سوڭعى ۋاقىتتا ءوزىنىڭ پىكىرىن ءجيى الماستىرىپ, تەز وزگەرىپ كەتە بەرەتىن قىلىعىمەن الەم جۇرتشىلىعىنا تانىلىپ قالعان اقش پرەزيدەنتى دونالد ترامپ كەشە تاعى اۋناپ ءتۇستى. سونىڭ الدىندا عانا كحدر ليدەرى كيم چەن ىن مىرزامەن 12 ماۋسىم كۇنى سينگاپۋردە وتكىزىلەتىن بولىپ الدىن الا بەلگىلەنىپ قويىلعان كەزدەسۋىنەن باس تارتاتىنىن مالىمدەپ ۇلگەرگەن ول ەندى بۇل كەلىسسوزدىڭ ايتىلعان مەرزىمىندە وتكىزىلۋى مۇمكىن ەكەنىن ايتىپ وتىر. وسىعان وراي, اقش دەلەگاتسياسى كەلىسىپ الۋ ءۇشىن كورەياعا ۇشىپ كەتسە, پحەنيان كەزدەسۋدى دايىنداۋ ءۇشىن ءوز ادامدارىن سينگاپۋرگە جونەلتتى.
سوڭعى بىرەر كۇندە جاھان جۇرتىنىڭ قۇلاعىن ەلەڭ ەتكىزگەن تاعى بىرقاتار وقيعالار بولدى.
تۇركيا دوللاردان باس تارتا ما؟
تۇركيانىڭ پرەزيدەنتى رەدجەپ تايپ ەردوعان ەلدىڭ تۇرعىندارىن قولدارىندا بار دوللارلارىن تۇرىكتىڭ ليراسىنا اۋىستىرۋعا شاقىردى.
انادولى جەرىنىڭ بيلەۋشىسى مۇنى ۇلتتىق ۆاليۋتا باعاسىنىڭ ءتۇسۋىن توقتاتۋ كەرەكتىگىمەن بايلانىستىرىپ, الداعى ۋاقىتتا دوللار مەن ەۋرونى اينالىمنان شىعارۋعا باعىت ۇستالاتىنىن جەتكىزدى.
بۇدان بۇرىن پرەمەر-مينيستر مەۆليۋت چاۆۋشوگلۋ تۇركيا جاۋلارىنىڭ 2016 جىلعى شىلدەدە ەلدە مەملەكەتتىك توڭكەرىس جاساۋعا ارەكەت ەتكەن كەزدەرىندە بۇعان تۇرىك ليراسىنىڭ باعامىن ءتۇسىرۋ جولىمەن قول جەتكىزبەك بولعانىن ايتقان بولاتىن.
تۇرىك ليراسىنىڭ اقش دوللارىنا قاتىستى باعامى وتكەن اپتادا تاعى ارزانداپ, ءوزىنىڭ تاريحي تومەن دەڭگەيىنە ءتۇستى. قازىر 1 دوللاردىڭ قۇنى 4,93 ليرا تۇرادى. سوڭعى ەكى ايدا تۇرىك ۆاليۋتاسى بىرنەشە رەت وزگەرىسكە كوشىپ, دوللار مەن ەۋرونىڭ بۇرىن-سوڭدى بولماعان دەڭگەيىنە تومەندەدى.
ول تەك سوڭعى ايدىڭ وزىندە عانا 15 پايىزعا ارزانداپ كەتتى.
بەرلين شەرۋ الاڭىنا اينالدى
گەرمانيانىڭ استاناسى – بەرلين قالاسىندا بۇرناعى كۇنى 25 مىڭ ادام قارسىلىق شاراسىن وتكىزدى.
شاھار كوشەلەرىنىڭ بويىنا الدىمەن «گەرمانيا ءۇشىن بالاما» وڭشىل پارتياسى ۇيىمداستىرعان شەرۋگە قاتىسۋشى 5 مىڭ ادام شىقتى. ولار «بولاشاق گەرمانياعا تيەسىلى بولۋى كەرەك» دەگەن ۇران كوتەرىپ, كوشى-قون ساياساتىن قايتا قاراۋدى, ەلدى «مۇسىلمانداندىرۋ» ۇدەرىسىن توقتاتۋدى تالاپ ەتتى.
مۇنىڭ ارتىنشا قالانىڭ كەلەسى قاپتالىنان وڭشىل ناتسيستەرگە قارسى باعىتتاعى 20 مىڭنان استام ادامنان قۇرالعان شەرۋشىلەر توبى ساپ تۇزەدى. ولار قارسىلاستارىنىڭ ءناسىلدىك توزگىسىزدىكتەرىن قاتتى ايىپتادى. اكتسياعا قاتىسۋشىلار قولدارىنا وسىعان قاتىستى ۇراندار ۇستاپ شىقتى. ارالارىنداعى بىرنەشە مىڭ بەلسەندى رەيحستاگ الدىنداعى الاڭمەن ءجۇرىپ ءوتتى.
«بريتانيا كەشىرىم سۇراۋعا ءتيىس»
ۇلىبريتانيا سولسبەريدە ۇيىمداستىرىلعان وقيعا ءۇشىن رەسەيدەن كەشىرىم سۇراۋى كەرەك. رەسەيدىڭ بريتانياداعى ەلشىلىگىنىڭ پرەسس-اتتاشەسى وسىنداي مالىمدەمە جاسادى.
«رەسمي مالىمدەمەلەر مەن ءباسپاسوز حابارلارىنان جۇرتتىڭ بارىنە ءمالىم, بريتانيا كلاسسيفيكاتسياسى بويىنشا جاسالعان ا-234 ۋلاۋشى زاتى باتىستىڭ ونداعان ەلدەرىندە شىعارىلادى. ءومىردىڭ ءوزى بريتانيانىڭ بۇعان رەسەيدى كىنالاۋى ەشبىر نەگىزسىز ەكەنىن كورسەتتى» دەدى ەلشىلىك وكىلى جۋرناليستەرمەن كەزدەسۋىندە.
ەلشىلىكتە سونداي-اق «بريتانيا جاعىنىڭ رەسەي تاراپىنان بەرىلگەن رەسمي ساۋالدارعا جاۋاپ بەرەتىن كەزى كەلگەنى» اتاپ كورسەتىلدى. ديپلومات سونداي-اق سەرگەي سكريپال مەن ونىڭ قىزىن وقشاۋلاۋدى توقتاتۋدىڭ قاجەتتىگىن ايتتى.
