بيىل 9 ايدىڭ قورىتىندىسى بويىنشا «نۇرلى جەر» مەملەكەتتىك باعدارلاماسى شەڭبەرىندە 8,8 ملن شارشى مەتر تۇرعىن ءۇي پايدالانۋعا بەرىلگەن.
بۇل كورسەتكىش وتكەن جىلدىڭ 9 ايىمەن سالىستىرعاندا 11,6 پايىزعا جوعارى. ال تۇرعىن ۇيلەردى پايدالانۋعا بەرۋ كولەمى جاعىنان استانا قالاسى (1,8 ملن شارشى مەتر) كوش باستاپ كەلەدى. ەكىنشى ورىندا الماتى (1,3 ملن شارشى مەتر) قالاسى جانە ءۇشىنشى ورىندا ماڭعىستاۋ وبلىسى (910,5 مىڭ شارشى مەتر) ورنالاسقان. مۇنداي جاڭالىق ۇكىمەت وتىرىسىندا جاريا بولدى.
جالپى العاندا, 2018 جىلى 12,1 ملن شارشى مەتر تۇرعىن ۇيلەردى پايدالانۋعا بەرۋ جوسپارلانىپ وتىر. ونىڭ ىشىندە 1,3 ملن شارشى مەتر نەمەسە 22 مىڭ پاتەر مەملەكەتتىك ينۆەستيتسيا ەسەبىنەن تاپسىرىلادى. ەندى وسىلاردى تاراتىپ ايتالىق. ەلىمىز بويىنشا 3470 پاتەر ساتىپ الۋ مۇمكىندىگىنسىز جالعا بەرىلەتىن ۇيلەردەن, 9793 پاتەر نەسيەلىك تۇرعىن ۇيلەردەن بەرىلەدى. قازاقستان يپوتەكالىق كومپانياسى ساتىپ الۋ مۇمكىندىگىمەن جالعا بەرىلەتىن 1542 پاتەر, جىلجىمايتىن مۇلىك قورى كوممەرتسيالىق جانە جالعا بەرىلەتىن تۇرعىن ۇيلەردەن 7282 پاتەر, «بايتەرەك دەۆەلوپمەنت» كومپانياسى 588 پاتەر تاپسىرادى.
ۇكىمەتتە ەسەپ بەرگەن ينۆەستيتسيالار جانە دامۋ ءمينيسترى جەڭىس قاسىمبەك 2018 جىلى مەملەكەتتىك باعدارلامانى ىسكە اسىرۋعا رەسپۋبليكالىق بيۋدجەتتەن 148,6 ملرد تەڭگە بولىنگەنىن ءمالىم ەتتى. باسپانانى پايدالانۋعا بەرۋ ءوسىمىنىڭ قارقىنى شىمكەنت قالاسىندا, الماتى وبلىسىندا بايقالادى.
اتاپ ايتارلىعى, جەرگىلىكتى جەرلەردە تۇرعىن ءۇي قۇرىلىسى مەن قارجىنىڭ يگەرىلۋى – تۇراقتى باقىلاۋدا. تۇرعىن ءۇي قۇرىلىسى بارىنشا دامىپ كەلەدى. بۇل ازاماتتاردىڭ تۇرعىن ءۇي جاعدايلارىن جاقسارتۋعا, قۇرىلىستىڭ قارقىنىن ارتتىرۋعا, سونداي-اق كاسىپكەرلىك باستامالاردى دامىتۋعا مۇمكىندىك بەرەدى.
