تاۋ-كەن كونگرەسى جاڭا مۇمكىندىكتەرگە جول اشادى. بۇل تۋرالى «ەكسپو-2017» كونگرەسس-ورتالىعىندا ءوتىپ جاتقان 25-ءشى دۇنيەجۇزىلىك تاۋ-كەن كونگرەسىندە ايتىلدى. بۇل جيىنعا 50 ەلدەن 1200-دەن اسا دەلەگات كەلدى.
1958 جىلدان بەرى وتكىزىلىپ كەلە جاتقان اتالمىش حالىقارالىق جيىن بۇل جولعى كەزدەسۋى كونگرەستىڭ 60 جىلدىعى مەن استانا قالاسىنىڭ 20 جىلدىق مەرەيتويىنا ارنالدى. تمد اۋماعى بويىنشا قازاقستاندا العاش رەت ءوتىپ تۇرعان جيىندا كەن ورىندارىن يگەرۋ جانە پايدالى قازبالار سالاسىندا جۇمىس ىستەيتىن ماماندار, كاسىپكەرلەر مەن عالىمدار باس قوستى. «بۇگىندە تاۋ-كەن ءوندىرىسى جانە وڭدەۋ ونەركاسىبى قازاقستان ەكونوميكاسىنا ۇلكەن ۇلەس قوسۋدا. بۇل سالاداعى 800 كاسىپورىندا 185 مىڭ ادام جۇمىس ىستەيدى. ءوندىرۋشى جانە وڭدەۋشى ونەركاسىپتى كەڭەيتۋ ەلىمىزدىڭ دامۋىنا كومەكتەسەدى» دەدى قر پرەمەر-ءمينيستردىڭ ءبىرىنشى ورىنباسارى اسقار مامين ءوزىنىڭ سوزىندە. ونىڭ ايتۋىنشا, مەملەكەت باسشىسى نۇرسۇلتان نازارباەۆ حالىقارالىق ينۆەستورلاردىڭ قاتىسۋىن كەڭەيتۋ ءۇشىن تاۋ-كەن سەكتورىن رەفورمالاۋ جونىندەگى مۇمكىندىكتەر جاساۋعا تاپسىرما بەرگەن. ءوز كەزەگىندە ينۆەستيتسيالار جانە دامۋ ءمينيسترى جەڭىس قاسىمبەك كونگرەستىڭ وتاندىق تاۋ-كەن كەشەنىن دامىتۋ جانە ەلدىڭ حالىقارالىق قاتىناستارىن نىعايتۋ ءۇشىن ونىڭ ماڭىزدىلىعىن اتاپ ءوتتى.
نۇرداۋلەت كاكىشتەگى
