پرەمەر-مينيستر وتستاۆكاعا كەتتى
بەلگيا پرەمەر-ءمينيسترى شارل ميشەل وتستاۆكاعا كەتتى. بۇل تۋرالى ول سەيسەنبى كۇنگى پارلامەنت وتىرىسىندا ءمالىم ەتتى دەپ حابارلايدى RTBF تەلەارناسى.
«مەنىڭ ۇسىنىستارىم قولداۋ تاپپادى, سوزىمە ەشكىمدى سەندىرە المايتىنىمدى ءبىلىپ وتىرمىن. سوندىقتان قىزمەتىمنەن كەتەتىنىم تۋرالى ءوتىنىش بەرەمىن» دەدى ۇكىمەت باسشىسى.
بەلگيا ۇكىمەتىندەگى داعدارىس جەلتوقسان ايىنىڭ باسىنان باستالدى. بۇۇ-نىڭ كوشى-قون تۋرالى كەلىسىمىن قۇپتاي الماعان بىرنەشە مينيستر وتستاۆكاعا كەتكەن. ال ولاردىڭ قىزمەتىن ۇكىمەت باسشىسى ۋاقىتشا ءوز قولىنا العان بولاتىن.
كۇنگە جەتىپ قالىپتى
«پاركەر» اپپاراتى كۇن عالامشارىنا رەكوردتى دەڭگەيدە جاقىن ۇشىپ جەتتى.
عالىمدار اپپارات ارقىلى تۇسىرىلگەن فوتولاردان پلانەتانىڭ عارىشقا شىعاراتىن پلازمالارىن, سول سياقتى ونىڭ تەمپەراتۋراسىن زەرتتەمەك. ناسا «پاركەردى» وسى جىلدىڭ 12 تامىزىندا اتتاندىرعان. ول مەجەلەنگەن جەرگە ساعاتىنا 375 مىڭ شاقىرىم جىلدامدىقپەن ۇشقان. ال وسىعان دەيىنگى ەڭ جىلدامى 250 مىڭ شاقىرىمعا دەيىن جەتىپتى.
BBC مالىمەتى بويىنشا «پاركەر» كۇنگە 6,12 ملن شاقىرىمعا جاقىنداعان. ال وسىعان دەيىنگى اپپارات 1976 جىلى 43 ملن شاقىرىمعا جاقىن جەتىپتى.
4400 جىل بۇرىنعى مولا
ەگيپەتتە 4400 جىل بۇرىن كومىلگەن مولانىڭ ورنى تابىلدى. ول كاير قالاسىنان 30 شاقىرىم قاشىقتىقتا ورنالاسقان ساككارا ەلدى مەكەنىندەگى پيراميدالار كەشەنىنەن انىقتالدى.
ارحەولوگتاردىڭ ءمالىمەتى بويىنشا مۇردە ءبىزدىڭ داۋىرىمىزگە دەيىنگى 2504-2347 جىلدار ارالىعىندا ءومىر سۇرگەن پەرعاۋىنداردىڭ بەسىنشى اۋلەتى كەزىندەگى جوعارى شەنەۋنىكتەردىڭ بىرىنە تيەسىلى.
بۇل زيراتتىڭ ورنىن بۇگىنگە دەيىن ەشكىم بىلمەگەن. ماماندار ۋاقىت سوزباي زەرتتەۋ جۇمىستارىنا بىردەن كىرىسىپ كەتتى. قابىرعالارداعى ءتۇرلى يەروگليف جازۋلارى, ولاردىڭ 4400 جىل وتسە دە قانىق تۇستەرى ارحەولوگتاردىڭ قىزىعۋشىلىعىن تۋدىرىپ وتىر.
