«نۇرلى ەرتىس» باعدارلاماسى اياسىندا ەلوردادان ەكىباستۇز قالاسىنا قونىس اۋدارۋشىلاردىڭ بيىلعى جىلدىڭ سوڭعى لەگى, بارلىعى 15 وتباسى قونىس اۋداردى, دەپ حابارلايدى ەلوردا ينفو.
بۇل جولى ەلوردادان ەكىباستۇزعا 55 ادام, ونىڭ ىشىندە 28-ءى – بالا جانە 27 جۇمىسقا جارامدى ازاماتتار كوشتى. جالپى, مامىر ايىنان باستاپ وسى كۇندەرگە دەيىن اتالمىش باعدارلاما شەڭبەرىندە ەلوردادان كوشكەن 218 وتباسىدان 258 ادام جۇمىسقا تۇرعىزىلىپ, بالالارى بالاباقشا مەن مەكتەپتەرگە ورنالاستىرىلدى. ولار قازىرگى تاڭدا ەكىباستۇز قالاسىندا ەكى جانە ءۇش بولمەلى پاتەرلەردە تۇرادى.
سوڭعى لەك بويىنشا وسى جولى كامەلەتكە تولماعان ەكى بالاسى بار جاس وتباسىلار, سونداي-اق ەكىباستۇزدا مەديتسينا قىزمەتكەرلەرىنىڭ ۇلكەن تاپشىلىعىنا بايلانىستى ءبىر بالاسى بار دارىگەرلەر دە قونىس اۋدارىپ جاتىر.
– باعدارلاما اياسىندا قاتىسۋشىلارعا مەملەكەت تاراپىنان ماتەريالدىق قولداۋ تۇرلەرى كورسەتىلەدى. ءبىرىنشىسى – تىركەۋگە تۇرعاننان كەيىن قونىس اۋدارۋشىلاردى قابىلداۋدىڭ وڭىرلىك كۆوتاسىنا قۇجات تاپسىرىلىپ, وڭ شەشىم قابىلدانعان جاعدايدا, 35 ايلىق ەسەپتىك كورسەتكىش كولەمىندە 88375 تەڭگە ادام باسىنا تولەنەتىن ءبىر رەتتىك تولەم. ەكىنشىدەن, قونىستانۋشىلاردىڭ ءۇي جالداۋ جانە تولەمدەردى وتەۋ جايىندا, ياعني بۇل وتباسىلار بەرىلگەن ۇيلەردە ءبىر جىل كولەمىندە تەگىن تۇرادى. تۇرعىن ۇيمەن قامتاماسىز ەتۋمەن قاتار, بىلىكتىلىگى بار ماماندار جۇمىسقا ورنالاسادى. بۇل وتباسىلاردىڭ بالالارى بالاباقشالار مەن مەكتەپتەردە تەگىن ورىندارمەن, وقۋشىلار مەكتەپ فورماسى جانە قۇرال-جابدىقتارمەن, تەگىن تاماقپەن قامتاماسىز ەتىلەدى, – دەيدى ا.شابەكوۆا.
وسى جولى ەكىباستۇزعا كوشۋگە نيەت بىلدىرگەن ادامداردىڭ ءبىرى – ەكى بالانىڭ اكەسى نۇرجان مۇحامەدجانوۆ. ەلوردادا 3 جىلدان بەرى تۇراقتى تىركەۋدە تۇرعان.
