەن تويلاعان كوكتەم مەرەكەسى. بۇل – حالىق اسىعا كۇتەتىن اسا ەرەكشە مەيرام, قىستىڭ ىزعارى قايتاتىن, كوكتەم شۋاعىن توگەتىن ءسات. تابيعات تۇلەپ, تىرشىلىك جاڭاراتىن مەزگىل. ەلىمىز ءاز-ناۋرىزدى ءاردايىم ىرىستى ىنتىماقتىڭ باستاۋىنا بالاعان. الىستاعان اعايىن ۇلىس كۇنى تاتۋلاسىپ, قايتا قاۋىشقان. جۇرت ءبىر-بىرىنە اقجارما تىلەكتەرىن ايتقان. كوپشىلىك ورتاق داستارقاننان ءدام تاتىپ, قاريالار جاستارعا باتاسىن بەرگەن. بابالارىمىز ناۋرىز تويىن جاسامپاز ەڭبەكتىڭ مەيرامى ساناعان. بۇلاقتىڭ كوزىن اشىپ, اعاش وتىرعىزعان. ەلگە پايداسى تيەتىن يگى ىستەر اتقارعان. ءبىر سوزبەن ايتساق, ۇلىستىڭ ۇلى كۇنى – جاڭا ءومىردىڭ جارشىسى» دەدى پرەزيدەنت.
مەملەكەت باسشىسى وسىدان ءبىر جىل بۇرىن تىڭ باستاما كوتەرىپ, ەلىمىزدى تۇبەگەيلى جاڭعىرتۋ ءۇشىن اۋقىمدى رەفورمالار ۇسىنعانىن ەسكە سالدى.
«حالىق بۇل باستامالاردى قولدادى. ءبىز جوسپارىمىزدى ءبىر جىلدا تابىستى جۇزەگە اسىردىق. رەفەرەندۋم ارقىلى كونستيتۋتسياعا ماڭىزدى وزگەرىستەر ەنگىزدىك. بيلىك جۇيەسىن قايتا جاساقتاۋ ءۇشىن ماڭىزدى ساياسي شارالار ىسكە اسىرىلدى. كەشە عانا وتكەن ءماجىلىس پەن ءماسليحاتتار سايلاۋى – بۇكىل رەفورمالارىمىزدى العا باستايتىن وتە ماڭىزدى قادام. بۇل سايلاۋ – اۋقىمدى وزگەرىستەردىڭ لايىقتى جالعاسى. وسىلايشا, مەملەكەتىمىز جاڭا ساياسي داۋىرگە قادام باستى. جالپى, ەلىمىزدىڭ جاڭا ساياسي كەلبەتى قالىپتاستى. تاريحي ءسات ۇلىستىڭ ۇلى كۇنىمەن تۇسپا-تۇس كەلىپ وتىر. مۇنىڭ زور سيمۆولدىق ءمانى بار. جاڭا قازاقستاننىڭ بۇگىنگى بەينەسى ءاز-ناۋرىزبەن تولىق ۇندەسەدى, ياعني ۇلىستىڭ ۇلى كۇنىندە قاسيەتتى وتانىمىز مۇلدە جاڭا سيپاتقا يە بولدى. مۇنى دۇنيە ءجۇزىنىڭ كوپتەگەن ەلدەرى مويىنداپ وتىر. ەندى ساياسي جۇيەسى تولىق جاڭعىرعان ەلىمىز تىڭ قارقىنمەن داميدى. بۇل رەفورمالار ەكونوميكانىڭ وسۋىنە, حالىق تابىسىنىڭ ارتۋىنا جول اشادى. رەفورمالارىمىز مىندەتتى تۇردە جالعاسىن تابادى. ءبىز جان-جاقتى دامىعان قۋاتتى مەملەكەت بولامىز. بۇل – نەگىزگى ماقساتىمىز» دەدى قاسىم-جومارت توقاەۆ.
سونىمەن قاتار مەملەكەت باسشىسى جاسامپاز حالقىمىزدىڭ كەلەشەگى جارقىن بولاتىنىنا سەنىم بىلدىرەتىنىن ايتىپ, مەملەكەتتىڭ مۇددەسى بارىنەن بيىك ەكەنىنە نازار اۋداردى. پرەزيدەنت ەل بولاشاعى وسكەلەڭ ۇرپاقتىڭ قولىندا ەكەنىن اتاپ ءوتىپ, وتانداستارىمىزدى ەلىمىزدىڭ دامۋىنا ۇلەس قوسۋعا شاقىردى.
«بىرلىك ءتۇبى – بەرەكە» دەيدى حالقىمىز. قوعامدا كەلىسىم جانە تاتۋلىق بولسا, ەلىمىز كوزدەگەن ماقساتىنا جەتەدى. ءبىزدىڭ ماقساتىمىز – ايقىن. بۇل – ادىلەتتى قازاقستاندى قۇرۋ. وسى جولدا ءبارىمىز ءبىر كىسىدەي جۇمىلايىق, ارداقتى اعايىن! بيىل قاسيەتتى رامازان ايى ۇلىستىڭ ۇلى كۇنىمەن قاتار كەلدى. ورازا ۇستايتىن جاماعاتتىڭ نيەتى قابىل بولسىن! ءار شاڭىراققا قىدىر قونىپ, باق دارىسىن! جاڭا جىل قۇت-بەرەكە اكەلسىن! ۇلىس وڭ بولسىن, اق مول بولسىن!» دەدى قاسىم-جومارت توقاەۆ.
بۇدان كەيىن مەملەكەت باسشىسى «جۇرەك جىلۋى» قايىرىمدىلىق اكتسياسىنا قاتىستى. اكتسيانىڭ ءمانى – ناۋرىز ايى بويىنا حالىقتىڭ الەۋمەتتىك وسال توپتارىنا قامقورلىق كورسەتىپ, كوپبالالى وتباسىلاردان, مۇمكىندىگى شەكتەۋلى جانداردان, زەينەتكەرلەردەن كەلىپ تۇسكەن حاتتاردا جازىلعان ءوتىنىش-تىلەكتەردى ورىنداۋ. «استانا» جاستار رەسۋرستىق ورتالىعىنىڭ ەرىكتىلەرى مەملەكەت باسشىسىنان ساندىقتان العاشقى حاتتى الىپ وقۋدى سۇرادى. قاسىم-جومارت توقاەۆ حات يەسىنىڭ تىلەگى ورىندالاتىنىن جەتكىزىپ, وسىناۋ يگى ءىستى باستاعان جاستارعا ريزاشىلىعىن ءبىلدىردى.
سونىمەن قاتار مەملەكەت باسشىسى «ارعىماق» ات سپورتى-ساۋىقتىرۋ كەشەنىندە ۇيىمداستىرىلعان «جەتى قازىنا» مادەني-سپورت ءىس-شاراسىنا قاتىستى. الدىمەن پرەزيدەنت تازى يتتەردىڭ كورمەسىن تاماشالادى. «Nomad» ۇلتتىق ساياتشىلىق» قوعامدىق قورىنىڭ توراعاسى بولات قۇنانباەۆ تازىنى ساقتاۋ, ءوسىرۋ باعىتىندا اتقارىلىپ جاتقان جۇمىستار جونىندە باياندادى. مەملەكەت باسشىسى تازىنى حالىقارالىق دەڭگەيدە دارىپتەۋ قاجەت ەكەنىن ايتتى.
«قۇماي تازى – ەرەكشە جانۋار, قازاقتىڭ جەتى قازىناسىنىڭ ءبىرى. ءبىز تازى مەن توبەت يتتەردى حالىقارالىق دەڭگەيدە كەڭىرەك دارىپتەۋىمىز كەرەك. سىرتقى ىستەر مينيسترلىگى دە مىندەتتى تۇردە اتسالىسۋعا ءتيىس. تازىعا ەرەكشە كۇتىم, قامقورلىق قاجەت. بۇل ماڭىزدى ءىس كاسىبيلىكتى تالاپ ەتەدى. سول ءۇشىن ارنايى زاڭ قابىلدادىق» دەدى قاسىم-جومارت توقاەۆ.
سونداي-اق مەملەكەت باسشىسى Nomad Stunts توبىنىڭ ونەرىن تاماشالادى. كاسكادەرلەر اۋدارىسپاق, قىز قۋ, تەڭگە ءىلۋ, ساداق اتۋ سياقتى ۇلتتىق ويىن تۇرلەرى مەن كوشپەندىلەردىڭ اسكەري شەرۋىن كورسەتتى. Nomad Stunts توبىنىڭ جەتەكشىسى جايداربەك كۇنعوجينوۆ مەملەكەت باسشىسىنا 2020 جىلى كاسكادەرلەرگە بەرىلەتىن Taurus World Stunt Awards جۇلدەسىن جەڭىپ العانىن ايتتى. پرەزيدەنت قازاقتىڭ قايسارلىعى مەن ۇلتتىق سپورتىمىزدى الەمدىك كينەماتوگرافيادا دارىپتەپ جۇرگەن Nomad Stunts توبىنا ساتتىلىك تىلەپ, جايداربەك كۇنعوجينوۆكە ەر-توقىم سىيلادى.
سونىمەن قاتار مەملەكەت باسشىسى ءشامشى قالداياقوۆتىڭ شىعارماشىلىعىنا ارنالعان وتاندىق ونەر جۇلدىزدارىنىڭ كونتسەرتىن تاماشالادى. «قازاقستان» ورتالىق كونتسەرت زالىندا بەلگىلى انشىلەر روزا رىمباەۆا, مايرا مۇحامەدقىزى, مەيرامبەك بەسپاەۆ, رۋحيا بايدۇكەنوۆا, الىشەر كارىموۆ, قانات جانە سۆەتلانا ايتباەۆتار, سونداي-اق استانا قالاسىنىڭ ەسترادالىق-سيمفونيالىق وركەسترى, جاس كورەرمەن مۋزىكالىق تەاترىنىڭ سوليستەرى جانە باسقا دا ونەرپازدار ءان شىرقادى. كونتسەرتكە كومپوزيتوردىڭ جۇبايى ءجاميلا قالداياقوۆا دا قۇرمەتتى قوناق رەتىندە قاتىسىپ, ۇلى مۇحتار مەن نەمەرەسى ايسۇلۋ قالداياقوۆتار ونەر كورسەتتى.
