750 ملن ادام ساۋاتسىز
يۋنەسكو مالىمەتى كوپشىلىكتى تاڭداي قاقتىرىپ وتىر.
اتالعان ۇيىمنىڭ مالىمەتى بويىنشا دۇنيە جۇزىندە ساۋاتسىزدىق دەڭگەيى تولاستار ەمەس. قازىرگى ۋاقىتتا الەمدە 750 ملن ادام وقىپ تا, جازا دا المايدى ەكەن. ال ونىڭ باسىم بولىگى ايەل ادامدار كورىنەدى.
ساۋاتىن اشپاعانداردىڭ 45 پايىزى – وڭتۇستىك ازيا, 27 پايىزى – قارا افريكا (ساحارا ءشولىنىڭ وڭتۇستىك ايماعى), 10 پايىزى – شىعىس جانە وڭتۇستىك-شىعىس ازيا, 9 پايىزى – سولتۇستىك افريكا جانە باتىس ازيا, 4 پايىزى لاتىن امەريكاسى مەن كاريب باسسەينى ەلدەرىندە ءومىر سۇرەدى.
سمارتفونعا شەكتەۋ قويدى
موڭعوليانىڭ مينيسترلەر كابينەتى جالپى ءبىلىم بەرۋ مەكتەپتەرى مەن باسقا دا وقۋ ورىندارى اۋماعىندا سمارتفوندار قولدانۋعا شەكتەۋ قويۋ تۋرالى شەشىم قابىلدادى. ۇكىمەتتىڭ بۇل قاۋلىسى وسى جىلدىڭ 1 قازانىنان باستاپ كۇشىنە ەنەدى.
بۇگىندە موڭعوليادا 8-17 جاس ارالىعىنداعى بالالاردىڭ 71,8 پايىزى ۇيالى تەلەفوندى بەلسەندى قولدانادى. ونىڭ 54,6 پايىزىندا ينتەرنەت قوسىلعان. عالىمدار مەن دارىگەرلەر 12 جاسقا تولماعان بالالارعا سمارتفون بەرۋگە بولمايتىنىن ەسكەرتەدى. سەبەبى جوعارى دالدىكتەگى ەلەكتروماگنيتتىك ساۋلەلەر بالالاردىڭ دەنساۋلىعىنا زيان كەلتىرەدى.
دجەك ما ALIBABA باسشىلىعىنان كەتەدى
قىتايداعى ەڭ ءىرى ەلەكتروندى ساۋدا كورپوراتسياسى – Alibaba-نىڭ نەگىزىن قالاعان ايگىلى ميللياردەر دجەك ما كەلەسى جىلى قىزمەتىنەن كەتەتىنىن مالىمدەدى.
بۇل اقپارات Alibaba Group تاراتقان بايانداما ارقىلى بەلگىلى بولدى. دجەك مانىڭ ايتۋىنشا, بۇل شەشىمدى سوڭعى 10 جىل بويى ويلانىپ كەلگەن ەكەن. ەندى ارى قاراي ءوزى ءسۇيىپ ىستەيتىن ءبىلىم سالاسىندا قىزمەت ەتۋدى ءجون كورىپ وتىر.
– بۇگىن اlibaba-نىڭ قۇرىلعانىنا 19 جىل تولىپ وتىر. ەندى كەلەر جىلدىڭ ءدال وسى كۇنى, ياعني 2019 جىلدىڭ 10 قىركۇيەگىندە Alibaba Group كورپوراتسياسى باسقارما كەڭەسىنىڭ توراعاسى قىزمەتىنەن كەتەتىنىمدى ايتقىم كەلەدى, – دەلىنگەن كومپانيانىڭ الەۋمەتتىك جەلىدەگى رەسمي Weibo پاراقشاسىندا تاراعان دجەك مانىڭ حابارلاماسىندا.
ايان ءابدۋالي
