نۇر-سۇلتان قالاسى ءبىلىم باسقارماسىنىڭ مالىمەتىنشە, قازىرگى تاڭدا قالاداعى وقۋ ورىندارىنا 200-گە جۋىق وقىتۋشى مامان كەرەك. سونىڭ ىشىندە باستاۋىش سىنىپ مۇعالىمدەرى, جاراتىلىستانۋ-ماتەماتيكالىق باعىت پەن اعىلشىن ءتىلى ۇستازدارىنا سۇرانىس جوعارى بولىپ تۇر.
ماسەلەن, دارىندى بالالارعا ارنالعان №9 «زەردە» مەكتەبىنە فيزيكا مەن حيميانى اعىلشىن تىلىندە وقىتاتىن ماماندارمەن قاتار ماتەماتيكا, ورىس ءتىلى, تەحنولوگيا, كوركەم ەڭبەك ءپانى مۇعالىمدەرى قاجەت.
– بىزدە قازىرگى ۋاقىتتا 44 مۇعالىم جۇمىس ىستەيدى. ونىڭ 28-ءى – جوعارى ساناتتى ماماندار. الداعى جاڭا وقۋ جىلىندا ءۇش تىلدە ءبىلىم بەرۋ باعدارلاماسىن جۇرگىزۋ ماقساتىندا فيزيكا, حيميا پاندەرىن اعىلشىن تىلىندە وقىتاتىن مۇعالىمدەر كەرەك. نەگىزگى باعىتىمىز – فيزيكا مەن ماتەماتيكانى تەرەڭدەتىپ وقىتۋ. ماتەماتيكا ۇستازدارى دا قاجەت. وسى جارمەڭكەگە سايكەس مامانداردى ىزدەپ كەلىپ وتىرمىز, – دەيدى اتالمىش مەكتەپتىڭ كادر مامانى گۇلشات تەمىرحانقىزى.
№71 مەكتەپ-ليتسەي ورىس جانە قازاق تىلدەرىندە وقىتاتىن باستاۋىش سىنىپ مۇعالىمدەرىن, قازاق تىلىندە ءبىلىم بەرەتىن اعىلشىن ءتىلى مامانىن, ورىس تىلىندە ماتەماتيكانى ۇعىندىراتىن مامانمەن قاتار دەنە شىنىقتىرۋ ءپانى مۇعالىمىن ىزدەپ وتىر. وسى مەكتەپ وكىلدەرىنە جاسۇلان ادىلباەۆ ەسىمدى مامان تۇيىندەمەسىن تاپسىردى.
– بيىلعى ءساۋىر ايىندا ەلورداعا تۇركىستان وبلىسىنان كوشىپ كەلدىم. ماماندىعىم – دەنە شىنىقتىرۋ ءپانىنىڭ مۇعالىمى. كوكشەتاۋ مەملەكەتتىك ۋنيۆەرسيتەتىن ءبىتىردىم. ەڭبەك ءوتىلىم – 10 جىل. بايدىبەك اۋدانىنىڭ جاڭاتالاپ اۋىلىندا جۇمىس ىستەدىم. وسى جارمەڭكەدە جۇمىس تابام با دەپ ۇمىتتەنىپ وتىرمىن, – دەيدى ول.
ءبىر بايقاعانىمىز, وسى جارمەڭكەگە جۇمىس ىزدەپ كەلگەن ماماندار وسى جىلى وڭىرلەردەن ەلورداعا كوشىپ كەلگەن نەمەسە جوعارى وقۋ ورىندارىن جاقىن جىلدارى عانا بىتىرگەن.
«بيىل ى.التىنسارين اتىنداعى ارقالىق مەملەكەتتىك پەداگوگيكالىق ينستيتۋتىن ءبىتىردىم. ماتەماتيكا ءپانىنىڭ مۇعالىمىمىن. ستۋدەنت كەزىمدە ءدۋالدى ءبىلىم بەرۋ بويىنشا ارقالىق قالاسىنداعى ا.ماكارەنكو اتىنداعى مەكتەپتە جۇمىس ىستەدىم. جاس ماماندارعا جۇمىس تابىلادى دەگەن ۇمىتتەمىن» دەيدى ەلميرا مەرەكەقىزى.
ءبىر-ەكى اي بۇرىن سولتۇستىك قازاقستان وبلىسىنان باس قالاعا قونىس اۋدارعان ەسماعزۇم تىلەگەنۇلى – ماماندىعى بويىنشا كاسىپتىك وقىتۋ شەبەرى. ول يندۋستريالدى ينجەنەرلىك-ەكونوميكالىق كوللەدج وكىلدەرىمەن اڭگىمەلەسىپ, تۇيىندەمەسىن تاپسىردى.
«جامبىل اۋدانى قايرانكول اۋىلىنىڭ مەكتەبىندە سىزۋ, تەحنولوگيا, العاشقى اسكەري دايىندىق پاندەرىنەن ساباق بەردىم. بالالارىم ەلوردادا تۇرعاننان كەيىن سولاردىڭ قاسىنا كوشىپ كەلدىم. كەزىندە جوعارى پارتيا مەكتەبىن, تەحنيكۋم كەزىندە يندۋستريالدى-پەداگوگيكالىق كوللەدجدى جانە ومبى اۆتوكولىك ينستيتۋتىن ءبىتىردىم. اۋىلدا مەكتەپتە جۇمىس ىستەدىم. ەلوردادا كوللەدجدە ەڭبەكتەنسەم دەپ وتىرمىن» دەيدى ول.
سولتۇستىك قازاقستان وبلىسىنىڭ وكىلدەرى «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا ەلوردادان وڭىرگە مامانداردى تارتۋ ماقساتىندا وسى جارمەڭكەگە قاتىستى.
– «ەڭبەك» باعدارلاماسى بويىنشا اۋىلدىق جەرلەردە جۇمىس ىستەۋگە نيەتتى مامانداردى ىزدەپ كەلىپ وتىرمىز. اۋدانىمىزعا مەحانيزاتورلار, كولىك جۇرگىزۋشىلەرى سىندى اۋىل شارۋاشىلىعى ماماندارىمەن قاتار دارىگەرلەر مەن مۇعالىمدەر كەرەك. بىزدە ءبىراز بوس جۇمىس ورنى بار. اۋدانىمىزدا كەلەتىن ماماندارعا ارنالىپ 40-تان استام ءۇي سالىنىپ جاتىر. ولاردى وسى جىلى پايدالانۋعا بەرەمىز. وعان كىرەتىن مامان اي سايىن 7-9 مىڭ كولەمىندە جالعا الۋ قۇنىن تولەپ, بەس جىل وتكەن سوڭ ءۇيدى جەكەشەلەندىرە الادى. ءبىر شارت – اۋدانىمىزعا كەلەتىن مامان ەلوردادا كەم دەگەندە ءبىر جىل تىركەۋدە تۇرعان بولۋى كەرەك, – دەيدى عابيت مۇسىرەپوۆ اۋدانى جۇمىسپەن قامتۋ ءبولىمى باسشىسىنىڭ ورىنباسارى بايان شيەباەۆ.
وسى جارمەڭكەگە جۇمىس ىزدەپ قازاق ءتىلى مەن ادەبيەتى ءپانى مۇعالىمدەرى كوپتەپ كەلگەنىن بايقادىق. ماسەلەن, ءبىر اي بۇرىن قىتايدان ەلورداعا قونىس اۋدارعان, 23 جىلدىق ەڭبەك ءوتىلى بار توقتارحان ءارميا مەن جاس مامان داميرا جارماعامبەتتى سوزگە تارتقانىمىزدا سول ءپان مۇعالىمدەرى ەكەنىن ايتتى.
جالپى, اتالمىش جارمەڭكەدە 2 مىڭنان استام بوس ورىن ۇسىنىلدى.
