استانا ۆوكزالىندا ەلەكتروندى ساتۋ ورتالىعى اشىلدى. جوبا جولاۋشىلارعا كورسەتىلەتىن قىزمەت ساپاسىن ارتتىرۋدى جانە تەمىرجول كولىگىندە زاماناۋي قىزمەت تۇرلەرىن دامىتۋدى كوزدەيدى.
ەلەكتروندى ساتۋ ورتالىعى حالىققا قولما-قول نەمەسە ەلەكتروندى اقشا ارقىلى اۆتوماتتاندىرىلعان قىزمەت كورسەتۋ كاسسالارى ارقىلى بيلەت ساتۋدىڭ جاڭا ءادىسىن ۇسىنادى. ارناۋلى بيلەت ساتۋ زالىندا 16 ەلەكتروندى بيلەت كاسساسى ورناتىلعان. وعان قوسىمشا ون قاراپايىم كاسسا حالىققا قىزمەت كورسەتەدى. «ءبىزدىڭ بۇل تەحنولوگيانى ەنگىزۋدەگى ماقساتىمىز – جولاۋشىلاردىڭ تەز ءارى جايلى جاعدايدا بيلەت ساتىپ الۋىن قامتاماسىز ەتۋ» دەيدى ەلەكتروندى ساتۋ زالىنىڭ اشىلۋ سالتاناتىندا ءسوز سويلەگەن «جولاۋشىلار تاسىمالى» اق پرەزيدەنتى ەرمەك تولەگەنوۆ.
