قوعامدىق كولىككە ارنالعان ەلەكتروندى كارتاعا سۋرەتكە ءتۇسۋ ءراسىمى باستالدى. بۇل شارانى استانا قالالىق جولاۋشىلار كولىگى جانە اۆتوموبيل جولدارى باسقارماسى مەن «Astana LRT» كومپانياسى بىرلەسىپ ۇيىمداستىرىپ وتىر.
بۇگىندە سارىارقا, ەسىل جانە الماتى اۋداندارى بويىنشا 25 فوتوتىركەۋ پۋنكتى اشىلعان. «سۋرەتكە ءتۇسۋ دە, كارتانى دايىنداۋ دا تەگىن. بۇل كارتالار ەلەكتروندى جۇيە ەنگىزىلگەن سوڭ يەلەرىنە تابىستالادى» دەلىنگەن قالالىق اكىمدىكتىڭ رەسمي سايتىندا.
جول ءجۇرۋ قۇنىن ەلەكتروندى كارتا ارقىلى تولەۋ قوعامدىق كولىكتەگى بىرنەشە ماسەلەلەردى جويماقشى. ءبىر رەتتىك جول ءجۇرۋ بيلەتتەرى مەن جولاۋشىلار سانى جايلى ناقتى اقپاراتتىڭ بولماۋى, قوعامدىق كولىك قىزمەتكەرلەرىنىڭ كىرىس سوماسىن جاسىرۋى جانە اقشالاي تولەۋدىڭ ىڭعايسىزدىقتارى ەندى شەشىلەتىن بولادى.
استانادا 90 مىڭنان استام ازامات جەڭىلدىكپەن جول ءجۇرۋ قۇقىنا يە ەكەن. ولارعا ۇلى وتان سوعىسىنىڭ ارداگەرلەرى, زەينەتكەرلەر, مەملەكەت تاراپىنان الەۋمەتتىك جاردەماقى الاتىندار, كوپبالالى وتباسىلار, مۇمكىندىگى شەكتەۋلى جاندار, ستۋدەنتتەر جانە مەكتەپ وقۋشىلارى كىرەدى.
فوتوتىركەۋ تامىز ايىنىڭ سوڭىنا دەيىن جۇرەدى. سۋرەتكە ءتۇسۋ ءۇشىن جەكە كۋالىكتى قوسا الىپ بارۋ قاجەت. قوسىمشا تۋىنداعان سۇراقتاردى 57-47-77 نومىرىنەن بىلە الاسىزدار.
