ەلوردانىڭ ەڭ ۇزدىك مۇعالىمى
ەڭ بىلىكتى, ەڭ شىعارماشىل, ەڭ ءبىلىمدى ۇستاز. بۇل – بيىلعى «ۇزدىك مۇعالىم» بايقاۋىنا قويىلعان تالاپ. وسى سىننان سۇرىنبەي وتكەن №73 مەكتەپ-ليتسەيىنىڭ باستاۋىش سىنىپ مۇعالىمى گۇلجان باپانوۆا بولدى. وقۋشىلار سارايىندا وتكەن قالالىق كەزەڭدە بارلىق سىننان سۇرىنبەي ءوتىپ, قانجىعاسىنا باس جۇلدەنى بايلاعان ول استانانىڭ ەڭ ۇزدىك مۇعالىمى اتاعىن يەلەنىپ, 1 745 000 تەڭگەلىك سەرتيفيكاتتىڭ يەگەرى اتاندى. شاراعا ەلوردا اكىمىنىڭ ورىنباسارى ەرمەك امانشاەۆ قاتىستى.
ايتا كەتەيىك, بۇل بايقاۋعا قالامىزدىڭ 84 مەكتەبىنەن مۇعالىمدەر الدىن الا وتكىزىلگەن ەكى كەزەڭگە قاتىستى. ناتيجەسىندە 8 سايىسكەر فينالعا ىرىكتەلىنىپ شىقتى. وزدەرىنىڭ بىلىكتىلىكتەرىن تاجىريبە ناتيجەلەرى مەن پەداگوگيكالىق سيتۋاتسيالاردان شىعۋ شەبەرلىكتەرى ارقىلى كورسەتكەن سايىسكەرلەردى قازىلار القاسى اشىق داۋىس بەرۋ ارقىلى انىقتادى. جۇلدەلى ءى ورىن №50 مەكتەپ-ليتسەيىنىڭ قازاق ءتىلى ءپانى مۇعالىمى ۇلبولسىن ەسىلباەۆاعا (1 654 000 تەڭگەگە سەرتيفيكات) بۇيىرسا, ءىى ورىندى ءبىلىم جانە يننوۆاتسيا ليتسەيىنىڭ فيزيكا ءپانى مۇعالىمى ەسبول دۇيسەەۆ (1 561 000 تەڭگەگە سەرتيفيكات) يەلەندى. ال ءىىى ورىن № 58 مەكتەپ-گيمنازياسىنىڭ تاريح ءپانى مۇعالىمى بولات بيمەندينگە (1 012 000 تەڭگەگە سەرتيفيكات) بۇيىردى. وقۋشىلاردى وقۋ ۇدەرىسىنە تارتا ءبىلۋ داعدىلارى مەن ساباق وتكىزۋدەگى كاسىبي شەبەرلىگىمەن ەرەكشەلەنگەن ۇستازداردى «ادىسكەر مۇعالىم», «زەرتتەۋشى مۇعالىم», «ەرۋديت مۇعالىم», «جاڭاشىل مۇعالىم», «كورەرمەندەر كوزايىمى» اتالىمدارى بويىنشا ماراپاتتاپ 200 مىڭ تەڭگە كولەمىندە سىياقى مەن ارنايى ديپلومدار تابىستالدى.
گۇلجان باپانوۆا,
№ 73 مەكتەپ-ليتسەيىنىڭ باستاۋىش سىنىپ مۇعالىمى:
– ءححى عاسىر – باسەكە عاسىرى. ەلباسىمىز حالىققا ارنالعان جولداۋىندا «ءححى عاسىردا ءبىلىمىن دامىتا الماعان ەلدىڭ تىعىرىققا تىرەلەرى انىق. وسى زامانعى ءبىلىم بەرۋ جۇيەسىنسىز ءارى الىستى بارلاپ, كەڭ اۋقىمدا جاڭاشا ويلاي بىلەتىن وسى زامانعى باسقارۋشىلارسىز ءبىز يننوۆاتسيالىق ەكونوميكا قۇرا المايمىز» دەگەن بولاتىن. بىزدەر, ۇستازدار قاۋىمى, ءبىلىمدى ۇرپاق – بولاشاعىمىزدىڭ كەپىلى ەكەنىن جاقسى تۇسىنەمىز. جەڭىسىمە قاتتى قۋاندىم. سىناق – الدا. رەسپۋبليكالىق بايقاۋدا دا توپ جارىپ, استانالىقتاردىڭ مەرەيىن اسىرعىم كەلەدى.
گۇلجان راحمان