مەركەل لوندونعا سانكتسيا سالماقشى
ۇلىبريتانيا ەۋرووداقتان شىققاننان كەيىن وداق ادامدارىنىڭ بۇل ەلدەگى قوزعالىسىنا شەكتەۋ قوياتىن بولسا, وسى ءۇشىن بەلگىلى ءبىر تولەم تولەپ تۇرۋعا ءماجبۇر ەتىلەدى. مۇنى گەرمانيا كانتسلەرى انگەلا مەركەل مالىمدەدى.
«بۇل ءبىر كەكتەنگەننەن جاسالىپ وتىرعان جوق. تەك بريتانياعا باس كەزىندە بار باسىمدىقتى الۋعا بولمايدى. ءليميتتى سوسىن ەنگىزسە دە بولادى عوي» دەيدى ول.
مەركەلدىڭ ايتۋىنشا, ەگەر لوندون ەۋرووداق ادامدارىنىڭ بريتانيادا جۇمىسقا تۇرۋلارىن شەكتەر بولسا, بۇل بەرلينگە ونشالىقتى قولايلى تيمەيدى. «بۇل بولمايدى. مۇنداي جاعدايدا ەو-نىڭ 27 مۇشە-ەلى تىعىرىقتان شىعۋدىڭ امالدارىن جابىلىپ قاراستىرادى» دەدى گەرمان ۇكىمەتىنىڭ باسشىسى.
فرانتسۋزداردىڭ 45 پايىزى ماكروننىڭ جۇمىسىن قولدادى
فرانتسيانىڭ جاڭا پرەزيدەنتى ەممانۋەل ماكروننىڭ العاشقى ءۇش كۇنگى جۇمىسىنا ەل تۇرعىندارىنىڭ 45 پايىزى قاناعاتتانارلىق دەگەن باعا بەردى.
ساراپشىلار مۇنىڭ بۇدان بۇرىنعى نيكوليا ساركازي مەن فرانسۋا وللاندتىڭ رەيتينگىلەرىنەن ايتارلىقتاي تومەن ەكەنىن دە ايتىپ وتىر. ايتالىق, 2007 جىلى قىزمەتكە كىرىسكەنىنە اپتا تولعان ساركازيگە فرانتسۋزداردىڭ 59 پايىزىنىڭ كوڭىلدەرى تولسا, 2012 جىلى وللاندتىڭ كورسەتكىشى 58 پايىزعا توقتالعان ەكەن.
ەۆروپارلامەنت سيريا جونىندە قارار قابىلدادى
ەۋروپارلامەنت سيرياداعى جاعدايعا بايلانىستى قاراردى قولدادى. وعان قاتىسقان 624 دەپۋتاتتىڭ 508-ءى قۇجاتتى قابىلداۋ ءۇشىن داۋىس بەردى, 98-ءى قارسى شىقتى, 18 ادام قالىس قالدى.
قاراردا «سيرياداعى ۇرىس گۋمانيتارلىق داعدارىستىڭ سالدارىنان ەكىنشى دۇنيەجۇزىلىك سوعىستان بەرگى ارالىقتاعى ەڭ ناشار جاعدايدا» دەلىنگەن قاراردا. كەلتىرىلگەن ستاتيستيكا بويىنشا, 2011 جىلدان بەرى بۇل جەردە 400 مىڭ ادام قازا تاپقان. «13,5 ملن استام ادام توتەنشە كومەككە, سونىڭ ىشىندە مەديتسينالىق قىزمەت پەن ازىق-تۇلىككە ءزارۋ», – دەپ اتاپ وتىلگەن قۇجاتتا. تاعى 6,3 ملن. سيريالىق ۇيلەرىن تاستاپ كەتۋگە ءماجبۇر بولعان. قاراردا رەسەي مەن يراندى «سيريا رەجيمىنە ىقپال ەتىپ, ازاماتتىق سوعىستى اياقتاتۋعا ارەكەت جاساۋ» ۇسىنىلادى.
اقش-تا سايلاۋ قورىتىندىسى قايتا قارالا ما؟
اقش-تا وتكەن پرەزيدەنت سايلاۋىنىڭ قورىتىندىسىنا رەسەيدىڭ ارالاسۋ ىقتيمالدىلىعى ماسەلەسى قايتا كوتەرىلىپ جاتىر. وندا ناۋقان كەزىندە دونالد ترامپ شتابى مەن كرەمل قىزمەتكەرلەرى اراسىندا كەلىسىمنىڭ بولۋى قانشالىقتى شىندىققا جاناسىمدى ەكەنى تەكسەرىلمەكشى.
بۇل اقش پرەزيدەنتى 10 مامىردا فبر باسشىسى دجەيمس كوميدى قىزمەتىنەن شىعارىپ تاستاۋىنان كەيىن قايتا ورىن الدى. مۇنىڭ الدىندا اقش كونگرەسى فبر-دان ترامپ پەن كومي كەزدەسۋىنىڭ جازباسىن تىڭداۋعا بەرۋدى تالاپ ەتكەن بولاتىن. بۇعان New York Times گازەتىندە اقش پرەزيدەنتىنىڭ ءوزىنىڭ ۇلتتىق قاۋىپسىزدىك جونىندەگى كەڭەسشىسى مايكل فليننگە رەسەيمەن بايلانىس توڭىرەگىندەگى كۇدىكتى جاۋىپ جىبەرۋگە بايلانىستى ءوتىنىش ايتقانى تۋرالى حابار جارىق كورۋى اسەر ەتتى. سوڭىنان ترامپ ءفلينندى قىزمەتىنەن الىپ تاستادى.
ال بۇل ماسەلەنى تەكسەرۋشى ارنايى پروكۋرور قىزمەتىنە فبر-ءدىڭ بۇرىنعى باسشىسى روبەرت ميۋللەر تاعايىندالدى.
«استانا-اقپارات».
