استانا قالاسىنىڭ اكىمى اسەت يسەكەشەۆ 2017 جىلدىڭ جۇمىسىن قورىتىندىلاۋعا ارنالعان قالالىق دەنساۋلىق ساقتاۋ باسقارماسىنىڭ كەڭەيتىلگەن القا ماجىلىسىندە تۇرعىنداردىڭ ءومىر ءسۇرۋ ساپاسىن ارتتىرۋعا قولايلى جاعداي جاساۋ قاجەتتىگىن العا تارتتى.
ەلوردانى دامىتۋدىڭ جوسپارىندا, اسىرەسە, الەۋمەتتىك سالاعا ايرىقشا ماڭىز بەرىلگەن. سونىڭ ىشىندە مەديتسينالىق قىزمەت ءتۇرىن نەعۇرلىم قولجەتىمدى ەتۋ, ەمحاناداعى كەزەكتى ازايتۋ باعىتىندا اتقارىلعان جۇمىستار كوڭىل قۋانتادى. بۇگىندە استانادا 275 مەديتسينالىق مەكەمە تىركەلگەن. ونىڭ 200-گە جۋىعى عانا ناقتى جۇمىس ىستەپ وتىر. ەندىگى مىندەت – ەلوردانىڭ دەنساۋلىق ساقتاۋ مەكەمەلەرىندە مەديتسينالىق ءتۋريزمدى بەلسەندى دامىتۋ. «ءبىرىنشى كەزەكتە مەديتسينالىق تۋريزم ەكونوميكاسىن دامىتۋ مىندەتى تۇر. استانانىڭ اۋرۋحانالارى مەن ەمحانالارى مەديتسينالىق تۋريستەردى تارتىپ, قىزمەت كورسەتۋ ەكسپورتىندا ءوز ورنىن نىقتاي الادى. بۇل رەتتە كارديوحيرۋرگيا, نەيروحيرۋرگيا مەن ونكولوگيالىق اۋرۋلاردى ەمدەۋ سالاسىندا الەۋەتى زور» دەدى شاھار باسشىسى اسەت يسەكەشەۆ. ارينە, استانا قالاسىنىڭ مەديتسينالىق كلاستەرىنە كىرەتىن كلينيكالار جابدىقتالۋى جاعىنان الەمدىك دەڭگەيدەگى جوعارى تالاپتارعا جاۋاپ بەرەدى. ماسەلەن, رەسپۋبليكالىق نەيروحيرۋرگيا ورتالىعى – بۇكىل ورتا ازياداعى بىردەن-ءبىر ورتالىق. ال دياگنوستيكالىق ورتالىقتا ورناتىلعان اپپاراتتار ارقىلى قاتەرلى ىسىكتى باستاپقى ساتىسىندا-اق انىقتاۋعا مۇمكىندىك بار. كلاستەر قۇرامىنداعى ءاربىر كلينيكادا قولدانىلاتىن وسى تەكتەس تەحنولوگيالاردىڭ ارقاسىندا بۇرىن تەك شەتەلدەردە جاسالاتىن كۇردەلى وپەراتسيالاردى قازاقستاندىق دارىگەرلەر جاساي الاتىن كۇنگە جەتتى. الداعى ۋاقىتتا ەلوردانىڭ دەنساۋلىق ءتۋريزمىن دامىتۋعا بارلىق اۋرۋحانالار مەن ەمحانالار دا جۇمىلدىرىلماق. «اۋرۋحانالارىمىز ءۇشىن ماڭىزدى ماسەلە – قىزمەت كورسەتۋ ساپاسىن كوتەرۋ. حالىق ءۇشىن ول – سىپايىلىق پەن ادەپتىلىك. اۋرۋحانالار مەن ەمحانالاردىڭ باسىم بولىگى بىزدەگى ۇلكەن ميگراتسياعا بايلانىستى وتە بەلسەندى جۇمىس ىستەيدى. وبلىستاردان بىزگە تۇرعىندار كوپ كەلەدى. سول سەبەپتى كەيبىر مەديتسينالىق ۇيىمدار 150 پايىز جۇكتەمەمەن جۇمىس ىستەيدى» دەي كەلە, سوعان قاراماستان, وسىنداي جۇكتەمەمەن جۇمىس ىستەپ كەلە جاتقان دەنساۋلىق ساقتاۋ سالاسىنىڭ ماماندارىنا العىسىن ءبىلدىردى.
ءولىم-ءجىتىم ازايدى
جيىنعا قاتىسقان دەنساۋلىق ساقتاۋ ءمينيسترى ەلجان ءبىرتانوۆتىڭ مالىمدەۋىنشە, تەگىن ءدارى-دارمەكتەردى بەرۋدىڭ اشىقتىعىن قامتاماسىز ەتۋ, دارىلىك پرەپاراتتارمەن, مەديتسينالىق ونىمدەرمەن قامتۋ جاعدايىن ۇنەمى باقىلاۋدا ۇستاۋ ماقساتىندا بارلىق ەمحانالاردا اقپاراتتىق جۇيە ورناتىلۋدا. تەگىن مەديتسينالىق كومەكتىڭ كەپىلدەندىرىلگەن كولەمى اياسىندا وتكەن جىلى قالا بويىنشا 100 مىڭنان استام ادام امبۋلاتوريالىق دەڭگەيدە تەگىن دارىلىك پرەپاراتتارمەن قامتىلعان. بيىل تەگىن ءدارى-دارمەكپەن 120 مىڭعا تارتا ادام قامتىلۋى ءتيىس. بۇل رەتتە دەنساۋلىق ساقتاۋ باسقارماسى ءدارى-دارمەكتەردىڭ قولجەتىمدىلىگىن ارتتىرۋ ماقساتىندا پرەپاراتتاردى قالا ەمحانالارىنداعى ءدارىحانالاردا تاپسىرۋ جونىندەگى شەشىم شىعارعان بولاتىن. «بۇگىندە حالىق دەنساۋلىعى – ازاماتتاردىڭ الدىندا جاۋاپكەرشىلىك جۇگىن ايقىندايتىن الەۋمەتتىك كورسەتكىش. 2017 جىلدىڭ قورىتىندىسىنا سۇيەنسەك, ەلوردادا جالپى ءولىم سانى 9,4 پايىزعا تومەندەگەن. ونىڭ ىشىندە انا ءولىمى – 33,6 پايىزعا, ءسابي ءولىمى 5,2 پايىزعا تومەندەدى. وتكەن جىلى بۇل كورسەتكىش 6,4 پايىزدى قۇراعان بولاتىن» دەيدى قالا باسشىسى اسەت يسەكەشەۆ. سونىمەن قاتار, قان اينالىمى جۇيەسىنىڭ اۋرۋلارىنان بولاتىن جانە ونكولوگيالىق اۋرۋلاردان تۋىندايتىن ءولىم كورسەتكىشتەرى ەداۋىر تومەندەگەن.
ال قالالىق دەنساۋلىق ساقتاۋ باسقارماسىنىڭ باسشىسى كامالجان نادىروۆ وتكەن جىلى ەلوردامىزدا 129 ءىس-شارا ۇيىمداستىرىلعانىن ايتتى. مەملەكەتتىك باعدارلاماعا قاتىستى جوسپارلانعان 33 ماقساتتى كورسەتكىشتىڭ 32-ءسى ىسكە اسىرىلعان. بيىلدان باستاپ قالالىق 15 بىرىڭعاي مەديتسينالىق-سانيتارلىق كومەك ۇيىمدارىندا حالىققا جەدەل جاردەم قىزمەتىن كورسەتەتىن 4 ساناتتى شاقىرتۋ بريگادالارى ۇيىمداستىرىلادى. ول ءۇشىن جەدەل جاردەم مەديتسينالىق قىزمەت كورسەتۋ ستانساسىنان 24 كولىك قالالىق ەمحانالارعا بولىنەدى.
اۋتسورسينگ قالاي داميدى؟
جيىندا بۇعان دەيىن بىرنەشە مارتە ايتىلعان مەديتسينا سالاسىندا اۋتسورسينگتى دامىتۋ ماسەلەسى كوتەرىلدى. استانا اكىمى اسەت يسەكەشەۆ مەديتسينا سالاسىنداعى اۋتسورسينگ سالاسىن دامىتۋ قاجەتتىگىن تاعى دا ەسكەرتتى. «مەديتسينا سالاسى وتە ماڭىزدى ورىنعا يە. سول سەبەپتى شاعىن جانە ورتا كاسىپكەرلىك ءۇشىن ۇلكەن مۇمكىندىك. بۇل رەتتە ءبىز مجس مەحانيزمى بويىنشا جەكەمەنشىك كلينيكالاردىڭ قۇرىلىسى تۋرالى ەمەس, سونداي-اق اۋتسورسينگ تەتىگىن پايدالانۋ تۋرالى ايتامىز. ءبىز استانادا مەديتسينا سالاسىنداعى اۋتسورسينگتىك قىزمەتتىڭ الەۋەتىن 10 ملرد تەڭگەگە دەيىن كورىپ وتىرمىز» دەيدى استانا اكىمى. سونىمەن قاتار, ەلوردانىڭ مەديتسيناسى جەكەمەنشىك جانە مەملەكەتتىك دەپ بولىنبەس ءۇشىن قىزمەت كورسەتۋ ساپاسى بارلىق جەردە بىردەي بولۋى كەرەكتىگىن قاداپ ايتتى. «وسى ورايدا تسيفرلاندىرۋ شەڭبەرىندە جەرگىلىكتى اقپاراتتىق جۇيەلەردى ەنگىزۋدە قوسىمشا جەكە كومپانيالارمەن جۇمىس ىستەپ, دەنساۋلىق ساقتاۋ مينيسترلىگىنىڭ جۇيەسىمەن ينتەگراتسيالانۋ ءۇشىن بەلسەندى جۇمىس ىستەۋگە شاقىرامىن» دەپ تۇيىندەدى اسەت يسەكەشەۆ.
گۇلميرا ايماعانبەت
