باراك وباما – پروديۋسەر
اقش-تىڭ بۇرىنعى پرەزيدەنتى باراك وباما مەن زايىبى ميشەل Netflix كومپانياسىمەن فيلمدەر مەن سەريالدارعا پروديۋسەرلىك ەتۋ تۋرالى كوپ جىلعى كەلىسىمشارتقا قول قويدى. ەرلى-زايىپتىلار بۇل باعىتتا كادر سىرتىندا عانا ەمەس, كادر ىشىندە دە جۇمىس ىستەيتىن بولادى.
وباما پرەزيدەنتتىك قىزمەتتەن كەتكەن سوڭ ۇزاق ۋاقىتقا دەمالىس الاتىنىن مالىمدەگەن ەدى. سول دەمالىسى اياقتالعان سەكىلدى. كۇنى كەشە عانا باراك جانە ميشەل وبامالارمەن كەلىسىمشارتقا وتىرعانىن حابارلاعان Netfliح ونىڭ سوماسىن جاريالامادى.
اقش-تىڭ بۇرىنعى پرەزيدەنتى زايىبىمەن بىرگە اتالمىش كومپانياعا فيلمدەردى, سەريالداردى تۇسىرەدى. ونىڭ ىشىندە دەرەكتى, عىلىمي-تانىمال تۋىندىلاردى جاساپ, ادەبي شىعارمالاردى ەكرانعا شىعارۋمەن اينالىسۋى مۇمكىن. ول ءۇشىن Higher Ground Productions اتالاتىن كومپانيانى دا قۇردى.
تمد-نى تارك ەتتى
ۋكراينا تمد شەڭبەرىندەگى جەكەلەگەن حالىقارالىق كەلىسىمدەردىڭ كۇشىن توقتاتتى. ول ەلدىڭ پرەزيدەنتى پەتر پوروشەنكونىڭ ءتيىستى جارلىعىمەن جۇزەگە استى.
اتالمىش قۇجاتتى: «ۋكراينا كونستيتۋتسياسىنىڭ 107-بابىنا سايكەس قاۋلى قابىلدايمىن: ۋكراينا ۇلتتىق قاۋىپسىزدىك جانە قورعانىس كەڭەسىنىڭ 2018 جىلعى 2 مامىرداعى «ۋكراينا
ءۇشىن تاۋەلسىز مەملەكەتتەر دوستاستىعىنىڭ شەڭبەرىندە جاسالعان جەكەلەگەن حالىقارالىق كەلىسىمدەر ارەكەتىن توقتاتۋ تۋرالى» شەشىمى كۇشىنە ەنگىزىلسىن» دەلىنگەن.
جارلىققا 19 مامىردا قول قويىلىپتى. سول كۇنى مەملەكەت باسشىسى: «ەندى وندا اتقاراتىن ەشتەڭە قالعان جوق, ءبىز ەۋروپاعا قاراي جىلجيمىز» دەگەن ۋاجبەن ەلدىڭ تمد-نىڭ جارعىلىق ورگاندارىنداعى ۋاكىلدەرىن تۇگەل كەرى شاقىرتىپ الدى.
ۋكراينادا تمد قۇرامىنان شىعۋ دايىندىعى ءساۋىر ايىندا باستالعان ەدى. بىراق تمد اتقارۋ كوميتەتى بۇدان كەيىن دە بۇل ەلدىڭ وكىلدەرىن وتىرىستار مەن شارالارعا شاقىرا بەرەتىن بولىپ وتىر. ۇيىمداعىلار مۇنى, وداقتان شىققاندارىن جاريالاعانىمەن, كيەۆتەن رەسمي قاتىناستىڭ كەلمەگەنىمەن ءتۇسىندىرىپ وتىر.
دوستاستىق 1991 جىلعى جەلتوقساندا قۇرىلعان. ونىڭ نەگىزىن رەسەي, ۋكراينا جانە بەلارۋس قالادى. كەيىن ونىڭ قۇرامىنا پريبالتيكادان بولەك, بارلىق بۇرىنعى وداقتاس رەسپۋبليكالار كىردى.
يران ىعاتىن ەمەس
اقش يرانعا قارسى سانكتسيا ەنگىزۋگە كىرىسىپ كەتتى. كەشە قۇراما شتاتتاردىڭ مەملەكەتتىك حاتشىسى مايكل پومپەو تەگەرانعا 12 ءتۇرلى تالاپ قويىلاتىنىن مالىمدەدى.
بىراق بۇدان ىعا قويايىن دەپ وتىرعان يران جوق. پارسى ەلىنىڭ باسشىلىعى ەندى ۆاشينگتوندى «سوتقا سۇيرەپ اۋرەلەيتىنىن» ءبىلدىردى. ولاردىڭ پايىمىنشا, مۇحيتتىڭ ارعى جاعالاۋىندا دەرجاۆا ەگەمەن ەلدىڭ ىشكى ىستەرىنە ارالاسىپ, تاۋەلسىزدىگىنە قاتەر ءتوندىرىپ كەلەدى.
يران جاعى قازىر ەۋروپا وداعىنىڭ اق ءۇي جاساعان ۋلتيماتۋمعا قالاي جاۋاپ بەرەتىنىن كۇتىپ وتىر. ەگەر وداق ۆاشينگتوننىڭ ايتقانىمەن كەتىپ, سانكتسيا جاريالايتىن بولسا, ول ءوزىنىڭ يادرولىق باعدارلاماسىنا قايتا ورالاتىنىن اشىپ ايتتى. كۇللى الەمدى الاڭداتىپ وتىرعان دا وسى ماسەلە. جاعدايدىڭ مۇنداي اينالىم الىپ كەتۋىنە اقش-تىڭ گەرمانيا, فرانتسيا, بريتانيا سياقتى وداقتاستارىنىڭ قاي-قايسىسى دا كەلىسىپ وتىرعان جوق. ولار ۆاشينگتوننىڭ يران يادرولىق كەلىسىمىنەن شىعۋىنا قارسى شىققان بولاتىن.
ال كەشە كەشكە ەۋروپا وداعىنىڭ كەزەكتى وتىرىسى باستالدى. وندا اقش پەن يران اراسىنداعى ماسەلە دە قارالماقشى.
