قازاقستاننىڭ تۇڭعىش پرەزيدەنتى رەسەي فەدەراتسياسى ۇكىمەتىنىڭ توراعاسى ميحايل ميشۋستينمەن كەزدەستى. كەزدەسۋدە نۇرسۇلتان نازارباەۆ ەكى مەملەكەت اراسىنداعى ىنتىماقتاستىقتىڭ جوعارى دەڭگەيىن اتاپ ءوتتى.
– قازىر ءبىز كۇردەلى كەزەڭدى وتكەرىپ جاتىرمىز. قازاقستان مەن رەسەي كوروناۆيرۋستىڭ تارالۋىنا جانە ونىڭ ەكونوميكاعا تيگىزەتىن سالدارىنا بايلانىستى قيىندىقتى بىرلەسە ەڭسەرۋدە. جۋىردا ۆلاديمير پۋتينمەن كەزدەسىپ, ءوزارا كەڭەستىك. جۇمىستى ءارى قاراي جالعاستىرامىز, – دەدى ەلباسى.
قازاقستاننىڭ تۇڭعىش پرەزيدەنتى ەكىجاقتى قاتىناستاردى نىعايتۋ جانە ەۋرازيا ەكونوميكالىق وداعى اياسىندا وڭىرلىك ىقپالداستىقتى ودان ءارى دامىتۋ ماسەلەلەرىنە توقتالدى.
ميحايل ميشۋستين نۇرسۇلتان نازارباەۆقا قوناقجايلىعى ءۇشىن ريزاشىلىعىن ءبىلدىرىپ, رەسەي فەدەراتسياسى پرەزيدەنتىنىڭ جىلى لەبىزىن جەتكىزدى.
رەسەي فەدەراتسياسى ۇكىمەتىنىڭ توراعاسى قازاقستانعا ساپارى اياسىندا جۇرگىزگەن كەلىسسوزدەر مەن كەزدەسۋلەردىڭ ناتيجەسى تۋرالى ايتىپ بەردى.
– ءبىز ەكىجاقتى كۇن تارتىبىندەگى ماسەلەلەردى جان-جاقتى تالقىلادىق. وسى جىلدىڭ ءبىرىنشى جارتىسىندا ەكى ەل اراسىنداعى تاۋار اينالىمى 34 پايىزعا وسكەنىن اتاپ وتكەن ءجون. بۇل كورسەتكىش پاندەمياعا دەيىنگى دەڭگەيدەن 20 پايىزعا ارتىق. جىل سوڭىنا دەيىن 20 ميلليارد دوللاردان استام مەجەگە قول جەتكىزگىمىز كەلىپ وتىر, – دەدى م.ميشۋستين.
رەسەي فەدەراتسياسى ۇكىمەتىنىڭ توراعاسى قازاقستاندا تسيفرلاندىرۋ سالاسىندا قابىلدانعان شەشىمدەرگە قاتىستى پىكىرىن ءبىلدىردى. سونداي-اق كوروناۆيرۋس ينفەكتسياسىنىڭ تارالۋىنا قارسى بىرلەسكەن شارالاردى جۇزەگە اسىرۋ ماسەلەسىنە توقتالدى.
– كەشە «ەلەكتروندى ۇكىمەتكە» ارنالعان ورتالىقتى ارالادىم. جۇمىس وتە ءتيىمدى ۇيىمداستىرىلعان. سىزدەر ءۇشىن دە اشىق ەكەنىمىزدى ايتقىم كەلەدى, ءبىزدىڭ ەشقانداي قۇپيامىز جوق: رەسەي ۇكىمەتىنىڭ ۇيلەستىرۋ ورتالىعىندا اتقارىلعان جۇمىستى ءاردايىم كورسەتىپ ءجۇرمىز. بىراق سىزدەردىڭ سوڭعى زاماناۋي جاڭالىقتاردى جىلدام ەنگىزىپ جاتقاندارىڭىز مەنى تاڭعالدىردى. كوروناۆيرۋسقا كەلەر بولساق, ءبىز بۇل قاتەرلى ۆيرۋسقا قارسى كۇرەستە قولدان كەلگەننىڭ ءبارىن جاساپ جاتىرمىز. بۇگىندە «Sputnik V» ۆاكتسيناسى قاراعاندى فارماتسەۆتيكالىق زاۋىتىندا جاسالادى. ونىڭ 5 ميلليون دوزادان استامى شىعارىلدى. بۇل – ۇلكەن جۇمىس. قورىتا ايتقاندا, ءبىز باۋىرلاس تاتۋ كورشىلىك قاتىناستاردى جوعارى باعالايمىز. الداعى ۋاقىتتا دا ەكىجاقتى ىنتىماقتاستىقتى, سونداي-اق ەۋرازيا ەكونوميكالىق وداعى اياسىنداعى قارىم-قاتىناستى جان-جاقتى دامىتقىمىز كەلەدى, – دەدى م.ميشۋستين.
