ەلوردادا جاستارعا ارنالعان «Elorda Jastary» اتتى ارنايى تۇرعىن ءۇي باعدارلاماسى ىسكە قوسىلادى. بۇل باعدارلاما باس قالاداعى جاس ماماندارعا جەڭىلدەتىلگەن الەۋمەتتىك نەسيە الۋعا باعىتتالعان. مۇنداي قۋانىشتى حاباردى كەشە نۇر-سۇلتان قالاسىنىڭ اكىمى التاي كولگىنوۆ جەتكىزدى.
«قۇرمەتتى قالا تۇرعىندارى! سىزدەرگە ايتار قۋانىشتى حابارىم بار! ەلوردادا جاستارعا ارنالعان «Elorda Jastary» ارنايى تۇرعىن ءۇي باعدارلاماسىن ىسكە قوسامىز. جەڭىلدەتىلگەن الەۋمەتتىك نەسيەلەندىرۋ تۇرعىن ءۇي باعدارلاماسى ەلوردانىڭ جاس ماماندارىنا ارنالعان. مىسالى, بۇل نۇر-سۇلتان قالاسىندا «جەتىم بالالار» ساناتى بويىنشا تۇرعىن ۇيگە كەزەكتە تۇرعاندارعا, دەنساۋلىق ساقتاۋ, ءبىلىم بەرۋ, الەۋمەتتىك, مادەنيەت جانە سپورت سالالارى, جوعارى وقۋ ورىندارى مەن عزي, پوليتسيا دەپارتامەنتى, تجد قىزمەتكەرلەرى, كوممۋنالدىق كاسىپورىنداردىڭ بەيىندى قىزمەتكەرلەرىنە جانە ت. ب. ارنالعان» دەپ ءتۇسىندىردى اكىم.
التاي كولگىنوۆ جاستارعا ارنالعان تۇرعىن ءۇي باعدارلاماسىن ىسكە اسىرۋعا «وتباسى بانكى» مەن 2021-2023 جىلدارعا ارنالعان «Elorda Jastary» باعدارلاماسى كومەكتەسەتىنىن ايتتى. «Elorda Jastary» جاستارعا, سونىڭ ىشىندە تۇرعىن ءۇي سالاسى بويىنشا تولىق قولداۋ كورسەتۋگە باعىتتالعان. سونىمەن قاتار «Elorda Jastary» باعدارلاماسىندا ءبىلىم بەرۋ, جۇمىسپەن قامتۋ, بوس ۋاقىتتى پايدالى وتكىزۋ جانە تاعى باسقا باعىتتار بار» دەدى قالا باسشىسى.
اكىمنىڭ ايتۋىنشا, بۇل باعدارلاماعا 35 جاسقا دەيىنگى (35 جاستى قوسا العاندا, جۇبايىنىڭ/زايىبىنىڭ جاسى ماڭىزدى ەمەس) جاستار قاتىسا الادى. ولارعا مىناداي تالاپتار كىرەدى: كەمىندە 1 جىل قالادا تىركەلۋى ءتيىس, «وتباسى بانكتە» جيناق شوتى بار, باعدارلاما ۇمىتكەرىنىڭ جەكە تۇرعىن ءۇيى بولماۋى ءتيىس (سوڭعى 5 جىل ىشىندە), كەمىندە 1 جىل رەسمي جۇمىس ءوتىلى بولۋى شارت.
«وسىلايشا اتالعان تۇرعىن ءۇي باعدارلاماسىنا قاتىسۋشى باسپانا ساتىپ الۋعا 18 ملن تەڭگەگە دەيىن (جىلدىق 5 پايىز جەڭىلدىكپەن) قارىز الا الادى. ساتىپ الاتىن تۇرعىن ءۇيدىڭ قۇنى – شەكتەۋسىز. قارىز 25 جىلعا دەيىنگى مەرزىمگە بەرىلەدى. وتىنىمدەردى قابىلداۋ 14 قازاندا باستالادى, qatysu. zhilfond.kz پورتالىندا جۇزەگە اسىرىلادى. قاتىسۋشىلاردىڭ ساناتتارى, تۇرعىن ءۇي الۋ تالاپتارى مەن الگوريتمى بويىنشا قوسىمشا اقپاراتپەن نۇر-سۇلتان قالاسى اكىمدىگىنىڭ «تۇرعىن ءۇي قورى» مەكەمەسىنىڭ سايتىندا (zhilfond.kz) تانىسۋعا بولادى. وتىنىشتەردى قابىلداۋ مەرزىمى اياقتالعاننان كەيىن قاتىسۋشىلاردى ىرىكتەۋ بالدىق جۇيەگە سايكەس باستالادى» دەدى ا.كولگىنوۆ.
سونىمەن قاتار بيىل ەلباسىنىڭ باستاماسىمەن قولعا الىنعان «جۇمىس ىستەيتىن جاستارعا جالعا بەرىلەتىن تۇرعىن ءۇي» باعدارلاماسى جالعاسادى. وسى باعدارلاما اياسىندا 1 مىڭنان استام جاس باسپاناعا قول جەتكىزەدى.
