ەلورداداعى نۇرجول بۋلۆارىنىڭ بويىندا قازاقستاننىڭ تۇكپىر-تۇكپىرىنەن كەلگەن 100-گە تارتا دارىندى جاس «I love Astana» اتتى فلەشموب وتكىزدى. وندا ستۋدەنتتەر مەن وقۋشىلار زاماناۋي اندەرگە سينحروندى بيلەپ, شارانىڭ سوڭىنا قاراي جۇرەك ءپىشىنىن ءتۇزىپ تۇرا قالىستى. ايرىقشا كورىنىس شىنىندا دا وتە ادەمى شىقتى.
فلەشموبتا ونەر كورسەتكەن جەتكىنشەكتەردىڭ ءبارى – يۋنەسكو كلۋبتارى شىعارماشىلىعىنىڭ اكادەمياسىندا ءتالىم الىپ جۇرگەن شاكىرتتەر. بۇل مەكتەپ بيىل ەلىمىزدە العاش رەت ۇيىمداستىرىلىپتى. قازاقستاندىق يۋنەسكو كلۋبتارىنىڭ فەدەراتسياسى, تۇڭعىش پرەزيدەنت قورى جانە قازاق ۇلتتىق ونەر ۋنيۆەرسيتەتى بىرلەسىپ ورايىن تاپقان اتالمىش جوباعا استانا قالاسىنىڭ اكىمدىگى ۇلكەن قولداۋ بىلدىرگەن. شىلدەنىڭ 10-ىنان 24-ىنە دەيىن جالعاساتىن اكادەميا باعدارلاماسىنا ونەر سالاسىنداعى جەتەكشى ماماندارمەن كاسىبي ساباقتار, جاھاندىق مادەنيەت تۋرالى دارىستەر, كوشباسشىلىق الەۋەتتى دامىتۋعا كومەكتەسەتىن ترەنينگتەر مەن شەبەرلىك سىنىپتارى كىرگىزىلگەن.
– مۇندا جينالعان زامانداستارىمنىڭ ەشقايسىسى وسال ەمەس. ويتكەنى وسىندا كەلەر الدىندا ارنايى ىرىكتەۋلەردەن سۇرىنبەي ءوتىپ, 500-دەن اسا ۇمىتكەردىڭ ىشىنەن وزا شاپتىق. ارامىزدا حورەوگرافتار دا, ۆوكاليستەر دە, سۋرەتشىلەر دە بار. بىزگە وسىنداي مۇمكىندىك ۇسىنعان ۇيىمداستىرۋشىلارعا العىسىمىز شەكسىز. بۇگىن, مىنە, بارلىعىمىز باس شاھاردى تۋعان كۇنىمەن قۇتتىقتاپ ءارى وعان دەگەن ىپ-ىستىق ماحابباتىمىزدى جەتكىزبەك نيەتپەن فلەشموب وتكىزدىك, – دەيدى ءال-فارابي اتىنداعى قازاق ۇلتتىق ۋنيۆەرسيتەتىنىڭ 3-كۋرس ستۋدەنتى ەرمۇرات تولەباەۆ.
بوتاگوز ماراتقىزى
