نۇر-سۇلتان قالاسىنىڭ اكىمدىگى سپورت كۇنىنە وراي بۇقارالىق ۆەلوشەرۋ ۇيىمداستىردى. مەرەكەلىك ءىس-شاراعا قاتىسۋشىلار ۆەلوسيپەدپەن 14 شاقىرىمدىق جولدى ءجۇرىپ ءوتتى.
سالتانات سارايى جانىنان باستالعان ۆەلوشەرۋگە 1 مىڭعا جۋىق اۋەسقويلار قاتىستى. اسىرەسە, بالالار مەن جاستار كوپ بولدى. قاتىسۋشىلاردى, سونداي-اق بارشا سپورتشىلاردى كاسىبي مەرەكەسىمەن قۇتتىقتاعان ەلوردا اكىمىنىڭ ورىنباسارى ب.ماكەن «بۇگىنگى ۆەلوشەرۋ جاستاردى سپورتقا باۋلۋعا جانە سالاۋاتتى ءومىر سالتىن ناسيحاتتاۋعا كومەكتەسەدى دەپ سەنەمىن. بارلىق قاتىسۋشىلارعا ساتتىلىك پەن ۇلكەن جەڭىستەر تىلەيمىن!» دەگەن لەبىزىن ءبىلدىردى. اكىمنىڭ ورىنباسارى سوڭعى جىلدارى قالا تۇرعىندارىنىڭ بۇقارالىق سپورت تارتىلا باستاعانىن, ەلوردامىزدا حالىقارالىق جارىستاردىڭ وتكىزىلەتىنىن, وسىلايشا جالپى سپورت مادەنيەتىنىڭ جوعارى دەڭگەيدە دامىپ كەلە جاتقانىن دا اتاپ ءوتتى.
ۆەلوسيپەد مىنگەن كوپشىلىك الدىمەن قابانباي باتىر داڭعىلى بويىمەن ۇلى دالا كوشەسىنە دەيىن كەلدى. ودان ءارى تۇران داڭعىلىنىڭ بويىمەن ءجۇرىپ ورتالىق ساياباقتا مارەگە جەتتى. ۆەلوشەرۋگە قاتىسۋشىلار اراسىندا مادەنيەت جانە سپورت مينيسترى اقتوتى رايىمقۇلوۆا, بەلگىلى قوعام قايراتكەرلەرى, كاسىپقوي سپورتشىلار مەن ۆەلوسپورت اۋەسقويلارى بولدى. نۇر-سۇلتان قالاسىنىڭ مادەنيەت جانە سپورت باسقارماسى مارەگە جەتكەن, جالپى مەرەكەلىك جارىسقا تىركەلگەندەر اراسىندا كوڭىل كوتەرەتىن ويىندار دا ۇيىمداستىردى. ۆەلوسيپەد ءمىنىپ, كوشەدە سەرگىپ قايتقان كوپشىلىك ۆەلوسيپەدتەر جانە ەستەلىك سىيلىقتار الىپ قۋانىپ جاتتى.
وسى شاراعا قاتىسقان اۋەسقويلاردىڭ ءبىرى ەلەۋسىز پارداباەۆ بولدى.ۇلتتىق قاۋىپسىزدىك كوميتەتىنىڭ زەينەتكەرى ءوز پىكىرىمەن ءبولىستى.
– زەينەت دەمالىسىندا بولسام دا, سپورتتىق شارالارعا قاتىسۋدى ۇناتامىن. جۇگىرۋ جانە ءجۇزۋدى داستۇرىمە اينالدىرعالى قاشان. ال كەشەگى سپورت كۇنىنە وراي ۇيىمداستىرىلعان ۆەلوشەرۋگە كادىمگىدەي دايىندالىپ كەلدىم. مەن ءۇشىن سىيلىق نەمەسە جۇلدە ماڭىزدى ەمەس, ەڭ باستىسى دەنساۋلىققا پايدالى بولسا بولدى, مىندەتتى تۇردە قاتىسامىن. 14 شاقىرىمدى تۇگەلدەي ءجۇرىپ ءوتتىم. جاستار جاعى كوپ بولعانى قۋانتادى. سالاۋاتتى ءومىر سالتىن ناسيحاتتايتىن ءارى قالىپتاستىراتىن وسىنداي جارىستار قالانىڭ مادەنيەتىن وزگەرتەدى عوي. ەلوردا اكىمدىگىنە راحمەت, وسىنداي كوپشىلىككە ارنالعان سپورتتىق ءىس-شارالاردى ءجيى ۇيىمداستىرىپ تۇرسا, قاتىساتىن ادام تابىلادى دەپ ويلايمىن, – دەدى سپورتتى جانىنا سەرىك ەتكەن اۋەسقوي سپورتشى.
