كەشە استانا اكىمى ادىلبەك جاقسىبەكوۆ مىسىر اراب رەسپۋبليكاسىنىڭ تۇرعىن ءۇي ىستەرى, كوممۋنالدىق شارۋاشىلىق جانە قالالىق دامۋ ءمينيسترى مۇستافا مادبۋلي باستاعان دەلەگاتسيامەن كەزدەستى. شەتەلدىك قوناقتار قازاقستاننىڭ ەلوردانى اۋىستىرۋ بويىنشا تاجىريبەسىنە قىزىعۋشىلىق تانىتتى.
ادىلبەك جاقسىبەكوۆ قازاقستاننىڭ جاڭا استاناسىن سالۋ تۋرالى شەشىمدى مەملەكەت باسشىسى قابىلداعانىن جەتكىزدى. باس قالا قىسقا ۋاقىتتىڭ ىشىندە ەكونوميكالىق جانە الەۋمەتتىك تۇراقتى, گۇلدەنگەن دەموكراتيالىق مەملەكەتتىڭ جاڭا كەلبەتىنە اينالدى.
«العاشقى كۇننەن باستاپ قۇرىلىستىڭ جوعارى قارقىنى بەلگىلەنىپ, العا بىرقاتار مىندەتتەر قويىلدى. بۇگىندە استانا ۇلتتىق يدەيانىڭ كورىنىسى, قازاقستان تاريحىنداعى جاڭا ءداۋىردىڭ سيمۆولى ىسپەتتى» دەدى شاھار باسشىسى.
اراب دەلەگاتسياسى وسى ساپارى بارىسىندا ەلوردانىڭ ماڭىزدى نىساندارىن ارالاپ, جالعاسىپ جاتقان قۇرىلىستىڭ اۋقىمىمەن تانىسقان-دى. بۇل رەتتە مىسىردىڭ قورعانىس جانە اسكەري ونەركاسىپ ۆيتسە-ءمينيسترى, قارۋلى كۇشتەردى ينجەنەرلىك باسقارۋدىڭ باستىعى كامەل ابدەلحادي فاراگ ۋازير استانادان شابىت العاندارىن ايتتى. «قۇرىلىس سالاسىندا 38 جىلعا جۋىق ۋاقىتتان بەرى ەڭبەك ەتىپ كەلەمىن. سوندىقتان استانانى سالۋعا بىلىكتى ماماندار, قۇرىلىسشىلار, ساۋلەتشىلەر تارتىلعانىنا سەنىمدىمىن. بىزبەن بولىسكەلى وتىرعان ءتاجىريبەلەرىڭىزدى جاڭا استانامىزدىڭ قۇرىلىسىندا پايدالاناتىن بولامىز» دەدى ول.
كەزدەسۋ كەزىندە قوناقتار ەلوردانىڭ 18 جىل ىشىندەگى دامۋ ۇردىسىمەن تانىسىپ, اباتتاندىرۋ, كوگالداندىرۋ جانە قالانىڭ تىنىس-تىرشىلىگىنە يننوۆاتسيالىق تەحنولوگيالاردى ەنگىزۋ ماسەلەلەرىن تالقىلادى. كەلەر جىلى وتەتىن «ەكسپو – 2017» حالىقارالىق مامانداندىرىلعان كورمەسىنە دە ەرەكشە نازار اۋدارىلدى.
جيىننان سوڭ مىسىرلىق دەلەگاتسيا «استانا باس جوسپارى» عىلىمي زەرتتەۋ-جوبالاۋ ينستيتۋتىنا باردى. استانا اكىمىنىڭ ءبىرىنشى ورىنباسارى سەرگەي حوروشۋن شەتەلدىك قوناقتاردى قالانىڭ دامۋىمەن ەگجەي-تەگجەيلى تانىستىردى.
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
