استانا قالاسىنىڭ اكىمى اسەت يسەكەشەۆ سەنبى كۇنى «استانا-ارەنا» ستاديونىندا بولىپ, وندا گوللانديالىق تەحنولوگيا بويىنشا توسەلگەن جاڭا الاڭنىڭ ساپاسىن كوردى. الاڭ جابىندىسى ەۋروپا ستاندارتىنىڭ ەڭ سوڭعى ۇلگىسىمەن جاسالعان.
بەلگىلى بولعانىنداي, فۋتبول الاڭىنا سونداي-اق, ارنايى رەزەڭكە تۇيىرلەگىش پەن كۆارتس قۇمى توگىلگەن. مۇنىڭ ءوزى ويىن كەزىندە فۋتبولشىلاردى ءجونسىز جاراقات الىپ قالۋدان ساقتاپ قالادى. «استانا-ارەناداعى» جۇمىستار بارىنشا قىسقا ۋاقىتتىڭ ىشىندە اتقارىلىپ شىقتى. ونىڭ بارىسىندا ءتيىستى تەحنولوگيالىق تالاپتار تۇگەل ساقتالعان. الاڭداعى العاشقى رەسمي كەزدەسۋ 2 مامىر كۇنى وينالدى. ال تاياۋداعى ماتچ 28 مامىر وتەدى. سول كۇنى «استانا» كومانداسى قاراعاندىنىڭ «شاحتەرىن» قابىلدايدى.
قالا اكىمى سپورت ارەناسىندا كوماندانىڭ جاتتىقتىرۋشىلار قۇرامىمەن كەزدەسىپ, ولارمەن الداعى ويىندارعا دايىندىق بارىسى تۋرالى اڭگىمەلەستى. سوڭىندا ءا.يسەكەشەۆ «استانا» فۋتبولشىلارىمەن بىرگە ەكى جاقتى ويىنعا قاتىستى. ءىسساپار بارىسىندا قالا باسشىسى فۋتبولشىلارعا شىلدە ايىندا چەمپيوندار ليگاسىندا باستالاتىن كەزەكتى راۋندتا تابىستى ونەر كورسەتۋگە تىلەكتەستىك ءبىلدىردى. ال جاڭا الاڭنىڭ ساپاسىن جوعارى باعالاعان كلۋب ويىنشىلارى الداعى كەزدەسۋلەرگە جان-جاقتى دايىندالىپ جاتىر.
«استانا-اقپارات»
