تايلاندتىڭ پاتتايا قالاسىندا ەرەسەكتەر اراسىندا وتكەن XI ازيا چەمپيوناتى جانە كوركەم گيمناستيكادان جاسوسپىرىمدەر اراسىنداعى XVII ازيا چەمپيوناتىنان ەلوردالىق سپورتشىلار جۇلدەلى ورالدى.
قىزداردىڭ جەتىستىكتەرى مەن الداعى جارىستارى تۋرالى نۇر-سۇلتان قالاسىنىڭ كوركەم گيمناستيكا فەدەراتسياسىنىڭ اتقارۋشى ديرەكتورى جانات مەيرامۇلى ءبولىستى.
– كوركەم گيمناستيكادان قر باس جاتتىقتىرۋشىسى, قر ەڭبەك سىڭىرگەن جاتتىقتىرۋشىسى ءاليا يۋسۋپوۆانىڭ باسشىلىعىمەن ءبىزدىڭ قىزدار ءتۇرلى دەڭگەي بويىنشا جالپى 13 مەدالگە يە بولدى. ونىڭ التاۋى – التىن, بەسەۋى – كۇمىس جانە ەكەۋى – قولا مەدال. وسىلايشا بيىل تامىز ايىندا وتەتىن بىرنەشە ءىرى جارىستارعا شاقىرتۋ الدىق, ياعني قىزدارىمىز كوركەم گيمناستيكادان تۇركيادا وتەتىن يسلام ىنتىماقتاستىق ويىندارىنا جانە رۋمىنيادا وتەتىن الەم كۋبوگىنا بارادى. سونىمەن قاتار قىركۇيەكتە بولگاريادا وتەتىن الەم چەمپيوناتىنا دا شاقىرتۋ بار, – دەدى ول.
اتالعان جارىستا 17 ەلدىڭ شەبەر قىزدارى جەكە بىرىنشىلىك جانە توپتىق جاتتىعۋلاردا ونەرىن ورتاعا سالعان. ازيا چەمپيوناتىنىڭ قورىتىندىسىندا قازاقستاننىڭ جاسوسپىرىمدەر قۇراماسى كوماندالىق كوپسايىستا التىن, جەكە باعدارلاما مەن دوپ تەبۋدە التىن, قۇرساۋ, شوقپار جانە لەنتادا ءۇش كۇمىس, توپ ويىنشىلارى كوپسايىستا جانە توپتا ەكى التىن, ال دوپپەن جاتتىعۋدا قولا جەڭىپ العان.
