سوڭعى جىلدارى قازاقستاندا, اسىرەسە ەلوردادا قان دونورلىعى بەلسەندى دامي باستادى. ماسەلەن, 2020 جىلى ترانسفۋزيولوگيا عىلىمي-وندىرىستىك ورتالىعىنا كۇنىنە 90-عا جۋىق دوناتسيا جۇرگىزىلسە, بيىل 120-عا جۋىق دوناتسيا جاسالدى.
ورتالىق ماماندارىنىڭ ايتۋىنشا, قاننىڭ تۇراقتى تۇردە جەتكىزىلىپ تۇرۋىنا ۇنەمى قاجەتتىلىك بار, ويتكەنى ونى شەكتەۋلى ۋاقىتقا عانا ساقتاۋعا بولادى. قاۋىپسىز قان ءاردايىم جانە قاجەت بولعان جاعدايدا قولجەتىمدى بولۋى ءۇشىن ساۋ ادامدار بۇل ورتالىققا ۇنەمى قان تاپسىرۋى كەرەك – بۇل كۇن سايىن شامامەن 120-150 دونور دەگەن ءسوز.
بىلتىر پاندەمياعا بايلانىستى دونورلىق بەلسەندىلىك باسەڭدەگەن. ماسەلەن, كارانتينگە دەيىن اتالعان ورتالىققا كۇنىنە 100-120 دونور كەلسە, 2020 جىلى بۇل كورسەتكىش كۇنىنە 80 دونورعا دەيىن تومەندەدى. دەگەنمەن وسى جىلدىڭ وزىندە اۋرۋحانالار شتاتتىق جۇمىس رەجيمىنە قايتا ورالدى, ال دونورلاردىڭ سانى كۇن سايىن كەمىندە 150 ادام بولۋى قاجەت. ماماندار قان دونورلىعىن ناسيحاتتاۋدا كومەكتەسە الاتىن بارلىق قامقور جاندار مەن ۇيىمداردىڭ كومەگىن قۋانا قابىلدايدى. ويتكەنى مۇندا قان قورى ۇنەمى جانە تۇراقتى تۇردە تولىقتىرىلۋى كەرەك, سوندىقتان قان ورتالىعى ءاردايىم بەلگىلەنگەن رەجيمدە, دەمالىسسىز جانە 8:30-دان 17:00-گە دەيىن جۇمىس ىستەيدى. كارانتين نەمەسە وسىعان ۇقساس جاعدايلار كەزىندە دونورلىقتى ەستەن شىعارماڭىز. قان ونكولوگيالىق ناۋقاستارعا, ونىڭ ىشىندە بالالارعا, سونداي-اق جاراقات العان ناۋقاستارعا, بوسانعان ايەلدەرگە جانە باسقالارعا قاجەت. ورتالىقتا كوروناۆيرۋستىڭ الدىن الۋ جانە قورعاۋدىڭ بارلىق شارالارى ساقتالعان, سوندىقتان دونورلاردىڭ دەنساۋلىعىنا قاۋىپ تونبەيدى.
