ەربول بەيىلحان, اقىن:
– وتباسىمىزبەن ۇنەمى بۋراباي مەن زەرەندى, ەرەيمەننىڭ اسەم جەرلەرىندە دەم الۋدى داستۇرگە اينالدىرعانبىز. وتكەن جىلى مونعولياداعى بايولكە ايماعىنا دەمالىپ كەلدىم. ونداعى تۋىس-تۋعانداردى, ەل-جەردى ارالاپ قايتتىم. كەرەمەت دەمالعانىمدى جاسىرمايمىن, سەنەسىز بە, توعىز كۇندە ماعان جيىرما قوي سويىپتى. ەت پەن سارى قىمىزدان ەسىم شىقتى. ال, بيىل قىتاي ەلىندەگى قانداستارىما كەتىپ بارامىن. ءور التاي دا – ءوز جەرىمىز. التايدا بابالارىمنىڭ باسى جاتىر. بارىپ قۇران وقىتىپ, بەت سيپاپ قايتۋ – پەرزەنتتىك پارىزىمىز. جالپى, «ءولى رازى بولماي, ءتىرى بايىمايدى» دەگەن اتالى ءسوزدى قاتتى ۇستاناتىن ادامنىڭ ءبىرىمىن.
گاۋحار ءجۇسىپوۆا, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىنىڭ ءارتىسى:
– شەتەلگە ءجيى شىعامىن دەپ ايتا المايمىن. ويتكەنى, وندا دەمالۋ ءۇشىن قاراجاتىم جەتكىلىكسىز. جاز مەزگىلىندە ءوز ەلىمنىڭ تابيعاتى اسەم, كورىكتى جەرلەرىنە ساياحاتقا شىعامىن. ءوزىم – ەكىنشى شۆەيتساريا سانالاتىن كوكشەنىڭ قىزىمىن. ساكەن سەيفۋللين «سەكسەن كول كوكشەتاۋدىڭ ساياسىندا, ارقايسى التىن كەسە اياسىندا, اۋاسى دەرتكە داۋا, جۇپار ءيىسى, كوكىرەك قانشا جۇتسا توياسىڭ با؟» دەپ جىرلاعانداي, كوكشەنىڭ بۋراباي, زەرەندى, شالقار سياقتى كولدەرىنە ءجيى بارامىن. ارينە, اقشام كوپ بولسا شەتەلگە دە بارعىم كەلەدى. بىراق, ەلوردالىقتارعا قازاقستاننىڭ باياناۋىل, جايىق, بالقاش سەكىلدى دەمالىس ورىندارىنا بارىپ, وتاندىق ءتۋريزمدى دامىتۋعا ۇلەس قوسۋعا كەڭەس بەرەمىن.
جاينا سەيداحمەتوۆا, ستۋدەنت:
– وتباسىمىزبەن شەتەلگە ءجيى شىعامىز. اسىرەسە, تايلاندتا دەمالعان ۇنايدى, ويتكەنى, وندا كوپ نارسە ارزان. الايدا, جولاقىسى قىمباتقا ءتۇسۋى مۇمكىن. ماسەلەن, تۇركياعا ساپار شەگۋ ءۇشىن 127 مىڭ تەڭگە كەتسە, تايلاندقا 273 مىڭداي كەتەدى. بىراق, استاناداعى تۋعان-تۋىستاردىڭ كوبى بۋرابايعا بارىپ, دەمالعاندى ءتاۋىر كورەدى.
