ىندەتپەن كۇرەستە العاشقى كۇننەن العى شەپتە جۇرگەن مەديتسينا قىزمەتكەرلەرىنىڭ ارقاسىندا مىڭداعان ادامنىڭ ءومىرى ساقتالدى. قالامىزدىڭ باس ونكولوگى مۇحتار ەسەنجانۇلى تولەۋتاەۆ تا سول قاتاردا ءجۇرىپ, ۇيىمداستىرۋ ءىسىن باسقاردى. ەمدەلۋشىلەرگە توسەك-ورىندار دايىنداپ, شەتەلدەن كەلگەن ناۋقاستاردى قابىلدادى, جاڭا ينفەكتسيالىق ستاتسيوناردىڭ جۇمىسىن ۇيىمداستىرۋعا قاتىستى. ول باسقاراتىن كوپبەيىندى مەديتسينالىق ورتالىقتا ينفەكتسيادان 15 مىڭنان استام ناۋقاس ەمدەلدى. ەڭبەگى باعالانىپ, ەل تاۋەلسىزدىگىنىڭ 30 جىلدىعى قارساڭىندا ول «قازاقستاننىڭ ەڭبەك ەرى» اتاعىمەن ماراپاتتالدى. دارىگەردى نۇر-سۇلتان قالاسىنىڭ اكىمى التاي كولگىنوۆ قابىلداپ, قۇتتىقتادى. بىزدە دە ماراپات يەسىمەن كەزدەسىپ, از-كەم اڭگىمەلەستىك.
– ماراپاتىڭىز قۇتتى بولسىن! باس قالانىڭ دەنساۋلىق ساقتاۋ سالاسىندا باسشىلىق قىزمەتتەر اتقارىپ, اسىرەسە ونكولوگيالىق ەمدەۋ ماسەلەلەرىن شەشۋگە ەڭبەك ءسىڭىردىڭىز. جالپى تاۋەلسىزدىك العان جىلداردا ەلوردا مەديتسيناسى قالاي دامىدى دەپ سانايسىز؟
– تاۋەلسىزدىك العان جىلى مەن سەمەيدە وبلىستىق بالالار اۋرۋحاناسىندا باس دارىگەردىڭ ورىنباسارى بولىپ جۇمىس ىستەدىم. استاناعا 2009 جىلى كەلدىم. دەنساۋلىق ساقتاۋ مينيسترلىگىنە قاراستى ەمدەۋ دياگنوستيكالاۋ دەپارتامەنتى, ودان كەيىن ستراتەگيا جانە دامۋ دەپارتامەنتى ديرەكتورىنىڭ ورىنباسارى بولىپ ىستەدىم. 2010 جىلى ەلوردانىڭ ونكولوگيا ورتالىعىنىڭ باس دارىگەرى بولىپ اۋىستىم. اۋرۋحانا جاڭا بولسا دا, قۇرال-جابدىقتار جەتىسپەدى. ءدارى-دارمەك تاپشى ەدى. سودان 2012-2016 جىلدارعا ارنالعان ونكولوگيا سالاسىن دامىتۋ باعدارلاماسى قابىلداندى. سول جىلى ەلباسى جولداۋىندا ەلىمىزدەگى ونكولوگيا سالاسىندا ءولىم كورسەتكىشى كوپ ەكەنىن, دياگنوستيكا قيىندىقتارى تۋرالى ايتتى. ول كەزدە ونكولوگيالىق اۋرۋلارعا دياگنوز كەش قويىلاتىن. ارنايى باعدارلاماعا قارجى ءبولىنىپ, سونىڭ ناتيجەسىندە بۇل سالانىڭ بيۋدجەتى ءبىر جىلدىڭ ىشىندە 3 ەسە ارتتى. ول قاراجات ءدارى-دارمەككە, قۇرال-جابدىقتاردى جاڭارتۋعا جۇمسالدى. كۇردەلى دياگنوستيكا جۇرگىزەتىن اپپاراتتار, ساۋلەلى تەراپيا الۋعا مۇمكىندىك تۋدى. ەلىمىزدە جوعارى مامانداندىرىلعان 4 ساۋلەمەن ەمدەيتىن ورتالىق اشىلدى. سونىڭ بىرەۋى استانادا 2014 جىلى قۇرىلدى. زەرتحانالاردىڭ اپپاراتتارى تۇگەندەلىپ, ءدارى-دارمەكتەردىڭ تۇرلەرى كوبەيدى. ەمدەۋ حاتتامالارى قايتا قاراستىرىلىپ, جاڭارتىلعان تۇرمەن شىقتى. قوسىمشا سكرينينگتەر قوسىلدى. سونىڭ ءبارى قاتەرلى ىسىك دياگنوزىن ۋاقىتىلى قويۋعا مۇمكىنشىلىك بەردى.
– جالپى ايتقاندا, تاۋەلسىزدىك بىزگە نە بەردى؟ مەديتسينا سالاسىنا قانداي وزگەرىستەر اكەلدى؟
– تاۋەلسىزدىك ءبىزدىڭ مەديتسينا قاۋىمداستىعىنا كوپ مۇمكىندىكتەر بەردى. بىرنەشە باعدارلامالار اياسىندا مامانداردىڭ ءبىلىمىن جەتىلدىرۋ مۇمكىندىگى كوبەيدى, شەتەلگە بارىپ بىلىكتىلىك ارتتىرۋ, كەرىسىنشە, شەتەلدىڭ بەلدى ماماندارىن شاقىرتىپ, پەرسونالدى وقىتۋ, شەبەرلىك ساباقتارىن وتكىزۋ, سول ساباقتاردا سىرتتان كەلگەن حيرۋرگ دارىگەرلەرمەن بىرىگىپ وتا جاساۋ, تاجىريبە الماسۋ, جاڭا تاسىلدەردى ۇيرەنۋ, وسىنىڭ ءبارىن بۇرىنعىداي ماسكەۋ رۇقساتىن كۇتپەي, ءوز ەلىمىزدە شەشە الاتىن بولدىق. تاۋەلسىزدىكتىڭ ارقاسىندا ساۋلەلى ەم اپپاراتتارى, دياگنوستيكالىق قۇرالدار, دارىلەر كوبەيدى. ەلوردادا بۇگىندە 20 كومپيۋتەرلىك توموگراف بار. ۋزي, رەنتگەن اپپاراتتارى كوپ. حالىقتى مەديتسينانىڭ بارلىق سوڭعى مۇمكىندىكتەرى ارقىلى ەمدەۋ, دياگنوستيكالاۋ مۇمكىندىگى زور, وعان مەملەكەت تاراپىنان جاقسى قولداۋ كورسەتىلەدى.
– نۇر-سۇلتان قالاسىنىڭ مەديتسينا ۇيىمدارىنىڭ دارىگەرلەرى, ورتا جانە كىشى بۋىن قىزمەتكەرلەرى جالپى 350-دەن استام مامان ءتۇرلى مەدالدارمەن, ناگرادالارمەن ماراپاتتالىپتى. بۇل, ارينە, مەديتسينا قىزمەتكەرلەرىنە دەگەن زور قۇرمەت, سالا ماماندارىنىڭ بەدەلىنىڭ ارتقانى دەپ سانايمىز عوي…
– ارينە, سولاي. مەن مىنا الىپ وتىرعان ماراپات تا تەك ماعان ەمەس, جالپى ەلورداداعى ونكولوگيا سالاسىنا, ىندەتپەن كۇرەسكە جۇمىلدىرىلعان بارلىق مەديتسينا قىزمەتكەرلەرىنە بەرىلگەن اتاق دەپ سانايمىن. سەبەبى ءبىزدىڭ سالا – تەك اۋىزبىرلىكپەن اتقارىلاتىن ۇجىمدىق جۇمىس. كەلەسى جىلى ونكولوگيا سالاسىنا 70 جىل تولادى. 2019 جىلى سالانى رەفورمالاۋعا بايلانىستى ءبىر باعىتتاعى اۋرۋحانالار كوپسالالى مارتەبەگە اۋىستىرىلىپ, جۇقپالى اۋرۋلار اۋرۋحاناسىن بىزگە قوستى. بىلتىر قاڭتاردا ءوزىمىزدىڭ ورتالىقتىڭ ءبىر تارماعى جۇقپالى اۋرۋلار بولىمشەلەرى رەتىندە ۇيىمداستىرىلا باستادى. مەنىڭ مىندەتىم – بارلىق باعىتتا مامانداردى دايىنداپ, تاعايىنداۋ بولدى. 28 قاڭتاردا ۋحاننان ستۋدەنتتەر كەلگەندە قالالىق فتيزيوپۋلمونولوگيا ورتالىعىنىڭ ءبىر عيماراتىن وزىمىزگە الىپ, ۋاقىتشا سول جەرگە توسەكتەر ۇيىمداستىردىق. ارتىنان شەتەلدىكتەردىڭ ءبارىن ءبىز قابىلدادىق. ولار تاماق ىشەردە تەك ءبىر رەتتىك پايدالاناتىن ىدىستاردى عانا تۇتىنامىز دەپ, تاماق دايىنداعاندا سونى نازارعا الدىق. ەڭ ءبىرىنشى ناۋقاستار ناۋرىزدا كەلدى. سودان باستاپ ىندەتكە قارسى كۇرەس باستالدى. ۇشاقتان كەلگەن قوناقتاردى قارسى الىپ, ورنالاستىرىپ, كەڭەس بەرىپ, مامانداردى دايىندادىق. ءتيىستى كومەك كورسەتتىك. ول كەزدە دارىگەرلەردىڭ ارنايى كيىمى دە بولمادى, ماماندار تاپشى ەدى. ءالى دەرەگى بەيمالىم, قورقىنىشتى اۋرۋ بولعاندىقتان, كوبى بىزگە كەلمەدى. وسى تۇستا ىندەتپەن كۇرەستە العى شەپتە جۇرگەندەرگە قوسىمشا تولەم جاسالاتىنى وڭتايلى شەشىم بولدى.
سونىمەن قاتار, ۇيلەسىمدى جۇمىستىڭ ارقاسىندا ورتالىقتىڭ ونكولوگيالىق بولىمشەسىنىڭ جۇمىسى ءبىر كۇن دە توقتاعان جوق. دەرتى بار 8 مىڭنان استام پاتسيەنت ەمدەلدى, 3 مىڭنان استام وتا جاسالدى. كارانتين كەزىندە ونكوپاتسيەنتتەرگە ءدارى-دارمەكتەردى ۇيگە جەتكىزۋ ۇيىمداستىرىلدى. ودان بولەك, قوسىمشا ينسۋلت ورتالىعى اشىلدى, ول جوسپارلى جانە شۇعىل پاتسيەنتتەردى قابىلدايدى. ەل باسشىلىعى مەديتسينا قىزمەتكەرلەرىن قولداۋ شارالارىنا ەرەكشە نازار اۋدارادى. پرەزيدەنتتىڭ تاپسىرماسى بويىنشا دەنساۋلىق ساقتاۋ سالاسىن ودان ءارى دامىتۋدى جالعاستىرامىز.
