ەلباسى سامميتكە قاتىستى
مەملەكەت باسشىسى نۇرسۇلتان نازارباەۆ ساۋد ارابياسى كورولدىگىنىڭ استاناسى ەر-رياد قالاسىندا وتكەن «اقش – يسلام الەمى» سامميتىنە قاتىستى.
قازاقستان پرەزيدەنتى سامميت بارىسىندا بىرقاتار مەملەكەتتەردىڭ باسشىلارىمەن جانە دەلەگاتسيا جەتەكشىلەرىمەن كەزدەسىپ, قىسقا كەلىسسوزدەر جۇرگىزدى. اتاپ ايتقاندا, ەلباسى مۇندا اقش پرەزيدەنتى دونالد ترامپپەن كەزدەستى. كەزدەسۋ كەزىندە ەكىجاقتى ءوزارا ءىس-قيمىلدىڭ نەگىزگى باعىتتارى, سونىڭ ىشىندە ساۋدا-ەكونوميكالىق, ساياسي جانە مادەني-گۋمانيتارلىق سالالارداعى بايلانىستاردى تەرەڭدەتە ءتۇسۋدىڭ پەرسپەكتيۆاسى اڭگىمە ارقاۋى بولدى. پرەزيدەنتتەر كۇن تارتىبىندەگى ماسەلەلەر جونىندە دە پىكىر الماستى.
قازاقستان پرەزيدەنتى سونىمەن قاتار مەملەكەتارالىق ىنتىماقتاستىقتىڭ ءتۇرلى ماسەلەلەرى جونىندە كۋۆەيت مەملەكەتىنىڭ ءامىرى ساباح ءال-احماد ءال-دجابەر اس-ساباحپەن, كاتار ءامىرى شەيح تاميم بەن حاماد ءال تانيمەن, باحرەين كورولى حاماد بەن يسا ءال حاليفامەن, ابۋ-ءدابيدىڭ تاق مۇراگەرى, بىرىككەن اراب امىرلىكتەرى قارۋلى كۇشتەرى جوعارعى باس قولباسشىسىنىڭ ورىنباسارى, شەيح مۇحاممەد بەن زايد ءال ناحايانمەن, يەمەننىڭ پرەزيدەنتىمەن, ماۆريتانيا پرەزيدەنتى موحاممەد ۋلد ابدەل-ازيزبەن, پاكىستاننىڭ پرەمەر-ءمينيسترى نازار شاريفپەن ۇشىراستى. ال يسلام ىنتىماقتاستىق ۇيىمىنىڭ باس حاتشىسى يۋسەف بەن احمەد ءال-ۋسايمينمەن كەزدەسۋدە ءوزارا ءىس-قيمىلدىڭ كەيبىر اسپەكتىلەرى تالقىلاندى.
سوڭىندا ەلباسى اقش مەملەكەتتىك حاتشىسى رەكس تيللەرسونمەن جۇزدەستى. باسقوسۋدا مەملەكەتارالىق ەكىجاقتى ىنتىماقتاستىقتىڭ قازىرگى احۋالى مەن ونىڭ كەيبىر اسپەكتىلەرىن دامىتۋ جايى ءسوز بولدى. تاراپتار سونداي-اق وتە وزەكتى حالىقارالىق ماسەلەلەر جونىندە وي ءبولىستى. نۇرسۇلتان نازارباەۆ قازاقستان مەن اقش اراسىنداعى ءوزارا ءىس-قيمىلدىڭ كوپتەگەن باعىتتاردا دامۋدىڭ جاڭا ساپالى دەڭگەيىنە كوتەرىلەتىنىنە سەنىم ءبىلدىردى.