نۇر-سۇلتان قالاسى اكىمدىگىندە «ەلوردا جاستارى سىيلىعى» بايقاۋىنىڭ ۇيىمداستىرۋشىلارىمەن ءباسپاسوز كونفەرەنتسياسى ءوتتى. بيىل ءۇشىنشى رەت وتكىزىلەتىن بايقاۋدىڭ نوميناتسيالار سانى كوبەيگەن. جاستار جىلىنا وراي «جىل جاڭالىعى» جانە «ەرلىگى ءۇشىن» اتتى ەكى ارنايى سىيلىق قوسىمشا تاعايىندالعان.
14 پەن 29 جاس ارالىعىنداعى ءوز سالاسىندا وزىق جۇرگەن جاستاردى قازىلار القاسى مەن حالىق بىرگە تاڭداپ, شەشۋشى داۋىس SMS ارقىلى قابىلدانادى. جوبانىڭ باس ۇيىمداستىرۋشىسى الپامىس ءشارىموۆ «الەۋمەتتىك سالانىڭ ۇزدىك قىزمەتكەرى», «ءوندىرىستىڭ ۇزدىك قىزمەتكەرى», «جاس ۆولونتەر», «ۇزدىك كاسىپكەر», «ۇزدىك SMM-مەنەدجەر» نوميناتسيالارىمەن قاتار «ۇلتتىق ونەر» جانە «ۇزدىك جاستار تەاترى» دەگەن اتالىمدار ەنگىزىلگەنىن ايتتى. 100 مىڭ تەڭگە جۇلدەگە قوسىمشا ەرەكشە ستاتۋەتكا تاپسىرىلماق. 30 قاراشادا بەيبىتشىلىك جانە كەلىسىم سارايىندا وتەتىن ماراپاتتاۋعا الىس-جاقىن شەتەلدەن ونەر مايتالماندارى قاتىسادى. نۇر-سۇلتان قالاسى قوعامدىق دامۋ ىستەرى باسقارماسى جاستارمەن جۇمىس ءبولىمىنىڭ باسشىسى مىندەتىن اتقارۋشى اقۇلان تاستەمىر: «بۇل ەندى كەز كەلگەن ادامنىڭ جىلدىڭ سوڭىنا دەيىن جاساعان ەڭبەگىن ايرىقشا باعالايتىن جوبانىڭ ءبىرى. كەز كەلگەن ەڭبەكتىڭ ءوز باعاسى, ءوز ناتيجەسى بولۋ كەرەك, سوندىقتان «جۇزدەن جۇيرىك, مىڭنان تۇلپار» شىققان جاستاردى اكىمدىك تاراپىنان ماراپاتتاۋىمىز ورىندى دەپ ويلايمىز» دەپ تالاپتى جاستاردى مەملەكەتتىك دەڭگەيدە قولداۋعا شاقىردى.
18 ءتۇرلى باعىتتى قامتيتىن «ەلوردا جاستارى سىيلىعى» بايقاۋى قاراشادا وتەدى. ال وتىنىمدەر 1 قىركۇيەك پەن 15 قازان ارالىعىندا قابىلدانادى. جەڭىمپازدار اۆتوماتتى تۇردە رەسپۋبليكالىق «دارىن» سىيلىعىنىڭ ۇمىتكەرى اتانادى. قاتىسۋشىنىڭ بايقاۋعا وتكىزەتىن قۇجاتىندا نۇر-سۇلتان نەمەسە استانا دەگەن مەكەنجايى بولۋى كەرەك.
جادىرا شامۇراتوۆا
