استانادا جىل وتكەن سايىن ونەركاسىپ سالاسى ۇلعايىپ كەلەدى. بيىلعى جىلدىڭ باسىنان بەرى قالا اۋماعىندا وندىرىلگەن ونەركاسىپتىك تاۋارلار مەن قىزمەتتەر كولەمى 145,5 ملرد تەڭگەنى قۇرادى.
ناقتىلاپ ايتقاندا, استانادا وڭدەۋشى ونەركاسىپتىك, قۇرىلىس يندۋسترياسى, تاماق ونىمدەرىن دايىنداۋ, ەلەكتر قۋاتىمەن جانە سۋمەن جابدىقتاۋ سالالارىندا ءونىمنىڭ ناقتى كولەمى ۇلعايىپ وتىر. ماسەلەن, وڭدەۋ ونەركاسىبىندەگى ءونىمنىڭ ناقتى كولەمى وتكەن جىلدىڭ العاشقى بەس ايىنداعى دەڭگەيمەن سالىستىرعاندا 2,1 پايىزعا وسكەن. بۇل رەتتە ماشينا قۇراستىرۋ, مەتالل بۇيىمدارىن جاساۋ, رەزەڭكە جانە پلاستماسسا بۇيىمدارىن وندىرۋدە جوعارى كورسەتكىشتەر بايقالادى.
تاماق ونىمدەرى وندىرىسىندە ناقتى كولەم يندەكسى 113,4 پايىزدى قۇرادى. اسىرەسە, ۇن ءوندىرۋ كولەمى ارتا ءتۇسكەن. قۇرىلىس يندۋسترياسىندا دا ەسەلى كورسەتكىشتەر بار. قالادا جۇرگىزىلىپ جاتقان قۇرىلىس كاسىپورىندارى ءۇشىن, جالپى تاپسىرىس بەرۋشىلەردىڭ سۇرانىمىنا قاراي مەتالل ەسىكتەر مەن ەسىك بوساعالارى, تەرەزەلەر جانە ولاردىڭ جاقتاۋلارىن دايىنداۋ, قۇرىلىس جۇمىستارىنا قاجەت قوسپالاردى ازىرلەۋ ءوندىرىسىنىڭ كولەمى ارتىپ وتىر.
سونىمەن قاتار, قالادا ەلەكتر قۋاتىمەن جابدىقتاۋ, گاز, بۋ بەرۋ جانە اۋا باپتاۋداعى ءونىم كولەمى 27,7 ميلليارد تەڭگەنى قۇرادى.
تۇپتەپ ايتقاندا, كۇن ساناپ ساۋلەتى مەن داۋلەتى وركەندەگەن استانادا ونەركاسىپ ءوندىرىسى دە جوعارى كورسەتكىشتەردى باعىندىرا باستادى.
