ەلىمىزدە ەلۋدى ەڭسەرىپ, الپىستى القىمداعانداردىڭ جۇمىسقا ورنالاسۋدا ءبىراز قيىندىققا تاپ بولاتىندارى جاسىرىن ەمەس. وسى ماسەلەنىڭ توڭىرەگىندە بۇرناعى كۇنى «قازاقستان 2050» جالپىۇلتتىق قوزعالىسى مادەنيەت جانە سپورت مينيسترلىگىنىڭ قولداۋىمەن «50-دەن كەيىن: زەينەت الدىنداعى ادامنىڭ جۇمىسقا ورنالاسۋدا تاپ بولاتىن قيىندىقتارى» تاقىرىبىندا دوڭگەلەك ۇستەل وتكىزدى. جيىنعا دەنساۋلىق ساقتاۋ جانە الەۋمەتتىك دامۋ مينيسترلىگى, استانا اكىمدىگى مەن ۇكىمەتتىك ەمەس ۇيىم وكىلدەرى, HR سالاسىنداعى ماماندار, سونداي-اق, كادرلىق اگەنتتىكتەر باسشىلارى قاتىستى.
قر كونستيتۋتسياسىنىڭ 24-باپ, 2- تارماعىندا ەڭبەك ءۇشىن اقى تولەنگەندە قانداي دا ءبىر كەمسىتۋشىلىكتىڭ بولماۋى ءتيىس دەلىنگەن. سوعان قاراماستان, قوعامدا جۇمىسقا ورنالاسۋ بارىسىندا بىرقاتار ديسكريميناتسياعا جول بەرىلىپ جاتىر. مۇنداي كەدەرگىلەرمەن, اسىرەسە, زەينەتكەرلىك جاسقا تاقاپ قالعان ادامدار ۇشىراسادى. جۇمىسىنان ايىرىلىپ, شاراسىز كۇيدە قالعان قارتتارمەن سالىستىرعاندا, جاستار بۇل ماسەلەدە تەز جول تاۋىپ, بەيىمدەلىپ كەتە الادى. جاستار اراسىنداعى جۇمىسسىزدىقپەن كۇرەسكە باعىتتالعان باعدارلامالار – ولارعا مەملەكەت تاراپىنان كورسەتىلىپ جاتقان قولداۋدىڭ ءبىر دالەلى. ال, زەينەتكەرلىككە تاقاپ قالعان ازاماتتار نازاردان تىس قالىپ قويىپ وتىر. ولار از دا بولسا تابىس كوزىنەن ايىرىلىپ قالماۋ ءۇشىن جۇمىستاعى كەيبىر قولايسىزدىقتارعا كەلىسۋگە ءماجبۇر ەكەنى دە شىندىق.
«بۇگىندە ەڭبەككە جارامدى 8,5 ملن قازاقستاندىق بار. ال ولاردىڭ تورتتەن ءبىرىن 45 پەن 59 جاس ارالىعىنداعى ازاماتتار قۇرايدى ەكەن. سوندىقتان دا ولاردىڭ ءبىلىمىن جەتىلدىرەتىن ارنايى وقۋ باعدارلاماسى قاجەت» دەيدى ۇيىمداستىرۋشىلار. سونىمەن قاتار, كەزدەسۋدە تالقىعا تۇسكەن ۇسىنىستاردىڭ بارلىعى ءتيىستى قۇزىرلى ورگاندارعا جىبەرىلەتىندىگى ايتىلدى.
ال «قازاقستان 2050» جالپىۇلتتىق قوزعالىسى كەڭەسىنىڭ توراعاسى دانات جۇمين «جول كارتاسى» باعدارلاماسى بويىنشا جاس شاماسىنا قاراماستان ءاربىر ازامات قايتا دايارلىق كۋرسىنان وتە الاتىندىعىن مالىمدەدى. ول ءۇشىن بار بولعانى «جۇمىسپەن قامتۋ ورتالىعىنا» بارىپ ءوتىنىش ءبىلدىرۋى كەرەك.
كۇنايىم ساكەن
