ساۋساق تاڭباسى – كولىك كىلتى
وڭتۇستىككورەيالىق اۆتو وندىرۋشىلەر ساۋساق تاڭباسىمەن وتالدىرۋعا بولاتىن كولىكتەردى ىسكە قوسپاق.
Hyundai كومپانياسى كادىمگى سمارتفونداردىڭ بەتىن كودسىز ساۋساق تابىمەن اشاتىنى سياقتى كولىكتەردىڭ ەسىگىن دە كىلتسىز اشۋعا بولاتىنىن ايتادى. ءتىپتى جۇرگىزە دە الاسىز. ءاربىر كولىكتە ەكى سەنسوردان بولادى. ءبىرى سىرتىندا كىرىپ-شىعۋعا, ەكىنشىسى ءرولدىڭ جانىندا كولىكتى وتالدىرۋعا باعىتتالادى. ەگەر كولىكتىڭ بىرنەشە جۇرگىزۋشىسى بولسا, ولاردىڭ ارقايسىسىن جەكە-جەكە تانىپ, ارقايسىسىنىڭ ىڭعايىنا قاراي ورىندىعى, ءرولى, ايناسى جانە باسقا دا پارامەترلەرى اۆتوماتتى تۇردە وزگەرەدى.
بۇل جاڭا جۇيەمەن ىسكە قوسىلاتىن ءبىرىنشى كولىك Hyundai Santa Fe كروسسوۆەرى بولادى. ول 2019 جىلدىڭ ءبىرىنشى جارتىسىندا شىقپاق.
روجدەستۆو تويلانبايدى
قىتايدىڭ حەبەي پروۆينتسياسىنا قاراستى لانفان قالاسىندا روجدەستۆو مەرەكەسى تويلانبايتىن بولدى. جەرگىلىكتى بيلىك بۇل مەيرامنىڭ اتاپ وتىلۋىنە تىيىم سالدى.
South China Morning Post باسىلىمى كوشەلەرگە شىرشالار ءىلىنىپ, ءتۇرلى مەرەكەلىك اتريبۋتيكانى قولدانۋعا, ولاردى ساتۋعا, سونداي-اق وسى مەيرامعا وراي ءىس-شارالار ۇيىمداستىرۋعا شەكتەۋ قويىلعانىن حابارلادى.
بۇعان قوسا قالا تۇرعىندارىنىڭ ءوز تەرەزەلەرىن روجدەستۆوعا قاتىستى ءتۇرلى زاتتارمەن ساندەۋگە بولمايدى. وسىعان بايلانىستى 23-25 جەلتوقسان ارالىعىندا قۇقىق قورعاۋ ورگاندارىنىڭ بۇكىل شتاتى مەرەكەنى تويلاۋدىڭ الدىن الۋ ءۇشىن قالانى كۇزەتۋگە شىقپاق.
«قازىناعا» تولى عالامشارلار
شۆەيتساريا مەن ۇلىبريتانيا ۋنيۆەرسيتەتتەرىنىڭ عالىمدارى بىرلەسە وتىرىپ, «قازىناعا» تولى عالامشارلاردى تاپتى.
عالىمدار ازىرگە ءۇش پلانەتانى انىقتادى. ولاردىڭ ءبىرى «HD 219134 b» دەپ اتالادى. ول جەردەن 21 جارىق جىل قاشىقتىقتا ورنالاسقان. ال ەكىنشىسىنە «55 Cancri» دەگەن اتاۋ بەرىلگەن. بۇل عالامشار جەردەن 41 جارىق جىل قاشىقتىقتا ورنالاسقان. ءۇشىنشىسى – «WASP-47 e». ول تىپتەن الىس, شامامەن 870 جارىق جىل مولشەرىندە ورنالاسقان. ولار شاڭ مەن گازدان قۇرالىپ, ۇلكەن پلانەتا بولىپ قالىپتاسقان كورىنەدى. وسىنىڭ اسەرىنەن مۇندا كرەمني, تەمىر, ماگني سەكىلدى ەلەمەنتتەر پايدا بولعان. ال «55 Cancri» پلانەتاسىنىڭ الىپ الماز تاسقا ۇقسايتىنى Astrophysical Journal Letters جۋرنالىنا جاريالانعان.
جارىق جىلى – جارىقتىڭ ءبىر جىلدا ءوتىپ شىعاتىن قاشىقتىعى.
