ەلەۋلى ەڭبەكتەر
كەشە قر ۇلتتىق اكادەميالىق كىتاپحاناسىندا تۇركى اكادەمياسى حالىقارالىق ۇيىمى شىعارعان كىتاپتاردىڭ جانە www.twesco.org عىلىمي-تانىمدىق پورتالىنىڭ تانىستىرىلىمى ءوتتى. شاراعا كىتاپ اۆتورلارى, بەلگىلى عالىمدار, مادەنيەت جانە قوعام قايراتكەرلەرى قاتىستى.
سالتاناتتى جيىندى قر مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ اشىپ, اكادەميانىڭ تۇتاس تۇركى الەمىنىڭ رۋحاني مۇرالارىن ناسيحاتتاۋداعى ۇشان-تەڭىز ەڭبەگىن اتاپ ءوتتى. ودان كەيىن ءسوز العان كورنەكتى مەملەكەت قايراتكەرى, پروفەسسور مىرزاتاي جولداسبەكوۆ اتالعان ۇيىمنىڭ شىن مانىندە تۇركىتانۋ عىلىمىنىڭ تىرەگىنە اينالعانىن ايتىپ, ءسوزىن ناقتى مىسالدارمەن ادىپتەدى.
تۇركى اكادەمياسىنىڭ پرەزيدەنتى دارحان قىدىرالىنىڭ ايتۋىنشا, اكادەميا قۇرىلعان كۇننەن بەرى, ناقتىلاپ ايتساق بەس جىل ىشىندە ءارتۇرلى باعىتتاعى 93 كىتاپ شىعارعان. سونىڭ ىشىندە بىلتىر 42 كىتاپ وقىرمانعا جول تارتتى. اتاپ ايتساق, تاريح عىلىمىنىڭ دوكتورى احمەت توقتابايدىڭ «تۇركى حالىقتارىنىڭ جىلقى مادەنيەتى» ەڭبەگى, «ءاليحان بوكەيحان جانە تۇركى ءدۇنيەسى» كىتابى (قۇراستىرعان سۇلتانحان اققۇلىۇلى), كورنەكتى عالىم مەكەمتاس مىرزاحمەتۇلىنىڭ «مۇحتار اۋەزوۆ – ابايتانۋشى عۇلاما», «ابايدى وقى, تاڭىرقا», «حاكىم ابايدى تانىپ ءبىلۋدىڭ 125 جىلدىق تاريحىنان (1889-2014)» اتتى ءۇش ەڭبەگى, ت.ب. كىتاپتار بار. جالپى, وتكەن جىلدىڭ باستى وقيعاسى – قازاق حاندىعىنىڭ 550 جىلدىعىنا ارنالىپ ەكى ەڭبەك جاريالاندى. تاريح, ارحەولوگيا جانە ەتنوگرافيا سالالارى بويىنشا – 15, ادەبيەت, فولكلور, جانە ونەر تاقىرىپتارىن قامتىعان – 13, لينگۆيستيكا سالاسىنىڭ وزەكتى ماسەلەلەرىن قوزعاعان – 6 جانە «تۇعىرلى تۇلعالار» سەرياسىمەن تاعى وسىنشاما كىتاپ شىقتى.
تۇركى اكادەمياسى حالىقارالىق ۇيىمى شىعارعان كىتاپتاردىڭ ءبارى دە قر ۇلتتىق اكادەميالىق كىتاپحاناسىنا تارتۋ ەتىلدى.
امانعالي قالجانوۆ
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.