ەلىمىزدە بيىل جىلۋ بەرۋ ماۋسىمىنا دايىندىق جۇمىستارى 15 قازاندا تولىق اياقتالادى. بۇل تۋرالى كەشە ورتالىق كوممۋنيكاتسيالار قىزمەتىندە وتكىزىلگەن ءباسپاسوز ءماسليحاتىندا قر يندۋستريا جانە ينفراقۇرىلىمدىق دامۋ ءبىرىنشى ءمينيسترىنىڭ ءبىرىنشى ورىنباسارى قايىربەك وسكەنباەۆ ءمالىم ەتتى.
جىلۋمەن قامتاماسىز ەتۋ جۇمىسىنىڭ ويداعىداي ورىندالۋىنا جانە كومىر تاپشىلىعىنان تۋاتىن كەلەڭسىز جاعدايلاردىڭ الدىن الۋ ءۇشىن دايىندىق جۇمىستارى شىلدە ايىنان باستالعان. سونىڭ ناتيجەسىندە, قازىرگە دەيىن 10212 قازاندىق, 4,8 مىڭ شاقىرىم جىلۋ جەلىسى, 14.5 مىڭ شاقىرىم سۋ جەلىسى جاڭارتىلىپ, جوندەۋدەن وتكىزىلگەن. «جىلۋمەن قامتاماسىز ەتۋ دايىندىق جۇمىستارى قاۋىرت جۇرگىزىلىپ جاتىر. ەلدەگى ءبىلىم بەرۋ ورىندارى 1 قازاننان باستاپ جىلىتۋ ماۋسىمىنا قوسىلۋعا 99,6 پايىز دايىن. قالعان نىساندار 15 قازانعا قاراي تولىق دايىن بولادى. ەل بويىنشا 10,4 ملن توننا كومىر قاجەت بولسا, بۇگىندە قوردا 4,9 ملن توننا كومىر دايىن» دەدى قايىربەك وسكەنباەۆ.
قايىربەك وسكەنباەۆ نۇر-سۇلتان قالاسىنداعى كومىردىڭ باعاسىنا دا توقتالدى. «جىلۋ بەرۋ ماۋسىمىندا كومىر باعاسىنىڭ نەگىزسىز قىمباتتاپ كەتۋىنىڭ الدىن الۋ ءۇشىن, كومىر باعاسىنا باقىلاۋدى كۇشەيتەمىز. ماسەلەن, ەلوردادا شۇباركول كومىرى – 11400, ەكىباستۇز كومىرى – 9500, قاراجىرا كومىرى – 13 200, مايكوبە كومىرى 12000-12500 تەڭگە شاماسىندا بولادى» دەدى ۆيتسە-مينيستر.
